Ugmara ang Interes sa Librong Mabuhing Walay Kataposan
1 Sa dihang moduaw kita sa ilang mga balay, sagad natong makaplagan nga ang mga tawo natugob diha sa “mga kabalaka niining sistemaha sa mga butang.” (Mar. 4:19) Sa sinugdan, ang kadaghanang tawo may diyutay rang interes sa atong mensahe. Kon kita makasulti ug usa ka butang nga makatandog sa ilang mga kinabuhi, hayan mapukaw nato ang interes diha sa mensahe sa Gingharian. Ang usa ka yawi sa pagsugod ug mga panaghisgot mao ang pagpilig makapadaning mga puntos gikan sa librong Mabuhing Walay Kataposan. Unsay imong isulti?
2 Magamit nimo kining paagiha:
◼ “Kon ikaw may gahom, unsang suliran sa atong adlaw ang imong tul-iron? [Tugoting motubag.] Hangtod karon, ang mga pangulo sa kalibotan may diyutay rang kalamposan sa pagkaplag ug mga sulbad sa mga suliran sa atong adlaw. Apan adunay Usa nga makatapos sa tanang suliran nga nagsakit sa katawhan. Matikdi ang giingon sa Salmo 145:16. [Basaha ang kasulatan, ug ipunting ang mga ilustrasyon sa mga panid 11-13.] Ang parapo 14 sa panid 14 nagapatungha sa pangutana nga atong nahisgotan ug nagasukna: ‘Apan kanus-a kini matuman?’” Isaysay nga ang libro magatubag nianang pangutanaha, ug itanyag ang libro.
3 O makaingon ka ug sama niini:
◼ “Tingali ikaw nasayod sa haw-ang nga pagbati nga mosangpot tungod sa kamatayon sa usa ka minahal. Malagmit kini nakapaguol kanimo ug wala na gayoy mahimo. Hayan nakapamalandong ka niining mga pangutanaha: [Basahang mga pangutana sa parapo 1 sa panid 76.] Dili ba makapahupay ang pagbaton sa mga tubag niining mga pangutanaha? Ang Bibliya nagahatag ug seguradong paglaom alang niadtong nangamatay. [Basaha ang Juan 5:28, 29.] Kining libroha magatabang kanato sa pagsabot sa kahimtang sa mga patay ug kon unsay paglaom sa umaabot.” Itanyag ang libro.
4 Sa walay duhaduha may mga kahigayonan ka sa pagsangyaw nga impormal. Kon mao, makaingon ka ug sama niini:
◼ “Ang kalibotan puno sa mga suliran niining mga adlawa, ug sa walay duhaduha ikaw nakaambit niana. Ikasubo ang pagsulti, nga maorag ang mga inosente ang ilabinang nag-antos. Gihunahuna ba nimong ang Diyos magatapos gayod sa pag-antos? [Tugoting motubag.] Matikdi kon unsay gisaad sa Diyos nga buhaton alang kanilang nagaalagad kaniya. [Basaha ang Salmo 37:40 ug unya paklia ang librong Mabuhing Walay Kataposan sa panid 99.] Kining libroha nagasaysay kon nganong gitugotan sa Diyos ang pagkadaotan ug sa unsang paagi iyang taposon kana.”
5 Kon ikaw usa ka batan-ong magmamantala, magamit nimo ang usa ka presentasyon nga gipasukad sa mga ilustrasyon sa mga panid 156-8. Makasugod ka pinaagig pagsukna:
◼ “Buot ba nimong magpuyo sa usa ka kalibotang sama niini? [Tugoting motubag.] Ang matag usa niining matahom nga mga hulagway gipasukad sa usa ka saad nga gipahayag sa Pulong sa Diyos, ang Bibliya. [Ipunting ngadto sa Kasulatanhong mga reperensiya.] Kining libroha makatabang kanimo sa pagkat-on ug dugang bahin sa saad sa Diyos sa paghimo sa tibuok yuta nga usa ka paraiso. Kini nagaunod sa nagaluwas-kinabuhing impormasyon ug takos gayod ang panahon nga magugol sa pagbasa niana.”—Juan 17:3.
6 Kitang tanan magagamit gayod sa librong Mabuhing Walay Kataposan sa Septiyembre aron pag-ugmad sa interes sa maayong balita sa Gingharian.