Balika ang Tanang Kaikag Aron Mabenepisyohan ang Uban
1 Sa dihang adunay nagapakita ug bisan gamay nga interes sa mensahe sa Gingharian, buot natong buhaton kon unsa ang atong maarangan sa ikaayo sa maong tawo. Busa ginahimo nato ang mga balikduaw uban sa tumong sa pag-ugmad sa kaikag sa maong tawo ug masugdan ang pagtuon sa Bibliya sa balay. Unsaon kini sa paghimo?
2 Kon ang miagi ninyong panaghisgot maoy bahin sa pagdagsang sa mga problema sa magtiayon karong adlawa ug ikaw nakabilin sa “Mabuhing Walay Kataposan” nga libro, mahimong imong buksan ang inyong panaghisgot niining paagiha:
◼ “Sa miaging panahon, atong nahisgotan ang bahin sa kaminyoon ug ang praktikal nga tambag sa Bibliya nga makatabang nato sa pagkaplag ug mas labaw nga kalipay. Dili ba tinuod nga bisan diha sa labing maayong mga pamilya, ang mga problema motungha sa ngadto-ngadto? [Tugoting motubag.] Ang Bibliya nagahatag kanato ug bililhong tambag nga makatabang nato sa pagsulbad sa mga problema sa mga relasyong pangpamilya. Ang usa ka pamilya mahimong mapanalanginan pinaagi sa duyog nga pagtuon sa Bibliya.” Paklia ang panid 246, parapo 23. Basaha ang Juan 17:3, ug itanyag ang imong pagtabang sa maong pamilya sa pagsugod ug pagtuon sa Bibliya.
3 Kon ikaw nakahisgot bahin sa kabataan ug sa ilang panginahanglan sa pagbansay, mahimong imong ipadayon ang panaghisgot niining paagiha:
◼ “Sa miagi atong nahisgotan ang bahin sa espirituwal nga pagbansay nga gikinahanglan sa kabataan ug sa unsang paagi ang mga ginikanan makahimo sa pagtabang kanila. Daghang ginikanan nalisang maylabot sa daotang gawi sa daghan kaayong kabatan-onan karong adlawa. Unsa ang imong hunahuna bahin sa ... ? [Maghisgot ug usa ka ehemplo sa di-maayong panggawi sa batan-on nga kasagarang namatikdan sa inyong komunidad. Tugoting motubag.] Tugoti ko nga ipakita nimo ang pipila sa praktikal nga tambag nga gihatag sa Bibliya.” Paklia ang parapo 22 sa panid 246 diha sa Mabuhing Walay Kataposan nga libro, basaha ang Efeso 6:4. Kadaghanan sa kabataan nagatinguha ug disiplina ug giya. Sa dihang itagana kini sa mga ginikanan, ang kabataan mas malipayon ug mas matinahoron. Ipatin-aw kon giunsa nato sa pagtuon ang Bibliya uban sa atong kabataan.
4 Kon ang ulohan sa inyong nahisgotan mao ang Paraisong yuta, nan mahimong ikasulti nimo kini sa paghaling pag-usab sa interes:
◼ “Atong natan-aw ang pipila ka ilustrasyon nga nagpakita kanato kon sama sa unsa unya ang yuta sa dihang ang Diyos maghimo na niana nga usa ka paraiso. Kana unya dili makahuloganon kanato kon dili nato kana mapahimuslan kauban sa atong mga minahal. Dili ba?” [Tugoting motubag.] Paklia sa panid 162 sa Mabuhing Walay Kataposan nga libro. Basaha ang Pinadayag 21:3, 4, ug ipatin-aw kon unsaon nga ang atong mga minahal mahimong padayong magauban kanato. Kon adunay maayong sanong, basaha ang Juan 5:28, 29 sa pagpakita nga ang minatay mabuhi pag-usab. Ipunting ngadto sa tabon sa libro ug moingon: “Tinuod gayod kini—kita mahimong mabuhi sa walay kataposan sa Paraiso sa yuta!” Hikaya ang pagbisita pag-usab.
5 Ang katuyoan sa usa ka balikduaw mao ang pagtabang sa mga interesado nga makabenepisyo gikan sa mensahe sa Gingharian. Ipunting ang ilang pagtagad sa espisipikong mga puntos sa praktikal nga bili diha sa literatura, nga nagapasiugda kon sa unsang paagi kini makatabang kanila sa mas maayong pagsabot sa Bibliya. Ang mga balikduaw nga nagapalampos niining mga tumonga makatabang sa uban nga makabenepisyo sa ilang kaugalingon sa labing maayong paagi nga maarangan.