Tipigi
Gisugyot nga mga Presentasyon sa Pag-alagad sa Kanataran
Gamita ang mosunod nga mga sugyot nga makatabang kanimo sa pag-andam ug mga presentasyon nga magpasiugda sa tanyag nga literatura nianang bulana.
Pakigsuod Kang Jehova
“Daghang tawo nga nagtuo sa Diyos gustong masuod pa gayod kaniya. Nahibalo ka ba nga ang Diyos nagdapit kanato sa pagpakigsuod kaniya? [Basaha ang Santiago 4:8.] Kining basahona gidisenyo sa pagtabang sa mga tawo sa paggamit sa kaugalingon nilang Bibliya aron sa pagpakigsuod sa Diyos.” Basaha ang parapo 1 sa panid 16.
“Karon kaylap ang inhustisya. Mao gayod kana ang gihubit dinhi. [Basaha ang Ecclesiastes 8:9b.] Daghan ang nagduhaduha kon may pagtagad ba gayod ang Diyos. [Basaha ang unang duha ka tudling-pulong sa parapo 4 sa panid 119.] Kining kapituloha nagpatin-aw kon nganong gitugotan sa Diyos ang inhustisya sulod sa usa ka yugto sa panahon.”
Is There a Creator Who Cares About You?
“Asa man nato makaplagan ang labing maayong tambag kon unsaon pagsulbad ang atong labing makapalibog nga mga problema? [Tugoting motubag. Dayon basaha ang Mateo 7:28, 29.] Naghubit kana kon sa unsang paagi misanong ang mga tawo sa Wali sa Bukid ni Jesus. Matikdi kon unsay giingon sa uban. [Ipasiugda ang mga komento diha sa panid 152.] Kining kapituloha naghisgot sa kinabuhi ug mga pagtulon-an ni Jesus.”
“Nahibulong ka ba sukad: ‘Kon dunay Diyos, molihok ba gayod siya aron hanawon ang pag-antos ug inhustisya niining kalibotana?’ [Tugoting motubag. Dayon basaha ang Pinadayag 21:3, 4.] Kining libroha nagpatin-aw kon unsay himoon sa Diyos aron wagtangon ang pag-antos ug hanawon ang tuboran niini.” Ipakita ang kapitulo 10.
Kahibalo nga Motultol sa Kinabuhing Walay Kataposan
“Kon dapiton kang mopuyo sa matahom nga palibot nga sama niini, dawaton mo ba ang maong pagdapit? [Ipakita ang hulagway diha sa mga panid 4-5, ug tugoting motubag.] Matikdi kon unsay giingon sa Pulong sa Diyos nga mao ang yawi sa pagtagamtam niining matanga sa kinabuhi sa walay kataposan. [Basaha ang Juan 17:3.] Kining libroha motabang kanimo sa pagkabaton ug kahibalo nga motultol sa kinabuhing walay kataposan.” Hikaya nga hisgotan ang unang lima ka parapo sa kapitulo 1 sa sunod duaw.
Ablihi ngadto sa hulagway sa mga panid 188-9, ug ginamit ang mga pulong diha sa kapsiyon, pangutan-a ang tagbalay: “Naglaom ka ba nga mopuyo sa Paraiso, sa dihang ang yuta mapuno sa kahibalo bahin sa Diyos? [Tugoting motubag. Dayon basaha ang Isaias 11:9.] Kining libroha motabang kanimo sa pagkakat-on kon unsay giingon sa Bibliya bahin sa Paraiso ug kon sa unsang paagi kita mahimong bahin niana.” Hikaya nga hisgotan ang mga parapo 11-16 sa kapitulo 1 sa sunod duaw.
Pagkakat-on Gikan sa Dakong Magtutudlo
“Nagtuo ka ba nga ang kalibotan mahimong mas maayong dapit nga puloy-anan kon ang mga tawo magkinabuhi sumala niining mga pulonga? [Basaha ang Mateo 7:12a. Dayon tugoting motubag.] Kining libroha naundan ug daghang pagtulon-an gikan sa labing dakong magtutudlo nga nabuhi sukad.” Ipasiugda ang mga hulagway ug mga kapsiyon diha sa kapitulo 17.
“Kadaghanan sa mga ginikanan karon misulay sa pagsilsil ug mapuslanong mga prinsipyo ngadto sa ilang mga anak. Gibati mo ba nga hinungdanon kini? [Tugoting motubag. Dayon basaha ang Proverbio 22:6.] Matikdi nga ang mga ginikanan gidasig nga mosugod sa pagbansay sa ilang mga anak gikan sa sayong panuigon. Kining libroha gidisenyo sa pagtabang sa mga ginikanan sa paghimo niana.” Ipasiugda ang mga hulagway ug mga kapsiyon sa kapitulo 15 o 18.
