Tabangi ang Uban sa Pagkuhag Kaayohan sa Ilang Kaugalingon
1 Si Jehova nagatudlo kanato kon unsa ang gikinahanglan natong mahibaloan. Ang Salmo 32:8 nagaingon: “Ako magapahinabo kanimo nga makabaton ug panabot ug igatudlo ko kanimo ang dalan nga imong pagalaktan. Ihatag ko ang tambag uban ang akong mata diha kanimo.” Gusto natong ipakita sa uban kon unsaon nga sila makakuhag kaayohan sa ilang kaugalingon pinaagi sa pagsunod sa maalamong tambag gikan sa Bibliya. (Isa. 48:17) Sa Septiyembre atong mahimo kini pinaagig pagtanyag sa Mabuhing Walay Kataposan nga libro. Ang nagakadaiyang presentasyon mahimong makapakita sa praktikal nga bili sa Bibliya.
2 Tungod sa pagdagsang sa mga problema sa kaminyoon karong adlawa, hayan pilion mo nga ipatugbaw kining hunahunaa gikan sa “Mabuhing Walay Kataposan” nga libro:
◼ “Karong adlawa daghan ang nabalaka kaayo bahin sa talagsaong pag-uswag sa di-malipayong panagtiayon. Unsa ang imong pagbati niining problemaha? [Tugoting motubag.] Daghan ang wala makasabot sa sukaranang mga hinungdan. Kon ilang himoon ang sinserong mga paningkamot, dili lamang maluwas sa mga magtiayon ang ilang kaminyoon kondili ilang makaplagan ang tiunay nga kalipay usab. Ang yawi makaplagan diha sa Bibliya.” Basaha ang Efeso 5:28, 29, 33. Paklia sa panid 243, hisgoti ang mga parapo 16 ug 17.
3 Ang mga kabataan nanginahanglan ug de-kalidad nga panahon ug pagbansay gikan sa ilang mga ginikanan. Sa pagpunting sa “Mabuhing Walay Kataposan” nga libro, ikaw makaingon:
◼ “Kitang tanan nabalaka bahin sa umaabot nga kaayohan sa atong kabatan-onan. Sa imong opinyon, unsa ang labing maayong paagi nga ang mga ginikanan makatabang sa ilang kabataan sa pagkaplag ug seguradong kaugmaon? [Tugoting motubag.] Paminawa kining usa ka panultihon sa Bibliya. [Basaha ang Proverbio 22:6.] Sa pagkatinuod, ang ilang labing bililhong pagbansay ginatagana diha sa balay pinaagi sa ilang mga ginikanan. Kini nanginahanglan ug panahon, pagtagad, ug gugma, apan takos kaayo ang paningkamot.” Paklia sa panid 245, hisgoti ang mga parapo 20 ug 21, unya isaysay sa unsang paagi ang libro mahimong gamiton ingong basehanan alang sa pamilyahanong pagtuon sa Bibliya.
4 Basin buot nimong itanyag ang “Mabuhing Walay Kataposan” nga libro pinaagi sa pagpakita sa unsang paagi ang yuta mahimong usa ka paraiso:
◼ “Nakaseguro ako nga ikaw nabalaka kon unsa na unya ang imong kinabuhi sa umalabot. Diha sa Pag-ampo sa Ginoo, si Jesus nagtudlo kanto sa pag-ampo alang sa kabubut-on sa Diyos nga matuman dinhi sa yuta maingon sa langit. Unsa na man unya ang kahimtang sa yuta sa dihang kana mahitabo na? [Tugoting motubag.] [Gamita ang ilustrasyon sa mga panid 12 ug 13. Basaha ang Isaias 11:6-9.] Dili ba makapahingangha nga magpuyo nianang matanga sa kalibotan? Kining libroha nagapakita kon unsaon nimo ug sa imong pamilya nga makapuyo sa usa ka paraiso nga sama niini.”
5 Ang pag-andam sa imong presentasyon nga abante mao ang yawing pasikaranan sa pagtino sa imong kalamposan diha sa pultahan. Tinoa nga ikaw adunay usa ka espisipikong igsusulti bahin sa usa ka Kasulatanhong hunahuna. Usab, andamon sa hunahuna ang usa ka mubo nga komento bahin sa makapaikag nga puntos sa magasin o tract nga imong giplanong itanyag kon ang libro dili dawaton. Pahimusli ang tanang kahigayonan nimo sa pagsabwag sa mga binhi sa kamatuoran sa Gingharian sa Septiyembre. (Eccl. 11:6) Imong matabangan ang uban sa pag-ani ug mga kaayohan nga magpabilin sa walay kataposan.