Epektibong Pagpaila sa Librong Mabuhing Walay Kataposan
1 Si Jesus mahanason sa iyang paggamit sa mga pasiuna. Sa usa ka okasyon siya nanguna sa usa ka panaghisgot uban sa usa ka Samaritanang babaye pinaagig yanong pagpangayo kaniya ug mainom nga tubig. Kini nakadakop dayon sa iyang atensiyon tungod kay ang ‘mga Judio wala may pagpakiglabot sa mga Samaritano.’ (Juan 4:7-9) Makakat-on kita gikan sa iyang panig-ingnan.
2 Sa dihang mangandam sa pagtanyag sa librong Mabuhing Walay Kataposan, suknaa ang imong kaugalingon, ‘Unsa man ang makapadani sa usa ka tin-edyer, mas edaran nga tawo, usa ka bana, o usa ka asawa?’ Makaandam ka ug labaw sa usa ka pasiuna ug gamita ang usa nga maorag labing haom sa situwasyon.
3 Tungod kay nakapabalaka sa daghan ang pagkadaot sa pamilyahanong kinabuhi, makaingon ka:
◼ “Ang adlaw-adlaw nga pagpit-os sa kinabuhi nakahatag ug dakong kalisod sa mga pamilya karon. Asa man sila makakaplag ug tabang? [Tugoting motubag.] Ang Bibliya tinuod gayod nga makatabang. kanato. [Basahang 2 Timoteo 3:16, 17.] Matikdi ang parapo 3 sa panid 238 niining basahona, Ikaw Mabuhing Walay Kataposan sa Paraiso sa Yuta.” Basahang parapo 3, ug itanyag ang libro.
4 Kon gamiton mo ang usa ka lokal nga balita, makaingon ka:
◼ “Nadunggan ba nimo ang balita bahin sa [hisgoti ang balita nga gikabalak-an sa lokal]? Unsay imong hunahuna mahitungod niana? [Tugoting motubag.] Kana makapahibulong kanimo kon unsay dangatan niining kalibotana, dili ba? Ang Bibliya nagtagna nianang mga butanga ingong ebidensiya nga kita nagapuyo na sa kataposang mga adlaw.” Unya tagda ang impormasyon sa librong Mabuhing Walay Kataposan, mga panid 150-3.
5 Daghan ang nabalaka bahin sa nagatubong suliran sa krimen. Magamit nimo ang unang pasiuna ubos sa ulohang “Krimen/Kaluwasan” sa panid 10 sa librong “Nangatarongan”:
◼ “Nagapakigsulti kami sa mga tawo, mahitungod sa personal nga kaluwasan. Sa atong palibot nagadagsang ang krimen, ug kana nagaapektar sa atong mga kinabuhi. Unsay imong hunahuna nga kinahanglang buhaton aron nga ang mga tawo mobating hilwas diha sa kadalanan sa kagabhion?” Basahang Salmo 37:10, 11 ug hisgoti ang mga panalangin sa Gingharian sa Diyos, nga nagagamit sa mga panid 156-8 sa librong Mabuhing Walay Kataposan.
6 Kon imong palabihon ang mas yanong paagi, hayan magamit mo ang pasiuna nga sama nianang makaplagan sa panid 12 sa librong “Nangatarongan,” sa ulohang “Kaugmaon/Seguridad” (panid 11 sa Ingles):
◼ “Kami nagadasig sa among mga silingan aron tagdon ang dakong kaugmaon nga ginapaabot sa Bibliya nganhi kanato. [Basahang Pinadayag 21:3, 4.] Maayo ba kanang paminawon alang kanimo? [Tugoting motubag.] Ang kapitulo 19 niining libroha nagapatugbaw sa mga panalangin nga masinatian sa katawhan ubos sa Gingharian sa Diyos.” ltanyag ang libro.
7 Ang pag-andam ug epektibong pasiuna makatabang kanimo sa pag-abot niadtong gigutom sa kamatuoran ug pagkamatarong.—Mat. 5:6.