Usa ka Malamposong Tunghaan sa Tibuok Kalibotan
DILI kini mahal nga pribadong tunghaan o iladong unibersidad nga pipila lamang ang makatungha. Dili, kini nga tunghaan ginadumala nga wala gipabayad ang mga estudyante niini. Ang mga sesyon niini lagmit gihimo sa dapit nga duol kanimo. Gitawag kinig Tunghaan sa Teokratikanhong Ministeryo, ug ginahimo kini diha sa mga tigomanan sa mga Saksi ni Jehova. Duolan sa lima ka milyong tawo sa tibuok kalibotan ang nagatambong niini nga tunghaan.
Ikaw tingali mahibulong, ‘Unsay mga kinahanglanon sa pagpalista? Unsay gitudlo sa tunghaan? Sa unsang paagi kini gidumala? Ug sa unsang paagi makabenepisyo niana ang mga tawo?’
Mga Kinahanglanon
Bisan tuod ang tanang tawo giabiabi sa pagtambong sa Tunghaan sa Teokratikanhong Ministeryo, kadtong magpalista kinahanglang mouyon sa mga pagtulon-an sa pangunang librong tun-anan sa tunghaan, ang Bibliya. Sila kinahanglang magkinabuhi nga uyon sa moral nga mga sukdanan sa Bibliya. Busa ang mga estudyante dili magkinabuhi sa imoral nga kinabuhi. Sila dili mahimong kawatan, palahubog, makihilawason, hinabako, ug uban pa.—1 Corinto 6:9-11.
Daghang tunghaan karon nagsalikway sa mga lagda labot sa pamisti, apan ang mga estudyante nga nagpatala sa Tunghaan sa Teokratikanhong Ministeryo gilaoman nga mamisting makasaranganon sa mahinlo nga mga bisti. (1 Timoteo 2:9, 10) Walay kinahanglanon sa edad alang niini nga tunghaan. Ang kabataan nga ingon ka bata sa kuwatro o singko anyos nga mahibalong mobasa natala ug regular nga nagadumalag mga bahin, ingon man sa mga lalaki ug babaye sa ilang pangedarong 90.
Plano ug Kurikulum
Aron kombinyente ang pagtambong, ang 45-minutos nga gitas-ong mga sesyon sa Tunghaan sa Teokratikanhong Ministeryo halos gihimo kanunay sa gabii sa tungang-semana. Human sa mubong mga komento sa pag-abiabi sa instruktor sa tunghaan, ang unang mamumulong niana nga gabii mohatag ug 10-ngadto-sa-15-minutos nga pakigpulong nga gipasukad sa usa sa mga tun-anang libro sa tunghaan. Unya, siya sagad modumalag tulo ngadto sa lima ka minutos nga binabang pagrepaso sa materyal nga iyang gikobrehan.
Sunod, ang usa ka kuwalipikadong magtutudlo maghisgot sa hinungdanong mga punto sa senemanang asaynment sa pagbasag Bibliya, nga kasagaran naglangkob ug duha ngadto sa upat ka kapitulo sa Bibliya. Unom ka minutos ang gitugot niini nga pagrepaso. Ang mga estudyante nga nagsunod niining senemanang homwork nga asaynment sa usa ka yugto sa panahon makabasa sa tibuok Bibliya.
Human sa hinungdanong mga punto sa Bibliya, tulo ka presentasyon sa estudyante ang ihatag, ang matag usa himoon sa lima ka minutos. Ang usa maoy pagbasa sa Bibliya gikan sa usa ka bahin sa homwork nga asaynment. Ang laing duha ka presentasyon ipasukad sa materyal sa libro sa tunghaan nga gidasig ang tanang estudyante sa pagbasa sa pagpangandam alang sa klase. Human sa matag asaynment sa estudyante, ang instruktor sa tunghaan mohatag ug komendasyon ug, sagad, mga sugyot sa pagpauswag.
