Mga Pasiuna sa Paghaling sa Interes
1 Si Jesus hanas kaayo sa iyang paggamit ug mga pasiuna. Bisan kon nakigsulti ngadto sa usa ka dakong grupo o sa usa ra ka tawo, si Jesus nakabutad sa pagtagad sa iyang mamiminaw pinaagig personal nga paglangkit kanila. Iyang gipakita kanila ang kahinungdanon sa iyang ulohan.—Mat. 5:3-12; Luc. 20:25-37; Juan 4:7-30.
2 Abanteng Pagpangandam Gikinahanglan: Aron nga makahaling ug interes, ang atong mga pasiuna angayng magalakip sa indibiduwal, magalangkit sa iyang mga kabalaka, ug magapakita nga ang mensahe sa Gingharian makabulig kaniya sa personal.
3 Sa pagpangandam alang sa ministeryo, repasoha ang mga gikabalak-an sa katawhan sa komunidad. Unsa man ang makapainteres sa usa ka batan-on? Sa usa nga mas edaran? Ngadto sa mga bana, mga asawa, o mga ginikanan? Inay nga gamiton ang samang pasiuna sa matag pultahan, pag-andam ug ubay-ubayng mga pasiuna ug magmaandam nga ikapasibo kana sa dihang mapanid-an mo ang sanong sa mga tagbalay. Ang pipila ka magmamantala nakabaton ug kalamposan pinaagig paggamit ug nagkalainlaing mga pasiuna gikan sa librong Nangatarongan sa matag higayon nga mogawas sila sa balaybalay nga ministeryo.—rs p. 9-15.
4 Sa bulan sa Septiyembre, hayan buot mong gamiton ang usa ka presentasyon nga sama niini:
◼ “Maayong buntag. Kami nagapangutana sa among mga silingan kon unsang mga hiyasa ang buot nilang makita diha sa usa ka tawo nga nagamando sa uban. Makapangutana ba ako kon unsang mga hiyasa ang imong gihunahunang labing mahinungdanon? [Tugoting motubag. Uyon kon angayan.] Nasayod ka ba nga ang Bibliya nagahubit sa mga katakos sa Usa nga mahimong magmamando sa katawhan? Kana ania dinhi sa Isaias 9:6, 7. [Basaha.] Unsay imong gihunahuna nga mahisama unya ang pagpuyo ubos sa ingon niana nga magmamando?” Tugoting motubag ug dayon itultol ang pagtagad sa Salmo 146:3, 4 ug ang materyal sa librong Nangatarongan sa mga panid 86-7 (p. 153-4 sa Ingles) bahin sa pagmando ni Jesus. O ang brosyur nga Kagamhanan sa mga panid 19 ug 20 magamit sa paghaling ug dugang panaghisgot.
5 Kon ikaw nakigsulti niadtong may mga pamilya, ang mosunod nga presentasyon hayan mosaler kaayo sa dihang nagatanyag sa brosyur nga Tagamtama ang Kinabuhi.
Human sa lokal nga pagtimbaya, makaingon ka:
◼ “Namatikdan ba nimo nga ang inadlaw nga mga kapit-osan nagaatubang ug usa ka tinuod nga hagit sa mga pamilya karon? [Tugoting motubag.] Aduna ka bay gihunahuna kon asa moliso ang mga pamilya alang sa maayong tambag? [Tugoting motubag.] Matikdi kon unsay giingon sa Magmumugna sa kaminyoon ngadto sa unang tawhanong pares.” Basahang Genesis 1:28 ug dayon gamitang mga puntos 55, 56, 68, ug 69 diha sa brosyur nga Tagamtama ang Kinabuhi ug ipadayon ang inyong panaghisgot.
6 Pinaagi sa pagsundog sa mga paagi ni Jesus sa pagbutad sa interes ug paglangkit sa mamiminaw sa panaghisgot, atong ikapakita ngadto sa mga mabuot-kasingkasing ang bili sa espirituwal nga mga butang.