Mga Batan-on—Unsa ang Inyong Espirituwal nga mga Tumong?
1 Si Jehova nasayod kon unsa ka importante ang makahuloganong trabaho ug makab-ot nga mga tumong sa pagpatunghag kalipay. (Tan-awa ang Genesis 1:28; 2:15, 19.) Karong adlawa, si Jehova naghatag sa iyang katawhan sa asaynment sa pagsangyaw ug pagtudlo. Kita usab may ultimang tumong sa pagkab-ot sa walay kataposang kinabuhi sa Paraiso. Sa kasamtangan, kinahanglang atong ipahimutang ang progresibong espirituwal nga mga tumong kon buot natong likayan nga masayang ang atong kusog ug kahinguhaan.—1 Cor. 9:26.
2 Realistikong mga Tumong Alang sa mga Batan-on: Ang mga batan-on angayng magbaton ug teokratikanhong mga tumong nga maabot sumala sa ilang indibiduwal nga mga katakos. (1 Tim. 4:15) May pipilang bata pa kaayo ang nakakab-ot sa tumong sa pagsag-ulo sa mga libro sa Bibliya una pa gani silang maantigong mobasa. Pinaagig pagtuon sa pamilya, ang mga bata makakat-on sa pagpangandam sa mga tigom aron ilang makab-ot ang mga tumong sa paghimog makahuloganong mga komento ug pagpatala sa Tunghaan sa Teokratikanhong Ministeryo. Samtang ang mga bata mokuyog sa ilang mga ginikanan diha sa pag-alagad sa kanataran, sila makakat-on sa pagpakig-ambit sa pagsangyaw ug pag-uswag ngadto sa tumong nga mahimong di-bawtismadong mga magmamantala. Kinahanglang ibutang kanunay sa mga ginikanan atubangan sa ilang batan-ong mga anak ang tumong sa dedikasyon ug bawtismo.
3 Kon ikaw usa ka tin-edyer, unsay nalakip sa imong espirituwal nga mga tumong? “Hinumdomi, karon, ang imong Dakong Maglalalang” pinaagig pagpunting sa tinuod importanteng mga tumong sa kinabuhi. (Eccl. 12:1; Sal. 71:17) Nganong dili mag-oksilyare payunir atol sa tingbakasyon sa tunghaan o sa ubang mga panahon? Imo bang napamalandong na ang pagkuhag bug-os-panahong ministeryo ingong regular payunir? Komosta man ang pagkat-on ug bag-ong pinulongan aron nga sa umaabot makatabang ka ug mga indibiduwal o mga kongregasyon nga nagagamit sa maong pinulongan? Daghan nga nagaalagad karon sa Bethel o ingong nagapanawng mga magtatan-aw o mga misyonaryo naghimo sa espesyal bug-os-panahong pag-alagad ingong ilang tumong niadtong nagtungha pa sila. Nganong dili buhaton ang sama niana sa imong kaugalingon?
4 Samtang linghod pag edad, paningkamot sa pagsundog sa panig-ingnan ni Jesus. Bisan sa batan-ong edad nga 12, libre siyang nakigsulti bahin sa espirituwal nga mga butang. (Luc. 2:42-49, 52) Ang pagpahilunag makaayong mga tumong sa imong kaugalingon aron sa paghimog personal nga pagtuon, pagbasa sa Bibliya adlaw-adlaw, ug regular nga pagpakig-uban duyog sa hamtong nga mga Kristohanon diha sa mga tigom ug sa kanataran makatabang kanimong maangkon ang katakos sa pagtudlo sa uban bahin sa Gingharian sa Diyos sa paaging gihimo ni Jesus.