Kon sa Unsang Paagi Maugmad ang Katakos sa Pangatarongan
1 Usa ka kahubitan sa pulong nga “katarongan” maoy “pagpakigsulti sa lain aron sa pag-impluwensiya sa iyang mga aksiyon o mga opinyon.” Aron mapauswag ang imong pagkaepektibo diha sa ministeryo, gikinahanglan nimong ugmaron ang katakos sa pagpangatarongan uban kanilang imong mahibalag. (Buh. 17:2-4) Apan sa unsang paagi maugmad mo kini nga kahanas?
2 Magsugod Kini sa Pagpamalandong: Sa dihang magtuon sa mga kamatuoran sa Bibliya, makaplagan nimong mapuslanon ang pagpamalandong sa materyal. Kon ang mga bahin sa materyal daw may diyutayng pagkakomplikado, paggahin ug panahon sa paghimog pipila ka panukiduki ug pamalandong sa mga tubag. Paningkamoti nga tin-awng masabtan dili lamang ang mga pagpatin-aw nga gitagana kondili usab ang Kasulatanhong mga katarongan alang sa maong mga pagpatin-aw.
3 Pagpangandam Alang sa Ministeryo Nalangkit: Hunahunaa kon unsaon nimo pagpatin-aw ang kamatuoran ngadto sa lainlaing mga matang sa mga tawo. Paghimog usa ka makapukaw-sa-hunahuna nga pangutana sa paghaling sa interes. Tinoa kon unsaon pagsumpay ang usa ka Kasulatanhong punto ug mangatarongan diha niana. Pangandam daan sa mga pagsupak nga hayan ipatungha, ug hunahunaa kon sa unsang paagi hisgotan kini. Ipunting diha sa publikasyon nga gitanyag ang hinungdanong puntos nga mapadapat gayod.
4 Sunda ang Panig-ingnan ni Jesus: Gipahiluna ni Jesus ang labing maayong sumbanan sa epektibong pagpangatarongan gikan sa Kasulatan. Sa pag-analisar kon sa unsang paagi siya nagtudlo, tagda ang asoy nga makaplagan sa Lucas 10:25-37. Matikdi kini nga pamaagi: (1) Ipunting ang pagtagad ngadto sa Kasulatan sa pagtubag sa mga pangutana sa mga tawo. (2) Hangyoa sila sa pagpahayag sa ilang kaugalingon, ug dayega sila sa dihang sila makahimog mailahong mga komento. (3) Paneguroa nga masentro ang koneksiyon tali sa pangutana ug sa Kasulatan. (4) Gamita ang usa ka ilustrasyon nga makatandog sa kasingkasing sa pagsegurong masabtan ang tinuod nga bili sa tubag.—Tan-awa ang Marso 1, 1986, Bantayanang Torre, mga panid 27-8, mga parapo 8-10.
5 Gamita ang Himan nga Gihatag Kanato: Ang Nangatarongan Pinasukad sa Kasulatan gipatik ingong basahong-tamdanan sa ministeryo sa kanataran. Ang mga pasiuna niini, mga tubag sa lagmit nga mga tigsumpo sa panaghisgot, ug mga puntos sa pangatarongan motabang kanato sa pag-ugmad sa katakos sa pangatarongan. Ang librong Nangatarongan maoy usa ka hinungdanong himan nga kinahanglan kanunay natong dalhon diha sa pag-alagad ug dili magpanuko sa paggamit sa dihang malangkit sa mga panaghisgot sa Bibliya. Sublia ang mga panid 7-8 sa libro aron masabtan kon unsaon sa paggamit niana sa labing dakong bentaha.
6 Ang pag-ugmad sa imong katakos sa pangatarongan magpauswag sa imong kahanas diha sa pagsangyaw ug pagtudlo nga buluhaton. Kini moresulta sa dagayang mga panalangin kanimo ug ngadto kanilang imong mahibalag sa ministeryo.