Karon Na ang Panahon
1 Sa dihang gisulat ni apostol Pablo ang iyang ikaduhang sulat ngadto sa taga-Corinto, siya nagpahinumdom kanila nga sila nagkauyon sa pagbuhat ug maayong buluhaton alang sa ilang isigka-magtutuo sa Jerusalem. Bisan pa niana, usa ka tuig na ang miagi, ug wala gihapon nila makompleto ang buluhaton nga nasugdan. Busa siya nag-awhag kanila: “Padayon ug humanon kana: magmatinguhaon sa pagkompleto sa laraw maingon sa inyong pagsagop niana.”—2 Cor. 8:11, The New English Bible.
2 Sa usa o sa laing panahon, kitang tanan nagbutang ug mga tumong sa atong kaugalingon. Hayan nahukman natong pauswagon ang atong pakig-ambit sa ministeryo sa kanataran, sa mas maayo pang pagsinati sa atong mga igsoon, sa pagkahimong takos sa usa ka pribilehiyo sa pag-alagad, o pagbuntog sa pipila ka kahuyangon. Bisan pag misugod kita uban ang maayong mga intensiyon, mahimong wala ta maningkamot aron makab-ot ang atong tumong. Una pa nato naamgohan kana, mga semana, mga bulan, o bisan mga tuig ang mahimong molabay nga wala kitay nahimong pag-uswag. Dili kaha nga gikinahanglan natong ipadapat sa atong kaugalingon ang tambag nga “padayon ug humanon” ang atong nasugdan?
3 Pagkab-ot sa Atong mga Tumong: Maoy sayon ang paghimog personal nga desisyon apan mas malisod ang pagpalampos sa atong tumong. Ang pag-unya-unya makasanta sa pag-uswag. Kinahanglang determinado ta nga mopadayon sa walay langan. Hinungdanon ang paggahin ug panahong gikinahanglan aron matuman ang buluhaton. Maoy maayo ang pagbutang ug tagal ug unya segurohon nga matuman kana.
4 Kon kita naapekhan sa pagpalampos sa atong mga tumong, maoy sayon ang pagpangatarongan: ‘Buhaton ko kana unya.’ Apan wala kita masayod kon unsay mahitabo ugma-damlag. Ang tinun-ang Santiago nagpasidaan: “Wala kamo mahibalo kon maunsa ang inyong kinabuhi ugma. . . . Kon ang usa mahibalo sa pagbuhat sa kon unsay maayo apan wala magabuhat niini, kini usa ka sala alang kaniya.”—Sant. 4:13-17.
5 Tungod sa daghan kaayong kabaldahan ug mga hangyo nga gihimo sa uban, ang atong mga tumong sayon rang mapasagdan. Ang matinguhaong panikaysikay kinahanglan aron mahuptan kana nga lab-as sa hunahuna. Ang pag-apil sa maong butang diha sa atong mga pag-ampo makatabang. Ang paghangyo sa uban sa pagpahinumdom ug pagdasig kanato hayan makaayo. Ang pagbutang ug timaan diha sa atong kalendaryo magpahinumdom kanato aron masusi ang atong pag-uswag. Ang usa ka tawo kinahanglang modesider sa “pagbuhat sumala sa iyang gikahukom diha sa iyang kasingkasing.”—2 Cor. 9:7.
6 Ang bulan sa Oktubre nagataganag maayong kahigayonan sa pagpunting sa atong mga tumong. Kita magatanyag sa mga suskrisyon sa Ang Bantayanang Torre ug Pagmata! Makapahimutang ba kitag makataronganong mga tumong nga pagakab-oton? Unsa na man ang pagsulay sa pagpauswag sa atong mga pagpahimutang sa magasin? Ang pagdesider sa paghimog dugang mga balikduaw ug pagsugod ug bag-ong pagtuon sa Bibliya maoy makataronganong mga tumong alang sa daghan.
7 Dili maalamon ang paglangan sa butang hinungdanon, tungod kay kining “kalibotana nagataliwan.” (1 Juan 2:17) Ang espesyal nga mga pribilehiyo mabatonan nato karon. Anaa ra kanato ang pagpahimulos niana.