Pagkuhag Kaayohan Gikan sa 1999 nga Programa sa Tunghaan sa Teokratikanhong Ministeryo
1 Si Jesus mao ang Batid nga Magtutudlo. Ang mga tawo “nahingangha sa iyang paagi sa pagpanudlo.” (Mar. 1:22) Bisan tuod walay usa kanato ang makasulti ug makatudlo sama ka maayo sa gihimo ni Jesus, kita makapaningkamot sa pagsundog kaniya. (Buh. 4:13) Sa pagkab-ot nianang tumonga, ang atong pagpakig-ambit sa programa sa Tunghaan sa Teokratikanhong Ministeryo motabang nato sa pagpadayon sa pag-uswag sa atong mga katakos sa pagpanulti ug pagpanudlo.
2 Sa 1999, ang Asaynment Num. 1 ipasukad ilabina sa mga artikulo gikan sa 1997 nga Bantayanang Torre ug Pagmata! nga mga magasin. Ang atong pagsabot sa espirituwal nga mga butang mapalambo pag-ayo kon atong basahon kining impormasyona nga abante ug dayon patalinghogan kana sa programa sa tunghaan. Kadtong gitudlo sa paghatag niining nagatudlong mga pakigpulong kinahanglang maghimog praktikal nga kapadapatan sa materyal, nga magpresentar niana sa makapaikag ug buhi nga paagi. Ang Asaynment Num. 3 ipasukad sa Kalipay sa Pamilya nga libro, ug ang Asaynment Num. 4, diha sa usa ka karakter sa Bibliya, bisan tuod ang tinubdang materyal mahimong magbansiliay alang niini nga mga asaynment. Ang magtatan-aw sa tunghaan angayng maghatag ug mainampingong pagtagad sa materyal una pa iasayn ang mga bahin. Ang tanang estudyante nga natudlong mohatag sa materyal gikan sa Kalipay sa Pamilya nga libro kinahanglang sulondan sa ilang kaugalingong pamilyahanong kinabuhi.
3 Ipabapat ang Tambag, ug Panganbam Pag-ayo: Ang matag usa makahimog dugang pag-uswag diha sa arte sa pagpanulti ug pagpanudlo. (1 Tim. 4:13) Busa, kita kinahanglang mangayog tambag ug dili gayod isipon kana ingong butang nga pagalikayan. (Prov. 12:15; 19:20) Ang pagpresentar sa kamatuoran sa epektibong paagi diha sa mga tigom ug diha sa ministeryo sa kanataran nanginahanglag labaw pa kay sa pag-asoy lamang sa mga kamatuoran o pagbasa sa mga kasulatan diha sa naandang paagi. Kinahanglang atong abton ang mga kasingkasing ug palihokon kadtong maminaw kanato. Mahimo nato kini pinaagi sa pagsulti sa kamatuoran sa makapakombinsir nga paagi gikan sa atong kasingkasing. (Itandi ang Buhat 2:37.) Ang tambag nga atong madawat sa tunghaan motabang kanato sa pagpalampos niini.
4 Sa dihang makadawat ka ug asaynment, hunahunaa ang mga hiyas sa pagpanulti nga imong pauswagon segun sa gisaysay diha sa Giya sa Tunghaan. Tagda kon unsay angay nimong himoon aron sa pagpadapat sa miaging tambag nga imong nadawat. Pamalandongi ang imong tema, ang tagboanan nga imong gamiton kon kana gikinahanglan, ug kon unsaon nimo pagpadapat ang mga kasulatan nga makaplagan diha sa imong natudlong materyal. Hunahunaa kon unsaon paggamit sa labing maayong paagi ang impormasyon sa pagpanudlo ug pagdasig.—1 Tim. 4:15, 16.
5 Kon ikaw mahadlokon bahin sa pagpalista sa tunghaan, pag-ampo bahin niana ug dayon hisgoti ang imong mga pagbati uban sa magtatan-aw sa tunghaan. Ang matag usa makabatog kaayohan pinaagi sa bug-os nga pagpahimulos sa programa nga ipresentar diha sa Tunghaan sa Teokratikanhong Ministeryo sa 1999.