Ipakaylap ang Kahibalo nga Motultol sa Kinabuhing Walay Kataposan
1 Si Jehova mao “ang Usa nga nagatudlo sa tawo ug kahibalo.” (Sal. 94:10) Siya nagagamit kanato sa pagpakaylap sa nagaluwas-kinabuhing kahibalo bahin kaniya ngadto nilang wala masayod kon unsaon siya sa pag-alagad nga mauyonan. Ang librong Kahibalo nga Motultol sa Kinabuhing Walay Kataposan maoy maayong instrumento sa pagtudlo sa pagtabang sa mga mabuot-kasingkasing aron makabaton ug tukmang kahibalo sa kamatuoran. (1 Tim. 2:3, 4) Ang tin-aw ug makataronganong kahan-ayan sa kamatuoran sa librong Kahibalo motabang sa katawhan sa pagsabot kon unsa ang ginatudlo ni Jehova kanila. Niining bulana buot tang makigsulti sa mga tawo sa paaging magpagusto nilang mobasa sa maong libro. Ania ang pipila ka sugyot. Sulayi nga ibungat kini sa imong kaugalingong mga pulong ug sa natural nga paagi sa pagpakigsulti.
2 Sanglit ang kadaghanang tawo lagmit nawad-an sa usa ka minahal sa kamatayon, imong ikalambigit ang paglaom sa pagkabanhaw diha sa panaghisgot pinaagig unang pagsulti sama niini:
◼ “Ang kadaghanan nato nawad-an ug minahal sa kamatayon. Kita ba nahibulong kon ato bang makita siya pag-usab? [Tugoting motubag.] Ang kamatayon dili bahin sa orihinal nga katuyoan sa Diyos alang sa tawo. Gipamatud-an ni Jesus nga ang atong mga minahal mahimong maluwas gikan sa kamatayon. [Basahang Juan 11:11, 25, 44.) Kini nagapasundayag kon unsa ang gisaad sa Diyos nga pagahimoon alang nato. [Paklia ang librong Kahibalo ngadto sa hulagway sa panid 85 ug basahang ulohan. Unya ipakita ang hulagway diha sa panid 86 ug komentohi kini.] Kon buot mong mobasag dugang pa bahin niining paglaom sa pagkabanhaw, malipay kong ibilin kining libroha kanimo.”
3 Human sa unang panaghisgot bahin sa paglaom sa pagkabanhaw, mahimo mong sugdan ang sunod nga panaghisgot sa samang tawo niining paagiha:
◼ “Hayan imong mahinumdoman ang akong gisulti nga ang kamatayon dili bahin sa orihinal nga katuyoan sa Diyos alang sa tawo. Kon kana tinuod, nganong kita matigulang man ug mamatay? Ang pipila ka pawikan nagakinabuhig kapin sa 100 ka tuig, ug adunay mga kahoy nga naglungtad na sa linibo ka tuig. Nganong ang mga tawo nagakinabuhi lamang ug 70 o 80 ka tuig? [Tugoting motubag.] Kita mamatay tungod kay ang unang tawhanong magtiayon misupil sa Diyos.” Basahang Roma 5:12. Paklia sa panid 53 diha sa librong Kahibalo ug basaha ang ulohan sa kapitulo. Tagda ang unang tulo ka parapo, nga nagapakita sa mga tubag sa pinatik nga mga pangutana. Hikayang mobalik aron hisgotan ang nahibilin sa kapitulo.
4 Kon makigsulti ka sa usa ka tawong relihiyoso, mahimong ikaw makaingon:
◼ “Adunay ginatos ka lainlaing relihiyon karong adlawa. Ginatudlo nila ang daghang nagkasumpaking mga pagtulon-an. Ang pipila ka tawo moingong ang tanang relihiyon maayo ug dili hinungdanon kon unsa ang atong gituohan. Unsa ang imong opinyon? [Tugoting motubag.] Gitudlo ni Jesus ang matuod nga relihiyon ug gipakita nga ang ubang mga porma sa pagsimba di-dawaton sa Diyos. [Basahang Mateo 7:21-23.) Kon buot natong pahimut-an ang Diyos, kinahanglang simbahon nato siya uyon sa iyang kabubut-on.” Paklia ang librong Kahibalo sa kapitulo 5, basaha ang titulo ug pipila sa mga sub-ulohan. Itanyag kaniya ang libro.
