Pagkuhag Kaayohan Gikan sa Tunghaan sa Teokratikanhong Ministeryo sa 1996—Bahin 1
1 Imo bang nabasa ang mga instruksiyon nga anaa sa “Theocratic Ministry School Schedule for 1996”? Gimatikdan mo ba ang pipila sa mga kausaban? Gikan sa Enero hangtod sa Abril, ang Assignment No. 3 ipasukad sa librong Nangatarongan, ug gikan sa Mayo hangtod sa Disyembre, kana ipasukad sa bag-ong giluwatang librong Kahibalo. Ang Assignment No. 4 maoy usa ka pakigpulong bahin sa lainlaing karakter sa Bibliya sa matag semana.
2 Mga Asaynment sa Estudyante: Ang Assignment No. 3 igahatag ngadto sa igsoong babaye. Kon kana ipasukad sa librong Nangatarongan, ang tagboan (setting) kinahanglang sa pamalaybalay o di-pormal nga pagsangyaw. Sa dihang gibase sa librong Kahibalo, kana gayod ipresentar ingong balikduaw o usa ka pagtuon sa Bibliya sa balay. Kini gayod mapamatud-ang mapuslanon, kay ang librong Kahibalo gamiton man nga malangkobon alang sa pagdumalag mga pagtuon sa Bibliya sa balay.
3 Kon ang tagboan maoy usa ka pagtuon sa Bibliya sa balay, ang duha ka sister mahimong manglingkod. Modiretso ngadto sa pagtuon pinaagig paghimog mubong pasiunang mga komento, ug dayon isukna ang napatik nga pangutana. Ang papel nga gidula sa tagbalay kinahanglang matinuoron. Ang gisitar nga mga teksto matan-aw man ug basahon segon sa itugot sa panahon. Himoon gayod sa sister ang arte sa pagpanudlo pinaagig mga pangutana nga makapatugbaw ang tagbalay ug pinaagig pangatarongan sa mga teksto nga gigamit.
4 Unsa may angayng buhaton kon adunay dugang mga teksto nga gisitar diha sa asaynment kay sa mahisgotan sa lima ka minutos? Pilia ang yawing mga teksto nga nagapasiugda sa lintunganayng mga puntos. Kon aduna lamang ing pipila ka kasulatan, ang dagkong puntos diha sa leksiyon mahimong mahisgotan nga mas malangkobon. Usahay, ang usa ka parapo o usa ka tudlingpulong gikan sa libro mahimong basahon ug unya hisgotan uban sa tagbalay.
5 Ang kahon nga nag-ulohang “Pagtigi sa Imong Kahibalo,” nga anaa sa kataposan sa matag kapitulo sa librong Kahibalo, mahimong sa mubo sublion sa magmamantala kansang asaynment nagakobre sa kataposang parapo sa maong kapitulo. Ang mga kahon sa impormasyon nga anaa sa sulod sa naasayn nga mga parapo mahimong hisgotan usab segon sa itugot sa panahon. Kon ang kahon sa impormasyon anaa sa tali sa duha ka parapo, ang sister nga nagadumala sa unang asaynment mahimong motagad niana. Ang mga ilustrasyon nga anaa sa libro mahimong komentohan sa dihang kini mapadapat ngadto sa materyal nga ubos sa pagtagad.
6 Ang Assignment No. 4 kinahanglang makapainteres pag-ayo ug praktikal. Sa kada semana kini magtagad ug tinuod-kinabuhi nga ehemplo—usa ka karakter sa Bibliya. Mabinantayong tun-an kon unsa ang giingon sa Insight, Tomo 1, maylabot sa maong naasayn nga karakter sa Bibliya. Tagika ang pahayag palibot sa ulohan, ug pilia ang yawing mga teksto sa Bibliya nga moabag sa tigpaminaw nga puntingon ang maong karakter sa Bibliya ug ang iyang personalidad, apil ang mga kinaiyahan, mga hiyas, o mga hilig nga gusto tang sundogon o isalindot. Ang mga kasulatan nga walay laktod nga kalabotan sa maong karakter sa Bibliya mahimo mang ilakip kon kini nagapasiugda sa paagi sa pangisip ni Jehova sa pipila ka maayo o daotang mga kinaiya o kon kini maylabot sa tema sa maong pahayag.
7 Kon pahimuslan ta gayod ang pagbansay nga gitagana diha sa tunghaan, kita mas pang makaarang sa ‘pagwali sa pulong’ diha sa paagi nga nagapasundayag sa maayong “arte sa pagpanudlo.”—2 Tim. 4:2.