Ang tambag sa instruktor sa tunghaan gipasukad sa publikasyon nga Giya sa Tunghaan sa Teokratikanhong Ministeryo, diin ang matag estudyante gidahom sa pagtuon ug maayo. Aron mapauswag ang usa ka partikular nga kalidad sa pakigpulong sa iyang sunod nga asaynment, ang estudyante mahimong hangyoon sa pagrepaso sa usa ka kapitulo gikan sa giya, sama sa “Pagkontak sa Mamiminaw ug Kagamitan sa mga Nota,” “Haom nga mga Ilustrasyon,” “Kagamitan sa Pagsublisubli ug Pagkompas,” ug “Pagpasiugda sa Diwa ug Pag-usab-usab sa Tingog.”
Sa pipila ka komunidad ang Tunghaan sa Teokratikanhong Ministeryo adunay dugang literasiya ug klase sa pagpauswag sa pagbasa. Tinagpulo ka linibo ang nakakat-on sa pagbasa o nagpauswag sa ilang pagbasa diha sa maong literasiya nga mga klase. Pananglitan, sa Mexico tali sa 1946 ug 1994, kapin sa 127,000 ang natabangan nga makabasa.
Pagtabang sa Minilyon
Sa tibuok kalibotan ang Tunghaan sa Teokratikanhong Ministeryo nagpaluyo sa mga paningkamot sa mga ginikanan sa pagtaganag maayong edukasyon sa ilang mga anak. Ang 16-anyos nga si Moriah miingon: “Nakakat-on ako sa pagtuki sa impormasyon ug sa pagbansaybansay sa akong mga presentasyon. Karon ang matag asaynment nga akong mabatonan sa hayskul masayon na.”
Ang 15-anyos nga si Matthew, nga nagpatala sa Tunghaan sa Ministeryo sa edad nga siyete, nag-ingon: “Dako kaayo ako ug bentaha sa akong mga isigkaingon kon bahin sa kahimoan sa klase. Natun-an ko ang mga kahanas sa pagtuon ug sa pagpamati ug ang katakos sa pagpahayag ug epektibong mga pakigpulong.” Ang iyang 17-anyos nga igsoon, si Phil, midugang: “Ang Tunghaan sa Teokratikanhong Ministeryo naghimo kanako nga mas masaligon. Nahibalo ako nga kon hatagan ug asaynment, ako makahimo niana.”
Ang Tunghaan sa Teokratikanhong Ministeryo nakaedukar usab sa mga hamtong. Si Michael, nga nakakab-ot sa mga tumong sama sa paghatag ug mga presentasyon sa mga nagdumala, nag-ingon: “Ako maulawon kaayo sa dihang nagpatala sa Tunghaan sa Ministeryo. Dili na ako maulawon. Ang tunghaan naghatag ug luwas nga palibot, kahibalo, mga kahanas, ug personal nga pagdasig nga akong gikinahanglan sa pagbuntog sa akong pagkamaulawon.” Usa ka ginikanan nag-ingon: “Akong gibati nga akong natagan-an ang nasayloang mga higayon sa pagkakat-on sa bata pa.”
Diha sa usa ka gamayng baryo sa Latin Amerika, ang mga membro sa Buhatan sa Edukasyon mitambong sa Tunghaan sa Teokratikanhong Ministeryo. Human namati sa usa ka lokal nga mamumulong, usa sa mga bisita, usa ka prinsipal sa tunghaan, mipatugbaw: “Imposible nga kining tawhana nga dugay na natong nailhan nga dili makabasa ug makasulat makahimo sa pagpakigsultig Kinatsila [imbes sa iyang lumad nga pinulongan], ilabina sa pagpakigpulong atubangan sa mamiminaw, apan siya nakahimo niana.”
Sa pagkatinuod, ang Tunghaan sa Teokratikanhong Ministeryo maoy usa sa kinamaayohang mga tunghaan sa kalibotan! Kini makatabang sa batan-on ug tigulang nga makabaton ug usa ka maayong edukasyon. Sama sa giingon sa usa ka batan-on, “Irekomendar nako nga ang bisan kinsa nga naghunahunang magpatala sa tunghaan magpatala na dayon.”
[Hulagway sa panid 13]
Ang Tunghaan sa Teokratikanhong Ministeryo nagtabang sa milyonmilyon nga makabaton ug usa ka maayong edukasyon