“Kini Nagakahulogan ug Kinabuhing Walay Kataposan”
1 Ang mga pulong ni Jesus sa Juan 17:3 nagaingon nga ang pagkuhag kahibalo sa Diyos ug ni Kristo nagakahulogan ug kinabuhing walay kataposan! Apan sa pagbaton ba lamang nato ug kahibalo kang Jehova ug kang Jesus nga atong maangkon ang kinabuhing dayon? Dili. Ang mga Israelita nahibalo nga si Jehova mao ang ilang Diyos, apan ang ilang kurso sa kinabuhi wala magbanaag nianang pagtuoha. Ingong resulta, sila nawad-an sa iyang pag-uyon. (Os. 4:1, 2, 6) Karong mga adlawa minilyong katawhan hayan “may kasibot sa Diyos; apan dili sumala sa tukmang kahibalo.” (Roma 10:2) Sila kinahanglang makaila kang Jehova, “ang bugtong matuod nga Diyos,” ug aron alagaron siya sa tukma. Nianang maong tumong, sulod sa Nobyembre atong itanyag ang librong Kahibalo nga Motultol sa Kinabuhing Walay Kataposan. Aniay pipila ka sugyot nga hayan makatabang kanimo.
2 Sanglit ang ideya sa pagkinabuhing walay kataposan sa yuta maoy bag-o alang sa kadaghanang katawhan, kining pasiunaha hayan magpainteres nila:
◼ “Kami nagasuknag pangutana sa among mga silingan. Kon ikaw dapiton sa pagkinabuhi sa walay kataposan sa kalibotan nga sama niini, dawaton ba nimo ang pagdapit? [Ipakita ang larawan sa mga panid 4-5 sa librong Kahibalo. Tugoting motubag.] Apan sa imong hunahuna unsa kahay imong buhaton aron tagamtamon ang maong palaaboton? [Tugoting motubag.] Matikdi kon unsay gikinahanglan sumala sa Juan 17:3. [Basaha.] Kining libroha nagatabang sa daghan aron mabatonan kining matanga sa kahibalo. Buot ka bang makabaton ug usa ka personal nga kopya aron mabasa? [Tugoting motubag.] Sa akong sunod duaw, atong mahisgotan kon nganong makataronganon ang pagtuo nga kita makabaton sa walay kataposang kinabuhi dinhi mismo sa yuta.”
3 Sa dihang mobalikduaw ka niadtong kinsa imong nahisgotan ang Juan 17:3, ikaw hayan makapadayon niining paagiha:
◼ “Sa akong ulahing duaw, atong nahisgotan ang Juan 17:3, nga nag-ingon nga ang pagkuhag kahibalo sa Diyos ug ni Kristo magkahulogan ug kinabuhing walay kataposan. Apan daghang tawo ang nagatuo nga ang mas maayong kinabuhi mabatonan lamang sa langit. Unsay imong pagbati bahin niana? [Tugoting motubag.] Kon anaa diha ang libro nga akong napahiluna kanimo, buot nakong ipasundayag kanimo ang pipila ka bersikulo sa Bibliya nga nagapamatuod nga ipasig-uli ang Paraiso sa yuta. [Hisgoti ang mga parapo 11-16 sa mga panid 9-10 sa librong Kahibalo.] Sa akong sunod duaw, buot nakong ipasundayag kanimo kon nganong ikaw makasalig niining mga saara diha sa Bibliya. Sa kasamtangan, tingali mabasa nimo ang kapitulo 2 sa imong kopya sa libro.”
