Gamita ang Espirituwal nga mga Tumong sa Paghimaya sa Imong Maglalalang

“KON ang usa ka tawo wala mahibalo kon haing dunggoanan siya nagpadulong, dili hinungdanon kon asa mohuyop ang hangin.” Kining mga pulonga, nga gituohang gisulti sa usa ka Romanong pilosopo sa unang siglo, nagpamatuod sa dugay-nang-giila nga kamatuoran nga aron adunay direksiyon ang kinabuhi, ang mga tumong kinahanglanon.

Ang Bibliya adunay mga panig-ingnan sa mga tawo nga maikagon sa pagkab-ot ug mga tumong. Naghago sulod sa mga 50 ka tuig, si Noe “nagtukod ug arka aron sa pagluwas sa iyang panimalay.” Ang manalagnang si Moises ‘nagtutok ngadto sa pagbayad sa ganti.’ (Hebreohanon 11:7, 26) Ang manununod ni Moises, si Josue, adunay hinatag-sa-Diyos nga tumong sa pag-ilog sa yuta sa Canaan.—Deuteronomio 3:21, 22, 28; Josue 12:7-24.

Sa unang siglo K.P., ang espirituwal nga mga tumong ni apostol Pablo walay duhaduhang naimpluwensiyahan gayod sa mga pulong ni Jesus nga “kining maayong balita sa gingharian igawali sa tibuok gipuy-ang yuta.” (Mateo 24:14) Kay napalihok tungod sa mga mensahe ug mga panan-awon gikan ni Ginoong Jesus, lakip na sa gitudlo kaniya nga buluhaton sa ‘pagdala sa ngalan ni Jesus ngadto sa tanang kanasoran,’ si Pablo nakatabang sa pagtukod ug daghang Kristohanong kongregasyon latas sa Asia Minor ug sa Uropa.—Buhat 9:15; Colosas 1:23.

Sa pagkatinuod, ang mga alagad ni Jehova latas sa kasaysayan naghimog hamiling mga tumong ug nakakab-ot niana, sa kahimayaan sa Diyos. Unsaon nato paghimog espirituwal nga mga tumong karong adlawa? Unsa ang puwede natong himoong mga tumong, ug unsa ang praktikal nga mga paagi sa pagkab-ot niana?

Hinungdanon ang Hustong mga Motibo

Makahimo kitag mga tumong sa bisan unsang kalihokan sa kinabuhi, ug adunay mga tawo sa kalibotan karon nga maikagon sa pagkab-ot ug mga tumong. Hinunoa, ang teokratikanhong mga tumong lahi sa kalibotanong mga ambisyon. Ang pangunang motibo sa daghang tumong sa kalibotan mao ang sobrang tinguha sa bahandi ug mahakogon nga pangandoy alang sa kadungganan ug gahom. Sayop gayod nga himoong tumong ang pagkahimong gamhanan ug inila! Ang mga tumong nga maghatag ug himaya kang Jehova nga Diyos mao kadtong direktang nalangkit sa atong pagsimba kaniya ug sa intereses sa Gingharian. (Mateo 6:33) Ang maong mga tumong nagsumikad sa gugma alang sa Diyos ug sa isigkatawo ug ang katuyoan niini mao ang pagbaton ug diyosnong pagkamahinalaron.—Mateo 22:37-39; 1 Timoteo 4:7.

Hinaot nga putli ang atong mga motibo samtang atong himoon ug kab-oton ang espirituwal nga mga tumong, kini man maoy pagkab-ot ug dugang mga pribilehiyo sa pag-alagad o sa pagpauswag sa atong espirituwalidad. Apan, bisan ang maayog-tuyo nga mga tumong dili usahay matuman. Unsaon nato paghimog mga tumong ug mapauswag ang purohan nga makab-ot kana?

Hugot nga Tinguha Gikinahanglan

Tagda kon giunsa ni Jehova pagpalampos ang paglalang sa uniberso. Uban sa mga pulong nga “dihay kagabhion ug dihay kabuntagon,” si Jehova naglatid ug mga utlanan sa sunodsunod nga mga yugto sa paglalang. (Genesis 1:5, 8, 13, 19, 23, 31) Sa sinugdanan sa matag yugto sa paglalang, nahibalo gayod siya sa iyang tumong, o katuyoan, alang nianang yugtoa. Ug napalampos sa Diyos ang iyang katuyoan sa paglalang sa mga butang. (Pinadayag 4:11) ‘Ang kalag ni Jehova may gitinguha, ug iyang buhaton kini,’ matod sa patriarkang si Job. (Job 23:13) Natagbaw gayod si Jehova sa pagtan-aw sa “tanan nga iyang gibuhat” ug miingon nga kadto “maayo kaayo”!—Genesis 1:31.