5 Ang mga tawong nalibog tungod sa daghang relihiyon hayan mopabili sa tubag niining pangutanaha sa imong balikduaw:
◼ “Tungod sa daghang lainlaing relihiyon nga nagalungtad karong adlawa, unsaon ta pag-ila kon hain niana ang husto? Unsaon nimo sa pagtino kon haing relihiyon ang tukma? [Tugoting motubag.] Si Jesus nagtudlo kanato kon unsaon pag-ila sa iyang matuod nga mga sumusunod.” Basahang Juan 13:35. Tagda ang mga parapo 18 ug 19 sa kapitulo 5 diha sa librong Kahibalo. Ipunting nga pinaagi sa paggamit niining Kasulatanhong mga giya, ang usa ka tawo mahimong makaila sa matuod nga relihiyon. Isaysay kon sa unsang paagi ang mga Saksi ni Jehova nailhan sa tibuok kalibotan tungod sa ilang tiunay nga gugma ug hataas nga mga sukdanan sa moral. Isaysay kon sa unsang paagi ang usa ka pagtuon sa Bibliya, ginamit ang librong Kahibalo, sa dayag magpaila sa porma sa pagsimba nga giuyonan sa Diyos.
6 Kon mahinagbo mo ang usa ka ginikanan, kining paagiha hayan epektibo:
◼ “Matag adlaw, atong madunggan ang mga taho bahin sa masukihong panggawi sa mga batan-on nga maorag walay bisag unsang moral nga mga sukdanan. Ang pipila nagabasol sa mga eskuylahan sa dili pagtudlo sa kabataan kon unsay matarong ug daotan. Kinsa sa imong hunahuna ang angayng magatagana niining pagbansaya? [Tugoting motubag.] Paminawa kon unsay giingon sa Bibliya bahin niining pangutanaha. [Basahang Efeso 6:4.] Kana nagatug-an nato nga ang pagsilsil sa moral nga mga sukdanan diha sa kabataan maoy responsabilidad sa mga ginikanan.” Paklia ang librong Kahibalo sa panid 145, basaha ang parapo 16, ug komentohi ang mga hulagway sa panid 147. Isaysay nga ang libro gidesinyo alang sa tibuok pamilya aron pagatun-an. Ginamit ang mga parapo 17 ug 18 diha sa panid 146, itanyag nga ipasundayag kon sa unsang paagi ginadumala ta ang usa ka pagtuon uban sa mga pamilya.
7 Kon nasugdan mo ang pagtuon sa usa ka nabalakang ginikanan sa unang duaw, hayan mapadayon mo kini sa pagbalikduaw pinaagig pag-ingon:
◼ “Ang kalibotan karong adlawa nagabutang ug daghang tentasyon atubangan sa atong mga batan-on. Kini nagapalisod gayod kanila sa pagkahimong mahinadlokon-sa-Diyos samtang sila nagatubo. Tingali imong nahinumdoman nga sa miagi tang panaghisgot, atong gilain ang duha ka prinsipyo. Ingong diyosnong mga ginikanan, angayg ipahiluna ta ang maayong mga sumbanan alang sa atong kabataan, ug magataganag padayong mga pagpahayag sa atong gugma alang kanila. Adunay lain pang butang nga giingon sa Bibliya nga gikinahanglan sa kabataan gikan sa ilang mga ginikanan.” Basahang Proverbio 1:8. Paklia ang panid 148 sa librong Kahibalo ug ipadayon ang pagtuon, nga nagakobre sa mga parapo 19-23. Isugyot nga mobalik ka pag-usab sa pagtuon uban ang tibuok pamilya, sugod sa kapitulo 1.