Kon sa Unsang Paagi ang Teokratikanhong Tunghaan sa Ministeryo Magmapuslanon Kanato
1 Ang katawhan ni Jehova adunay linaing pribilehiyo nga nakadawat ug teokratikanhong edukasyon. (Isa. 54:13; Juan 6:45) Apan, ang gidak-on sa kamapuslanon nga atong makuha gikan niana nagdepende ug dako sa atong pagpaningkamot. Imo bang mailhan ang mapuslanong mga epekto sa Teokratikanhong Tunghaan sa Ministeryo diha sa imong espirituwalidad?
2 Mapabilhong mga Komento: Daghang magtatan-aw sa tunghaan ang nakamatikod nga ang mabug-osong pagtuon sa mga hiyas sa pagpanulti nakapauswag sa pagkaepektibo sa ilang kongregasyon diha sa ministeryo sa kanataran. Dugang pa, nakaplagan sa usa ka magtatan-aw sa tunghaan nga ingong resulta sa kahikayan diin mahimong makig-ambit ang mamiminaw sa mga haylayt sa Bibliya, mas daghan ang nakasunod sa eskedyul sa pagbasa sa Bibliya. Mahitungod sa Asaynment Num. 2, daghang igsoong lalaki ang paborableng nagkomento labot sa kamapuslanon sa pagsentro sa pagtagad nganha sa materyal nga basahonon nga dili mangandam ug introduksiyon ug konklusyon. Kadtong gihatagan niining bahina nagsentro pa gayod karon sa ilang pagtagad sa pagpauswag sa ilang mga katakos sa pagbasa.—1 Tim. 4:13.
3 Tanan Makapahimulos: Ang pagtubag diha sa mga tigom makapahimuot. (Prov. 15:23) Tungod kay abanteng gihatag ang mga pangutana para sa binaba nga repaso kini gayod magpaarang kanato sa pagpangandam ug pagpakig-ambit nga madasigon panahon sa repaso. Dugang pa, uban sa Enero 1, 2004, gula sa Ang Bantayanang Torre, ang mga haylayt gikan sa mga basahon sa Bibliya makita nga katugbang sa giasayn kanato nga pagbasa diha sa Teokratikanhong Tunghaan sa Ministeryo. Kining mga artikuloha nakatabang sa daghan nga makahatag ug makapalig-ong mga komento panahon sa mga haylayt sa Bibliya. Ang umaabot nga mga gula sa Atong Ministeryo sa Gingharian adunay pipila ka pangutana sa binaba nga repaso nga gipasukad sa maong mga artikulo sa Bantayanang Torre.
4 Ang tanang nalista sa tunghaan adunay espesyal nga pribilehiyo sa pagpangandam ug paghatag sa mga asaynment. Kitang tanan makapahimulos sa positibong mga komento sa magtatan-aw sa tunghaan gikan sa plataporma. Ang tagsatagsa ka estudyante dugang makapahimulos gikan sa mga punto sa tambag nga pribadong ihatag sa magtatan-aw sa tunghaan human sa tigom. Ang mga pagbansaybansay diha sa kataposan sa matag kapitulo sa librong Pahimusli ang Edukasyon sa Teokratikanhong Tunghaan sa Ministeryo nga naghisgot sa mga hiyas sa pagpanulti makahatag ug dugang tabang.
5 Sa dihang ipatagad kanimo ang praktikal ug Kasulatanhon nga mga ideya panahon ug human sa tunghaan, isulat kini diha sa imong kopya sa Tunghaan sa Ministeryo nga teksbok. Palandonga ang imong nakat-onan, ug hunahunaa kon sa unsang paagi kining bahina sa diyosnong edukasyon makapauswag sa imong espirituwalidad.