Himoa ang Personal nga mga Tumong Alang sa Bag-ong Tuig sa Pag-alagad
1 Malipayon ka ba sa imong espirituwal nga mga tingusbawan? Maoy maayo nga padayong mouswag sa espirituwal, apan kini nagakinahanglan ug panikaysikay. Ang paghimog mga tumong alang sa atong kaugalingon ug sa atong mga pamilya makabulig. Ang usa ka tumong maoy sangkoanan sa panlimbasog nga gipunting. Aron makapahimuot kang Jehova, ang atong mga tumong kinahanglang mahauyon sa iyang kabubut-on. Busa, himoon ta ang panghunahuna ni Jehova nga maato mismo ug pangagpason ang teokratikanhong mga tumong, sama gayod sa gihimo ni Jesus. (Juan 17:4) Sa ingon atong matagamtam ang dakong kalipay ug katagbawan sa atong kinabuhi sa pag-alagad kang Jehova.—Juan 15:10, 11.
2 Unsang mga tumong ang naarangan mo sa pagkab-ot sa pagpauswag sa intereses sa Gingharian sa miaging tuig sa pag-alagad? Ang punto nga daghan ang nakakab-ot sa mga tumong nga ilang gipahimutang sa ilang kaugalingon makita man diha sa gidaghanon niadtong nabawtismohan. Usab, mga linibo ang nagpatala ingong katabang ug regular nga mga payunir. Ubay-ubay gayod ang mihikay sa pag-alagad sa lugar nga mas dako ang panginahanglan. Ang pipila sa mga igsoon nakakab-ot sa personal nga tumong sa dihang sila gidapit ngadto sa espesyal payunir o sa Bethel o sa trabaho sa konstruksiyon.
MGA TUMONG NGA MAHIMONG IMONG TAGDON
3 Aduna ba ing tukmang mga tumong nga hayan imong makab-ot? Aron ang mga bag-ohan makahimog maayong espirituwal nga progreso, ang pagkahimong regular diha sa pagtambong sa tigom ug sa pagduyog diha sa Teokratikanhong Ministeryong Tunghaan maoy maayo kaayong mga tumong. Kon ikaw panagsa ra nga mikomento sa mga tigom, nganong dili himoon kanang tumong nga magregular sa pagkomento? Ang uban makabenepisyo gikan sa imong pagtuon ug panukiduki, ug ang imo mismong panabot sa kamatuoran mapalig-on.—Heb. 10:24, 25.
4 Ikaw ba takos na sa pagsugod sa pakig-ambit sa ministeryo sa kanataran? Kanunay mo ba kanang ginabuhat? Nagabasa ka ba sa bag-ong mga basahon samtang kana giluwatan na, aron mopasignunot sa maayo kaayong instruksiyon gikan sa matinumanong ulipon? Kon imo na ugaling nakab-ot kining mga tumonga, nan di ba ang pahinungod ug bawtismo maoy hustong mga tumong alang kanimo sa pagtagad?
5 Nagadumala ka ba ug usa ka pagtuon sa Bibliya? Nag-ampo ka ba ug panabang nga makasugod ug usa ka pagtuon? Makugihon bang gibalik mo ang mga balikduaw, nga nagatanyag ug pagtuon uban sa mga tawong interesado nga imong mahibalag? Kon ang imong ginatun-an takos na sa pakig-ambit sa pag-alagad sa kanataran, imo ba siyang gibansay diha sa ministeryo?
6 Nagpahimutang ka bag tumong sa oras alang sa matag bulan? O ikaw misulay na sa buluhatong katabang nga pagpayunir? Tingali nga anaa ka na gani sa kahimtang nga makasugod sa pag-alagad ingong regular payunir, nga nagapaambit sa maayong balita sa uban sa 90 oras sa matag bulan. Moabot ang panahon, ikaw mahimong matagan-an sa espesyal nga pagbansay diha sa ‘Pioneer Service School.’ Ang mga igsoong lalaki kinahanglang magapangab-ot sa pribilehiyo sa pag-alagad ingong ministeryal nga mga alagad ug mga ansiyano.—1 Tim. 3:1.
7 Ang personal nga mga tumong nga atong himoon sa atong kaugalingon kinahanglang magpasuod kanato ngadto kang Jehova ug magpatugot kanato sa mas bug-os nga pakig-ambit sa pagbuhat sa iyang kabubut-on. Si Pablo miingon nga iyang “ginakalimtan ang mga butang nga nangagi na ug nagadasdas sa mga butang sa unahan.” Siya nagdasig kanato nga magbaton ug positibong tinamdan maylabot sa teokratikanhong mga pangagpas aron nga “sa gidak-on nga kita nakahimog kauswagan,” kita “mopadayon sa paglakaw nga mahapsay diha sa samang naandan.”—Filip. 3:13, 16.