Aron makab-ot ang atong mga tumong, kinahanglang aduna usab kitay dakong tinguha sa pagkab-ot niana. Unsay motabang kanato nga maugmad kanang hugot nga tinguha? Bisag ang yuta wala pay porma ug awaaw, gipanan-aw na ni Jehova ang kataposang resulta—usa ka nindot nga mutya sa kawanangan, nga maghatag ug kahimayaan ug pasidungog kaniya. Sa samang paagi, maugmad nato ang tinguha sa pagkab-ot sa atong giplano nga himoon pinaagi sa pagpalandong sa mga resulta ug mga kaayohan nga mabatonan gumikan sa pagkab-ot sa maong tumong. Mao kanay gihimo sa 19-anyos nga si Tony. Wala gayod siya malimot sa iyang unang impresyon sa dihang miduaw siya sa usa ka sangang buhatan sa mga Saksi ni Jehova sa Kasadpang Uropa. Sukad niadto, ang pangutana nga kanunayng gihunahuna ni Tony maoy, ‘Sama kaha sa unsa ang pagpuyo ug pag-alagad niadtong dapita?’ Si Tony wala gayod mohunong sa paghunahuna sa maong posibilidad, ug nagpadayon siya sa pagpangab-ot niana. Nalipay gayod siya sa dihang daghang tuig sa ulahi ang iyang aplikasyon sa pag-alagad sa sanga naaprobahan!

Ang pagpakig-uban niadtong nakakab-ot na sa usa ka partikular nga tumong makapukaw usab sa atong tinguha sa pagkab-ot niana. Si Jayson, nga nag-edad ug 30, dili kaayo ganahang makig-ambit sa pagsangyaw sa kanataran sa dihang binatilyo pa siya. Apan sa dihang natapos siya sa hayskul, siya maikagong misulod sa buluhatong pagpayunir, sa ingon nahimong bug-os-panahong magmamantala sa Gingharian. Unsay nakatabang kang Jayson nga maugmad ang tinguha sa pagpayunir? Siya miingon: “Ang pagpakig-estorya sa mga payunir ug ang pagpakig-uban kanila sa pagsangyaw dakog impluwensiya kanako.”

Makatabang ang Pagsulat sa Atong mga Tumong

Ang usa ka hanap nga ideya mahimong tin-aw ug klaro sa dihang ato kanang ipadayag pinaagig mga pulong. Si Solomon misulat nga ang hustong mga pulong mahimong sama ka gamhanan sa mga igtutugsok sa baka sa paghatag ug direksiyon sa kinabuhi. (Ecclesiastes 12:11) Sa dihang isulat nato ang atong mga tumong, kini masilsil pag-ayo sa atong hunahuna ug kasingkasing. Dili ba mao kanay hinungdan nga gisugo ni Jehova ang mga hari sa Israel sa pagsulat ug kaugalingong kopya sa Balaod? (Deuteronomio 17:18) Busa basin buot natong isulat sa papel ang atong mga tumong ug ang paagi sa pagkab-ot niana, nga maglista sa mga kababagan nga atong gidahom nga maagoman lakip na sa mga paagi sa pagbuntog niana. Makatabang usab ang pag-ila sa mga butang nga angay natong mahibaloan pag-ayo, mga kahanas nga angay natong batonan, ug ang mga tawo nga makatabang ug makapaluyo kanato.

Ang pagbaton ug espirituwal nga mga tumong nakahatag ug kahupayan kang Geoffrey, nga usa ka dugay nang espesyal payunir diha sa hilit nga teritoryo sa usa ka nasod sa Asia. Naguol kaayo siya sa dihang kalit nga namatay ang iyang asawa. Sa dihang medyo naulian na, si Geoffrey mihukom sa pagkugi pag-ayo diha sa iyang buluhatong pagpayunir pinaagi sa paghimog mga tumong. Sa dihang nalista na niya sa papel ang iyang mga plano, siya mainampoong naningkamot nga makabaton ug tulo ka bag-ong pagtuon sa Bibliya una matapos ang bulan. Kada adlaw, iyang gisusi ang iyang kalihokan, ug matag napulo ka adlaw, gitan-aw niya ang iyang pag-uswag. Nakab-ot ba niya ang iyang tumong? Kay nakataho ug upat ka bag-ong pagtuon sa Bibliya, siya malipayong mitubag ug oo!

