Pagsugod ug mga Pagtuon sa Bibliya sa Librong Mabuhing Walay Kataposan
1 Ang gugma sa katawhan magapalihok gayod kanato nga mobalik dayon aron tabangan kadtong gigutom ug giuhaw sa kamatuoran. (Mat. 5:6) Kinahanglang ugmaron nato ang bisan unsang kidlap sa interes nga atong makaplagan, kon dili nato buot nga mapalong kana. Ang pagpangandam mao ang yawi sa kalamposan.
2 Ang atong tumong mao gayod ang pagsugod ug mga pagtuon sa Bibliya. (Mat. 28:20) Ang unang mga kopya sa librong Mabuhing Walay Kataposan nagalakip niining pasiunang mga komento: “Kini usa gayod ka ekselenteng libro nga magamit sa pagtuon sa tanan, batan-on o tigulang, bisan unsa man ang ilang sukdanan sa edukasyon.” Ang estilo niini makapahimo sa pagdumalag mga pagtuon nga mas sayon, nga bisan gani ang mas bag-ohang mga magmamantala makahimo sa pagpakig-ambit.
3 Unsaon Nato Pagsugod ug mga Pagtuon?: Sa dihang kita mobalik, maoy maayo ang paghisgot sa pipila ka pangutana nga nahisgotan sa atong unang duaw. Tingali imong nahisgotan ang kahimtang sa mga patay, nga nagabilin sa pangutanang, “Unsa ang paglaom alang sa nangamatay natong mga minahal?” Ipatin-aw nga ang pagkabanhaw maoy usa ka napasukad-pag-ayong paglaom; ang Bibliya nagarekord sa daghang panig-ingnan sa mga pagkabanhaw nga nahitabo na. Repasoha ang mga ilustrasyon sa mga panid 167-9. Unya hisgoti kon unsa ang gipahayag sa mga parapo 1 ug 2 sa panid 166.
4 Hayan gikasulti nimo ang usa ka ginikanan nga nabalaka bahin sa mga suliran sa pagpadako sa mga anak. Hayan makasulti ka ug sama niini:
◼ “Gusto sa tanang ginikanan ang labing maayo alang sa ilang mga anak. Ang Bibliya nagaunod sa instruksiyon nga makatabang sa mga ginikanan sa pagbansay sa ilang mga anak nga makabaton ug makatagbawng kinabuhi. Tungod sa maong katarongan, among irekomendar nga ang mga pamilya magtuon sa Bibliya sa tingob. [Ipunting ngadto sa parapo 23 sa panid 246.] Ang kahibalo nga mabatonan magadalag walay kataposang mga panalangin sa tibuok pamilya!” Basaha ang Juan 17:3. Ipasalig nga mobalik ug ipakita sa pamilya kon unsaon pagsugod ang pagtuon.
5 Kon ikaw usa ka batan-on o mas bag-ohang magmamantala ug imong nahisgotan ang paglaom sa Paraiso sa unang duaw, uban sa libro nga napakli sa panid 3, sa yano moingon:
◼ “Ang Bibliya nagasaad nga kadtong nagabuhat sa kabubut-on sa Diyos makalaom sa pagkinabuhi sa usa ka kalibotan nga sama niini. Kining libroha nakatabang kanako sa pagkat-on kon unsa ang kinahanglan nakong buhaton aron makapahimulos nianang panalangina. Buot nakong tabangan ka sa pagsabot kon unsaon nimo pagbuhat ang samang butang.” Ihanyag ang pagpasundayag sa atong pamaagi sa pagtuon.
6 Ingong mga tinun-an ni Jesus, kita may obligasyon sa pagtabang sa katawhan. (Roma 10:14) Kita adunay kaakohan sa pag-ugmad sa interes nga atong makaplagan. (Mat. 9:37, 38) Kon sa tukma tumanon nato kining buluhatona, ang tanan makaambit sa moresultang mga panalangin.—1 Tim. 4:16.