Pagsangyaw sa Kanunay Nakobrehan nga Teritoryo
1 Kita nagamaya sa pagkadawat ug mga taho nga daghang kongregasyon ang kanunay nagakobre sa ilang teritoryo. (Mat. 24:14; 1 Tim. 2:3, 4) Bisan tuod nga kini nagapresentar ug usa ka hagit, kini malamposong mabuntog kon kita nangandam pag-ayo sa pag-atubang sa nagkadaiyang mga kahimtang nga motungha.
2 Ang Epektibong mga Pasiuna Mao ang Yawi: Hinungdanon kaayo nga magmaandam sa paggamit sa usa o labaw pang gihunahuna-pag-ayong mga pasiuna. Kana kinahanglang magalakip sa pinunting nga mga pahayag nga nagapatin-aw sa hinungdanong mga katarongan sa atong subsob nga mga pagduaw.
3 Ang librong Nangatarongan nagataganag daghang maayong panig-ingnan sa nahiangayng mga pasiuna nga magamit. Ang tulo nalista sa panid 15 ubos sa ulohang “Sa Teritoryo nga Sagad Nasangyawan.” Ensayoha ang mga paagi nga buot nimong gamiton sa imong teritoryo.
4 Ang pipila ka magmamantala nakakaplag ug kalamposan sa paggamit sa mga balita gikan sa lokal nga mantalaan aron pagsugod ug panaghisgot diha sa kanunay nasangyawan nga teritoryo. Ang librong Nangatarongan nagahatag ug tulo ka panig-ingnan kon unsaon kini paghimo. Tagda ang ikaduhang pasiuna ubos sa ulohang “Krimen/Kaluwasan” sa panid 10 ug ang unang duha ka pasiuna ubos sa ulohang “Bag-ong mga Hitabo sa Adlaw” sa panid 11 (panid 10 ug 11 sa Ingles).
5 Mga Pasiuna nga Imong Andamon: Ugmara ug gamita ang pasiunang mga komento nga gipresentar sa librong Nangatarongan. Isulti kana sa imong kaugalingong mga pulong. Imong maensayo kana uban sa usa ka hanas nga magmamantala una pa gamiton kana sa kanataran.
6 Pananglitan, ikaw makaingon ug sama niini:
◼ “Sukad sa among miaging pagduaw kanimo, [hisgoti ang kinabag-ohang hitabo nga giestoryahan sa mga tawo sa komunidad]. Tungod kay kitang tanan naapektohan, daghan sa atong silingan nagpahayag ug seryosong kabalaka. Tingali ikaw usab nagahunahuna niana. [Hunong sa makadiyot aron tugotan ang posibleng tubag.] Tungod sa mga kahimtang sa kalibotan karon, dili ka ba mouyon sa gisulat ni propetang Jeremias sa kapitulo 10, bersekulo 23?” Human sa pagbasa sa kasulatan, kuhaa ang obserbasyon sa tagbalay, unya ipunting ngadto sa usa ka kasulatan nga nagapakita kon unsaon ni Jehova pagsulbad ang maong suliran nga gihisgotan.
7 O makaingon ka:
◼ “Sa walay duhaduha imong namatikdan sa mga balita karon [hisgoti ang tinong hitabo]. Tingali ikaw mouyon nga kini makaapektar kanatong tanan. [Hunong sa makadiyot alang sa posibleng tubag.] Kita makalaom nga ang mga kagamhanan makalaraw ug usa ka mubog-tagal nga kahupayan; hinunoa, ang Bibliya nagapakita kon sa unsang paagi ang suliran pagasulbaron sa dayon.” Ipunting ngadto sa usa ka kasulatan nga nagapakita kon unsa ang buhaton sa Diyos.
8 “Nganong Subsob Kaayo Kamong Nagaduaw?” Ang tukmang mga tubag niining maong pagsupak gihatag sa librong Nangatarongan sa panid 20 ubos sa ulohang “Nganong Kamo Kanunayng Nagaduaw?” Bisan kon wala suknaa, kita makahatag ug maayong pamatuod kon atong tabangan ang uban sa pagpabili nga ang tiunayng gugma sa Diyos ug silingan nagatukmod kanato sa pagduaw kanunay segon sa maarangan. Ang pagpakighisgot sa mga pulong ni Jesus sa Juan 21:15-17 mapuslanon niining bahina.
9 Hangtod nga moingon si Jehova nga igo na, magpadayon kita sa pag-atubang sa hagit sa pagkobre sa kanunay nasangyawan nga teritoryo. Uban niining maong determinasyon, kita makapaneguro sa iyang pagtultol, panalipod, ug panalangin hangtod sa kataposan.—Mat. 28:19, 20.