Himoa ang Daling-Makab-ot nga mga Tumong Ingong mga Timaan

Ang ubang mga tumong daw lisod kab-oton sa sinugdan. Alang kang Tony, nga gihisgotan ganina, ang pag-alagad sa sangang buhatan sa mga Saksi ni Jehova daw imposible kaayong mahitabo. Tungod kana kay salawayon ang iyang paagi sa kinabuhi, ug wala pa gani siya makapahinungod ngadto sa Diyos. Apan nakahukom si Tony sa pagpahiuyon sa iyang kinabuhi sa dalan ni Jehova ug gihimo niyang tumong nga makuwalipikar sa bawtismo. Human mabawtismohi, gihimo niya nga tumong ang pag-oksilyare payunir ug pagregular payunir, nga gimarkahan ang mga petsa sa iyang kalendaryo kon kanus-a niya kana sugdan. Human makapayunir ug dugayng panahon, ang pag-alagad sa sangang buhatan dili na morag imposible nga tumong.

Maalamon usab nga bahinon nato ang atong dugayng-makab-ot nga mga tumong ngadto sa pipila ka daling-makab-ot nga mga tumong. Ang daling-makab-ot nga mga tumong magsilbing mga timaan sa dalan nga maabot nato samtang manlimbasog kita sa pagkab-ot sa dugayng-makab-ot nga tumong. Ang regular nga pagsusi sa atong pag-uswag pinaagi niining mga timaan sa dalan makatabang kanato sa pagsentro sa atong pagtagad diha sa atong tumong. Ang makanunayong pag-ampo kang Jehova bahin sa atong mga plano makatabang usab kanato nga dili mahitipas. “Pag-ampo nga walay-hunong,” nag-awhag si apostol Pablo.—1 Tesalonica 5:17.

Determinasyon ug Pagkamalahutayon Gikinahanglan

Bisan pa sa atong maayo nga pagplano ug hugot nga tinguha sa pagkab-ot niana, ang pipila ka tumong dili gihapon maabot. Lagmit nahigawad ang tinun-ang si Juan Marcos sa dihang wala siya iuban ni apostol Pablo sa ikaduhang misyonaryong panaw ni Pablo! (Buhat 15:37-40) Si Marcos kinahanglang mokat-on gikan niini nga kapakyasan ug mohimog pagpasibo sa iyang tumong alang sa dugang pag-alagad. Gihimo gayod niya kana. Sa ulahi, si Marcos positibo nga gihisgotan ni Pablo ug suod nga nakapakig-uban kang apostol Pedro sa Babilonya. (2 Timoteo 4:11; 1 Pedro 5:13) Ang kinadak-an tingali niya nga pribilehiyo mao ang pagsulat sa dinasig nga asoy sa kinabuhi ug ministeryo ni Jesus.

Sa pagpangagpas nato ug espirituwal nga mga tumong, lagmit nga makaagom usab kitag mga kapakyasan. Inay kay mohunong, kinahanglang panid-an nato ang atong pag-uswag, susihon kon posible ba nga makab-ot kana, ug mohimog mga pagpasibo. Kon motungha ang mga babag, kinahanglang maningkamot kita nga mouswag uban ang determinasyon ug pagkamalahutayon. “Itugyan ang imong mga buhat kang Jehova ug ang imong mga plano mahimong lig-on,” ang maalamong Haring Solomon nagpasalig kanato.—Proverbio 16:3.

Apan, usahay, tungod sa mga sirkumstansiya, imposibleng kab-oton ang pipila ka tumong. Pananglitan, ang dili-maayong panglawas o mga obligasyon sa pamilya mopugong kanato sa pagkab-ot sa pipila ka tumong. Hinaot nga dili gayod nato kalimtan nga ang kinalabwan natong tumong mao ang kinabuhing dayon—sa langit man o sa Paraiso sa yuta. (Lucas 23:43; Filipos 3:13, 14) Sa unsang paagi nato mabatonan kana? “Siya nga nagabuhat sa kabubut-on sa Diyos magpabilin hangtod sa kahangtoran,” misulat si apostol Juan. (1 Juan 2:17) Bisan tuod dili tingali nato makab-ot ang usa ka tumong tungod sa atong kahimtang, mahimo gihapon natong ‘kahadlokan ang matuod nga Diyos ug tumanon ang iyang mga sugo.’ (Ecclesiastes 12:13) Ang espirituwal nga mga tumong motabang kanato sa pagsentro sa atong pagtagad sa pagbuhat sa kabubut-on sa Diyos. Busa, gamiton nato kana sa paghimaya sa atong Maglalalang.

[Kahon sa panid 22]

Espirituwal nga mga Tumong nga Angayng Tagdon

○ Pagbasa sa Bibliya adlaw-adlaw

○ Pagbasa sa matag gula sa Ang Bantayanang Torre ug Pagmata!

○ Pagpauswag sa kalidad sa atong mga pag-ampo

○ Pagpasundayag sa mga bunga sa espiritu

○ Pagkab-ot ug dugang pribilehiyo sa pag-alagad

○ Pagkahimong mas epektibo sa pagsangyaw ug pagpanudlo

○ Pag-ugmad sa katakos sa pagsangyaw sa telepono, sa di-pormal nga paagi, ug sa negosyohanan