Sangyaw Uban ang Pag-ila
1 Aron mahuptan ang pag-ila nagakinahanglan nga aduna kitay masabtan bahin sa mga tawo nga atong ginasangyawan. Ngano? Tungod kay ang atong kalamposan sa pag-abot sa mga kasingkasing sa katawhan nagadepende sa atong katakos sa pagtanyag sa mensahe sa Gingharian diha sa paagi nga makabutad kanila. Sa bulan sa Enero, atong itanyag ang librong Pagpangita sa Katawhan sa Diyos, o ang librong Matuod nga Kalinaw ug Kasegurohan—Sa Unsang Paagi Imong Makaplagan? Ang mosunod nga mga sugyot hayan mapuslanon.
2 Sa dihang itanyag ang librong “Pagpangita sa Katawhan sa Diyos,” ikaw makasugod pinaagi sa pag-ingon:
◼ “Makapainteres ang paghibalag sa mga tawo sa lainlaing mga relihiyon. Pero wala mo ba mamatikdi nga kadaghanan sa mga tawo tagbaw na gayod sa relihiyon sa ilang mga ginikanan inay kay sa pagpangita sa Diyos sa ilang kaugalingon? [Tugoting mokomento.] Kining libroha, Pagpangita sa Katawhan sa Diyos, nagasusi sa mga pagtulon-an sa dagkong mga relihiyon ug nagatandi niini uban sa Bibliya. Matikdi kining lima ka pangutana dinhi sa panid 17, parapo 28, nga makabulig kanato sa pagsusi sa atong mga pagtulon-an nga tinandi sa Bibliya.” Sa mubo basaha ang mga pangutana ug dayon dapita ang tagbalay nga kuptan ang libro ug sa personal susihon kining mga pangutanaha. Isulti nga mobalik ka para sa dugang panaghisgot.
3 O, human sa pagpaila sa imong kaugalingon, makaingon ka:
◼ “Tungod sa daghan kaayong relihiyon karong adlawa, nahibulong ka ba gayod kon sa unsang paagi maseguro ta kon ang atong relihiyon giuyonan sa Diyos?” Human sa mga komento sa tagbalay, paklia ngadto sa panid 377 sa Pagpangita sa Katawhan sa Diyos nga libro ug ipakita ang napulo ka paagi nga niana kita makaila sa matuod nga relihiyon. Dad-a ang pagtagad ilabina ngadto sa puntos numero 6, ug basahang Miqueas 4:2-4. Dayon suknaa ang tagbalay kon pila sa mga relihiyon ang nakakab-ot niining kinahanglanona karong adlawa. Itanyag ang libro aron iyang masusi ug hikaya nga mobalik sa dugang paghisgot niining butanga.
4 Daghan ang nakakaplag nga ang yanong pagpakli ngadto sa usa ka kapitulo sa Pagpangita sa Diyos nga libro nga nagahisgot sa relihiyon sa tagbalay makabulig sa pagdakop sa iyang pagtagad. Hayan buot mong sulayan kini ilabina uban sa mga di-Kristohanon.
5 Kon palabihon mo ang pagtanyag sa librong “Matuod nga Kalinaw ug Kasegurohan—Sa Unsang Paagi Imong Makaplagan?” imong mapunting ngadto sa ilustrasyon sa panid 4 ug moingon:
◼ “Kining ilustrasyona nagahulagway kon unsa ang gitudlo sa Bibliya maylabot sa katuyoan sa Diyos alang sa yuta. Unsa sa hunahuna mo ang gikinahanglan alang kanimo ug sa imong banay aron makapuyo diha sa paraisong yuta? [Tugoting motubag.] Ang Bibliya nagapakita nga ang matuod nga kalinaw ug kasegurohan sa di-madugay mahitabo gayod sa tibuok nga yuta ug ang Paraiso igapasig-uli. [Basahang Salmo 37:10, 11.] Kining libroha makapakita kanimo kon unsa ang imong gikinahanglang buhaton aron makabenepisyo sa pagabuhaton sa Diyos. Gusto ko nga ibilin kining kopyaha kanimo.”
6 Ang maayong panabot makapaarang kanato sa pag-ila sa mga panginahanglan ug mga interes sa katawhan nga atong mahibalag. Nagapasalig kanato niini ang Proverbio 16:23, sa pag-ingon: “Ang kasingkasing sa manggialamon nagapahinabo sa iyang baba sa pagpakitag pag-ila, ug ngadto sa iyang mga ngabil kini nagadugang ug pagkamadanihon.”