4 Aniay presentasyon nga hayan buot nimong gamiton uban sa katawhan nga mahiligon sa relihiyon:
◼ “Kami nagapakigsulti sa among mga silingan bahin sa kon nganong daghan kaayong lainlaing relihiyon sa kalibotan. Adunay kapin sa 10,000 ka relihiyosong denominasyon sa tibuok kalibotan. Apan, adunay usa lamang ka Bibliya. Sa imong hunahuna nganong nagalungtad man kining kaliboga sa mga relihiyon? [Tugoting motubag. Ablihi ang librong Kahibalo sa kapitulo 5, ug basaha ang parapo 1.] Ikaw makadawat ug makapatagbawng mga tubag nianang mga pangutanaha pinaagig pagbasa niining kapituloha. Ako malipay nga ibilin kining libroha kanimo uban ang gamayng amot.” Kon kini dawaton, hikaya ang pagbalik, ug ingna: “Sa akong pagbalik, tingali atong mahisgotan kon ang tanang relihiyon ba maoy lainlaing dalan lamang padulong sa samang dapit.”
5 Sa imong pagbalik aron ipadayon ang panaghisgot kon nganong adunay daghan kaayong relihiyon, ikaw hayan makaingon niini:
◼ “Sa akong ulahing pakigsulti kanimo, akong gipatungha ang pangutana kon ang tanang relihiyon ba maoy lainlaing dalan lamang padulong sa samang dapit. Unsay imong hunahuna bahin niana? [Tugoting motubag.] Buot nakong ipasundayag kanimo diha sa libro nga akong nabilin kanimo kon unsay giingon ni Jesus niining bahina. [Paklia ang kapitulo 5 sa librong Kahibalo, ug basaha ang mga parapo 6-7, lakip na ang Mateo 7:21-23.] Ikaw tingali mahibulong kon nganong bililhon ang pagkasayod sa tukma kon unsa ang kabubut-on sa Diyos. Palihog basaha ang nahibilin niining kapituloha. Sa sunod nakong balik, malipay akong ipakita kanimo ang bili sa pagbaton ug tukmang kahibalo sa Bibliya.”
6 Ang deretsong paagi kasagarang malamposon sa pagsugod ug mga pagtuon sa Bibliya. Aniay sinugyot nga pasiuna nga makita sa panid 12 sa “Nangatarongan” nga libro:
◼ “Miduaw ako aron itanyag kanimo ang libreng kurso sa Bibliya sa balay. Kon itugot mo, buot nakong gamiton ang pipila ka minutos lamang aron ipasundayag kon sa unsang paagi ang katawhan sa mga 200 ka kayutaan nagahisgot sa Bibliya sa balay ingong mga grupo sa pamilya. Atong magamit ang bisan hain niining mga ulohana ingong sukaranan sa panaghisgot. [Ipakita ang mga kaundan sa librong Kahibalo.] Hain man ang nagapainteres gayod kanimo?” Paklia ang kapitulo nga napili, ug sugdi ang pagtuon sa unang parapo.
7 Aniay lain pang malamposong deretsong paagi nga imong masulayan sa pagsugod ug mga pagtuon:
◼ “Ako nagahatag ug mga leksiyon sa Bibliya nga libre ug adunay mga bakante sa akong eskedyul alang sa dugang mga estudyante. Kini nga tabang sa pagtuon sa Bibliya ang atong gamiton. [Ipakita ang librong Kahibalo.] Ang kurso molungtad lamag pipila ka bulan ug magtaganag mga tubag sa mga pangutana sama sa: Nganong gitugotan sa Diyos ang pag-antos? Nganong kita matigulang ug mamatay? Unsay mahitabo sa atong namatay nga mga minahal? Ug unsaon nimo pagduol sa Diyos? Mahimo bang ipasundayag ko kanimo ang pagtuon?” Kon ang tanyag sa pagtuon dumilian, pangutan-a kon ang tawo buot bang mobasa sa Kahibalo sa iyang kaugalingon. Kon mao, itanyag kini kaniya.
8 Pagkadakong bahandi ang tukmang kahibalo sa Diyos ug ni Kristo alang sa matag usa nga nagabaton niana! Tugoting gamiton nato ang matag kahigayonan sulod sa Nobyembre aron ipaambit sa uban ang kahibalo nga motultol sa kinabuhing walay kataposan.