“Pagtuo Mosunod sa Butang Nadungog”
1 Sa dihang atong makaplagan ang usa kinsa “sa husto nahimutang alang sa kinabuhing walay-kataposan,” kinahanglan natong lig-onon ang pagtuo sa maong tawo kon unsa ang iyang nadungog. (Buh. 13:48; Roma 10:17) Sa paglampos niana, kinahanglan natong balikon ang napahimutang nga mga magasin, nga nagahatod sa kinaulahiang mga gula ug tingali motanyag ug usa ka suskrisyon. Apan, ang atong tumong mao ang pagsugod ug usa ka pagtuon diha sa librong Kahibalo nga Motultol sa Kinabuhing Walay Kataposan. Ania ang pipila ka sugyot nga hayan makatabang:
2 Sa dihang magahimog usa ka balikduaw diin imong nahisgotan ang artikulong “Dayega ang Hari sa Kahangtoran!,” ikaw makasugod niining paagiha:
▪ “Sa ulahi natong panaghisgotay, atong nasubli ang pipila sa ebidensiya nga nagapamatuod nga adunay usa ka labing gamhanang Diyos. Apan, ang pagkasayod lamang nga siya nagalungtad maoy dili igo. Kinahanglan natong mailhan ang iyang ngalan. Nasayod ka ba kon unsa kini? [Tugoting motubag.] Buot sa Diyos nga mailhan nato siya pinaagi sa iyang ngalan. [Basahang Salmo 83:18.] Ang Bibliya nagatug-an kanatog mas pa bahin kang Jehova nga Diyos, sama sa gisaysay niining libroha.” Ipakita ang hulagway, ug basaha ang ulohan sa panid 29 sa Kahibalo nga libro. Human ninyo mahisgoti ang unang tulo ka parapo sa kapitulo 3, ikaw nakasugod na ug usa ka pagtuon!
3 Alang kanila kinsa uban nimo natagad ang artikulong “Kon Nganong ang Matuod nga Pagsimba Makadawat sa Panalangin sa Diyos.” Hayan buot nimong sundalon ang interes pinaagi sa pag-ingon:
▪ “Human mabasa ang artikulo, hayan imong namatikdang dili nato maisip ang tanang relihiyon sa samang paagi. Ang tinuod nga relihiyon ug ang bakak nga mga relihiyon nagalungtad. Kini magpatungha sa makataronganong pangutana, Kinsang pagsimba ang pagadawaton sa Diyos? Ang tubag gipasiugda niining libroha.” Paklia sa kapitulo 5 diha sa Kahibalo nga libro ug basahang parapo 4, lakip ang Juan 4:23, 24. Unya mosukna, “Mahinangop ka bang modawat sa usa ka libreng pagtuon sa Bibliya sa balay?” Kon ang sanong positibo, paklia ngadto sa kapitulo 1 ug sugdi ang pagtuon.
4 Kon ang interes gipakita sa Abril 22 nga “Pagmata!,” sa dihang mobalik ka tingali imong sulayan kining paagiha sa pagsugod ug usa ka pagtuon diha sa “Kahibalo” nga libro:
▪ “Hayan imong mahinumdomang naghisgot kita bahin sa atong mga kalaoman nga mosangpot sa pagkakita sa usa ka kalibotang walay gubat. Maoy lisod handurawon kon sa unsa gayod kana mahisama. Ania ang hunahuna sa usa ka dibuhista bahin niana. [Ipakita ang hulagway sa mga panid 188-9 diha sa Kahibalo nga libro.] Dili ba ka na usa ka kalipay nga mahimong makatagamtam niining maong palibot? [Paklia sa mga panid 4-5, ipakita ang hulagway, ug basaha ang kahon.] Ang ulohan niining libroha maoy susama sa mga pulong ni Jesus nga makaplagan diha sa Juan 17:3. [Basaha.] Kon ako matugotan, buot ko nga ipasundayag kon sa unsang paagi kining libroha mahimong magamit uban sa imong Bibliya aron kaplagon kanang nagaluwas-kinabuhing kahibalo.” Kon ang tagbalay mahinangop, sugdi ang pagtuon sa unang kapitulo.
5 Ang atong kalipay mahimong dako kon kita makaarang nga ‘buksan ngadto sa uban ang pultahan ngadto sa pagtuo’ nga motultol sa kinabuhing walay kataposan.—Buh. 14:27; Juan 17:3.