Mga Magtatan-aw nga Nagapanguna—Ang Magtatan-aw sa Teokratikanhong Tunghaan sa Ministeryo
1 Ang magtatan-aw sa Teokratikanhong Tunghaan sa Ministeryo maoy usa ka hamtong sa espirituwal nga lalaki nga nagahago sa pagsulti ug sa pagtudlo ug takos sa atong pasidungog ug kooperasyon. (1 Tim. 5:17) Unsa ang iyang mga responsabilidad?
2 Ang librarya sa Teokratikanhong Tunghaan sa Ministeryo diha sa Kingdom Hall maoy ubos sa iyang pag-atiman. Siya idlot nga interesado sa pagdasig sa tanan nga takos nga magpatala diha sa tunghaan. Iyang segurohon nga ang tukmang talaan mahuptan aron ang mga asaynment mahimo sa hapsay nga paagi sa labing menos tulo ka semana nga abante sa matag sesyon sa tunghaan. Kinahanglang sinati gayod siya sa kongregasyon, nga anaa sa hunahuna ang matag estudyante ug ang iyang mga katakos. Bisan tuod siya adunay laing igsoong lalaki sa pagtabang kaniya sa pag-andam sa eskedyul sa tunghaan, ang pagtudlo sa mga bahin sa tukmang paagi nanginahanglan sa personal nga pagdumala sa magtatan-aw.
3 Aron makatudlo sa tunghaan nga epektibo, ang magtatan-aw angayng mangandam nga makugihon sa matag semana, nga magtuon sa bug-os sa natudlong materyal. Magpaarang kini kaniya nga padayong mapasibot ang kongregasyon bahin sa kurikulum, sa pagtino kon ang natudlong materyal nakobrehan ba sa tukmang paagi, ug sa pagpasiugda sa hinungdanong mga puntos nga malakip diha sa sinulat nga mga repaso.
4 Human sa matag pakigpulong sa estudyante, komendahan sa magtatan-aw ang estudyante ug isaysay kon nganong ang tinong kalidad sa pakigpulong maayo ug kon nganong kinahanglan kining pauswagon. Sa dihang ang bisan kinsa nanginahanglag dugang pagtudlo aron sa pagpangandam sa iyang mga asaynment sa tunghaan, ang magtatan-aw o usa nga iyang gitudlo mahimong mohatag ug personal nga tabang.
5 Aron makabenepisyo sa bug-os gikan sa hagong trabaho sa magtatan-aw sa Teokratikanhong Tunghaan sa Ministeryo ug bisan kinsang dugang mga magtatambag nga nagaalagad ubos sa iyang pagdumala, kita angayng motambong sa tunghaan nga makanunayon. Kinahanglan usab kitang motuman sa atong mga asaynment ug ipadapat ang tambag nga atong madawat maingon man nianang gihatag ngadto sa ubang mga estudyante. Niining paagiha, kita anam-anam nga mouswag sa atong katakos sa pagtanyag sa mensahe sa Gingharian sa publiko ug sa kabalayan.—Buh. 20:20; 1 Tim. 4:13, 15.