Tabangi ang Uban sa Paghupot sa Kahibalo nga Motultol sa Kinabuhi
1 Ang apostol Pablo nagsaysay nga maoy ‘kabubut-on sa Diyos nga ang tanang matang sa mga tawo makadangat sa tukmang kahibalo sa kamatuoran.’ (1 Tim. 2:4) Unsaon nato sa pagtabang sa uban sa pagkuha nianang kahibaloa? Usa ka paagi mao ang paghimog mga balikduaw sa mga tawong mikuha sa librong Kahibalo nga Motultol sa Kinabuhing Walay Kataposan. Unsaon nato sa pagdasig sa uban nga tun-an kana uban kanato?
2 Alang kanilang nagpakitag interes sa Bibliya ingong usa ka praktikal nga giya, ikaw makabalik sa pagtanyag ug usa ka pagtuon, tingali sa pag-ingon:
▪ “Sa dinhi ako sa miagi, atong nahisgotan kon nganong kita makasalig sa Bibliya ingong praktikal nga giya. Tungod kay kini dinasig sa Diyos, ang Bibliya usab usa ka segurong tinubdan sa paghupay ug paglaom. [Basaha ang Roma 15:4.] Sa paniklop sa atong kataposang panaghisgot, akong gipatungha ang pangutana, Sa unsang paagi kita sa personal makabenepisyo gikan sa kahibalo nga anaa sa Bibliya?” Basaha ang parapo 18 sa panid 11 diha sa librong Kahibalo. Ipunting nga ang mga Saksi ni Jehova nagadumalag mga lima ka milyong pagtuon sa Bibliya sa tibuok kalibotan. Itanyag nga ipasundayag ang pagtuon, ginamit ang unang lima ka parapo sa kapitulo 1.
3 Kon ikaw mobalik sa pagbisitag usa ka ginikanan kinsa nabalaka bahin sa mga problema sa pamilya, tingali imong masulti kini:
▪ “Nahibalo ko nga ikaw, ingong usa ka ginikanan, buot sa labing maayo alang sa imong kabataan. Sanglit imposible nga mapanalipdan sila gikan sa tanang butang nga daotan, kinahanglan nimo silang bansayon kon unsaon sa pagsagubang ang mga problema sa kinabuhi. Sa imong hunahuna sa unsang paagi kini mahimo? [Tugoting motubag.] Dinhi sa mga panid 145-6 sa librong Kahibalo may pipila ka maayong tambag gikan sa Bibliya.” Basaha ang pipila ka bahin gikan nianang maong mga panid, unya itanyag nga mobalik pag-usab sa pagpasundayag kon unsaon sa paggamit ang libro sa pagkat-on ug dugang pa aron sa pagtagamtam sa usa ka malipayong kinabuhi sa pamilya.
4 Kon imong nagamit ang diretsong paagi sa pagsugod ug pagtuon, hayan imong isulti kini sa pagpadayon sa unang panaghisgot:
▪ “Gihimo ko ang linaing panlimbasog aron duawon ka pag-usab tungod kay buot kong sultihan ka ug mas pa bahin sa among libreng programa sa pagtuon sa Bibliya. Akong nabilin kanimo ang usa ka kopya niining libroha, Kahibalo nga Motultol sa Kinabuhing Walay Kataposan, nga mao ang tabang sa pagtuon nga atong gigamit. Matikdi kon giunsa kita pagdasig niini sa pagtagad sa Pulong sa Diyos. [Basahang parapo 23 sa panid 22.] Kon makuha mo palihog ang imong kopya sa libro, hayan atong mapadayon ang pagtuon diin kita mihunong sa miagi.” Kon ang pagtuon wala masugdi sa unang pagbisita, ikaw tingali makaingon: “Basin kini ang maayong panahon alang kanako nga ipasundayag kon sa unsang paagi kami nagatuon sa Bibliya.” Hikaya ang tinong panahon nga mobalik alang sa sunod nga pagtuon.
5 Ang paggamit sa librong Kahibalo magpaarang kanato sa pagpakaylap sa tukmang kahibalo alang sa kaayohan sa uban. (Prov. 15:7) Alang kanila kansang mga kasingkasing maoy tukma, kini magdasig kanila nga magkinabuhing uyon sa pagkamatarong ni Jehova, nga sa ulahi motultol sa kinabuhing walay kataposan.