Kahibalo Gikan sa Diyos Nagatubag sa Daghang Pangutana
1 Sa wala ka pa makadangat sa tukmang kahibalo sa kamatuoran, lagmit aduna ka ing daghang pangutana bahin sa kinabuhi nga wala mo matubag. Pagkamalipayon nimo sa pagkadawat ug pinasukad-sa-Bibliyang mga tubag niadtong mga pangutanaha! Karon makaarang ka na sa pagtabang sa uban sa pagpangita nianang samang mga tubag. (Itandi ang 2 Timoteo 2:2.) Ikapaambit mo kanila ang kahibalo sa Diyos nga motultol sa kinabuhing walay kataposan. (Juan 17:3) Apan unsaon nimo pagtabang ang usa nga moapresyar sa bili niining kahibaloa? Buweno, hunahunaa ang mga pangutana nga gitubag sa kamatuoran alang kanimo. Unsa kanang buot masayran sa mga nagapangita sa kamatuoran? Ang paghunahuna bahin niini makatabang kanimo sa pagtanyag sa librong Kahibalo nga Motultol sa Kinabuhing Walay Kataposan. Ang mosunod nga mga sugyot makatabang kanimo sa dihang mangandam sa pagsangyaw sa Hunyo.
2 Sanglit daghang tawo natingala kon nganong adunay daghan kaayong pag-antos sa kalibotan, kining paagiha hayan makakuhag maayong sanong:
◼ “Sa dihang ang katalagman mohampak o sa dihang ang krimen ug kapintasan mag-uswag, kasagarang mangutana ang mga tawo kon nganong ang maong teribleng mga butang mahitabo. Unsa may imong tubag?” Tugoti ug ilha ang tubag sa tawo. Dayon paklia ang kapitulo 8 sa Kahibalo nga libro, ug dad-a ang pagtagad kon unsay giingon sa parapo 2. Saysayi nga kining libroha nagatanyag sa pagpatin-aw sa Bibliya kon nganong ang daotang mga butang mahitabo, ug ingna: “Buot kong ibilin kining libroha kanimo sa gamayng amot.” Dayon hikayang mobalik aron ipadayon ang inyong panaghisgot.
3 Sa dihang balikon ang imong napahiluna nga “Kahibalo” nga libro, ikaw makaingon:
◼ “Interesado ako sa imong opinyon kon nganong daghan kaayong pag-antos sa kalibotan. Mouyon ka ba sa tubag sa Bibliya ingon sa gilaraw sa libro?” Tugoting motubag. Basaha ang parapo 17 sa panid 77 sa Kahibalo nga libro, ug awhagang basahon ang Roma 9:14 gikan sa Bibliya sa tagbalay. Dayon ingna: “Ang maayong balita mao nga ang Diyos dili sa di-husto nagapahinabog kasakit ug pag-antos kanato. Siya misaad sa paghatag kanato ug kinabuhing walay kataposan sa kalinaw ug kalipay. Ang unang kapitulo niining libroha nag-ulohang ‘Mabatonan Nimo ang Usa ka Malipayong Kaugmaon!’ Buot kong isaysay kon unsaon nga matinuod kana para kanimo ug sa imong mga minahal.” Paklia sa kapitulo 1, ug ipasundayag ang atong paagi sa pagtuon. Pagkobre ug dakong bahin sa kapitulo kon haom ubos sa mga kahimtang.
4 Makapili ka sa paggamit sa introduksiyon nga makita sa panid 14 sa “Nangatarongan” nga libro, ubos sa ulohang “Pagkatigulang/Kamatayon”:
◼ “Nakapangutana ka na ba gayod: ‘Ang kamatayon ba mao na ang kataposan sa tanan? O aduna pa bay lain human sa kamatayon?’ [Tugoting motubag.] Ang Bibliya nagatubag sa bisan unsang pangutana ta maylabot sa kamatayon. [Basaha ang Ecclesiastes 9:5, 10.] Kini usab nagapakita nga adunay tinuod nga paglaom alang kanilang adunay pagtuo. [Paklia sa parapo 13 sa panid 84 sa Kahibalo nga libro; basaha ug isaysay ang mga pulong ni Jesus nga makaplagan sa Juan 11:25.] Kining tibuok kapitulo gigahin sa pagtubag sa pangutana, Unsay mahitabo sa atong namatay nga mga minahal? Kon buot nimong basahon kini, ikabilin ko kining kopyaha kanimo sa gamayng amot.”
5 Sa pagbalikduaw, imong mapahinumdoman ang tagbalay sa imong miaging duaw ug dayon ingna:
◼ “Sa miagi atong nahisgotan kon unsay mahitabo sa dihang mamatay ang usa ka tawo. Daghang tawo nagatuo nga ang bisan unsang kinabuhi human sa kamatayon mahaadto sa langit o sa impiyerno. Apan nahunahunaan mo na ba ang posibilidad nga mabuhi pag-usab ang patay dinhi mismo sa yuta? [Tugoting motubag.] Sumala sa Bibliya, kadtong banhawon makig-uban sa mga maaghop nga makapanunod sa yuta. [Basaha ang Salmo 37:11, 29, dayon hisgoti ang parapo 20 sa panid 88 sa Kahibalo nga libro.] Kana nga paglaom nakahatag ug kahupayan sa minilyong katawhan nga nagkinabuhi sa kahadlok sa kamatayon. Kining libroha makatabang kanimo nga mas pa gayong masabtan ang maong butang. Ikapasundayag ko ba kon unsaon?”
6 Kon gipalabi mo ang pinayanong presentasyon, mahimong masulayan mo kining usa:
◼ “Gusto kong ipakita kanimo ang usa ka ilustrasyon niining libroha, Kahibalo nga Motultol sa Kinabuhing Walay Kataposan. Dili ba matahom kini nga larawan?” Ablihi ang libro aron ang tagbalay makakita sa mga panid 4-5. Hulata ang iyang tubag. Dayon basaha ang mga pulong sa panid 5. Tiklopi sa pag-ingon: “Makuha nimo kining libroha aron imong mabasa mismo. Adunay diyutayng amot sa paghulip sa gamayng gasto sa pagpatik.” Susiha kon unsay kombenyenteng panahon sa pagbalik aron paloapon ang bisan unsang interes nga gipakita.
7 Aduna kitay kahibalo gikan sa Diyos nga nagatubag sa importanteng mga pangutana sa kinabuhi. Pangandam nga makugihon, ug si Jehova magpanalangin sa imong mga panikaysikay sa pagpaambit niining nagahatag-kinabuhing impormasyon uban kanilang nagapangita sa kamatuoran.