“Kasagaran mahingangha ang mga ginikanan sa mga pangutanang isukna sa ilang mga anak. Ang pipila sa maong mga pangutana lisod tingaling tubagon, dili ba? [Tugoting motubag. Dayon basaha ang Efeso 6:4.] Kining libroha makatabang sa mga ginikanan sa pagtubag sa mga pangutana sa ilang mga anak karon.” Ipasiugda ang pipila sa mga hulagway ug mga kapsiyon diha sa mga kapitulo 11 ug 12 o 34 hangtod sa 36.
Life—How Did It Get Here? By Evolution or by Creation?
“Kitang tanan nabalaka bahin sa krimen ug kapintasan sa atong dapit. Nagtuo ka ba nga dunay usa nga makasulbad gayod ning maong problema? [Tugoting motubag.] Ang Diyos mao ang makasulbad.” Paklia ngadto sa panid 196; basaha ug komentohi ang Proverbio 2:21, 22 diha sa parapo 19. Ipakita ang ulohan sa kapitulo 16, ug itanyag ang libro.
Ablihi ngadto sa panid 6, ug isulti: “Nagtuo ang daghang tawo nga ang atong matahom nga yuta ug ang kinabuhi diha niini maoy resulta sa aksidente. Unsay imong gihunahuna nga makataronganong katin-awan kon sa unsang paagi nahitabo kining tanan? [Tugoting motubag.] Daghang ebidensiya ang nagpamatuod sa asoy sa Bibliya bahin sa usa ka Maglalalang nga gamhanan kaayo ug nahigugma gayod kanato. Siya ang matuod nga Diyos, ug ang iyang ngalan maoy Jehova.” Basaha ang Salmo 83:18, ug ipatin-aw sa mubo nga ang iyang katuyoan mao ang pag-usab sa tibuok yuta nga mahimong paraiso.
Pagpangita sa Katawhan sa Diyos
“Tungod sa daghang nagkalainlaing relihiyon karon, nahibulong ka ba kon sa unsang paagi atong matino kon hain ang giuyonan sa Diyos?” Human makatubag, paklia ngadto sa panid 377. Ipasiugda ang punto numero 7, ug pangutan-a kon mouyon ba ang tagbalay nga ang matuod nga relihiyon angayng maghiusa sa tanang rasa sa katawhan. Tan-awa ang usa sa gisitar nga mga teksto, ug segun sa itugot sa panahon, hisgoti ang pipila sa ubang mga punto nga gilista. Kon interesado gayod, itanyag ang libro. Sa imong pagbiya, mahimo kang mangutana, “Sa unsang paagi ang matuod nga relihiyon makaapektar sa panggawi sa usa ka tawo?” Hikaya nga moduaw pag-usab aron tubagon ang maong pangutana.
Kon gipaila sa usa ka tawo ang iyang kaugalingon ingong membro sa usa ka dakong relihiyosong grupo, ikaw makaingon: “Nalipay akong makahimamat ug mga tawo nga lainlain ug mga relihiyon. Ang mga tawo nangita sa Diyos sa nagkalainlaing mga direksiyon. [Kon haom, basaha ang Buhat 17:26, 27.] Kasagaran, ang mga tawo nagsunod sa relihiyon sa ilang mga ginikanan. [Basaha ang parapo 12 sa panid 8.] Ang pagkahibalo ug dugang bahin sa ubang mga relihiyon makahatag gayod ug katin-awan ug matulon-anon. Kining libroha nagpatin-aw sa sinugdanan, mga binuhatan, ug mga pagtulon-an sa dagkong mga relihiyon sa kalibotan.” Ipakita ang usa ka pananglitan kon unsay giingon sa libro bahin sa relihiyon sa maong tawo, ingon sa makaplagan diha sa mosunod nga mga panid: Sikhismo (100-1); Hinduismo (116-17); Budhismo (141); Taoismo (164-6); Confucianismo (177); Shintoismo (190-5); Judaismo (220-1); ug Islam (289).
Pinadayag—Hingpit nga Sangkoanan Niini Haduol Na!
“Tingali nakadungog ka na bahin sa [paghisgot ug usa ka ulohan sa balita]. Sa dihang ang mga tawo mamatay nga wala damha, daghan ang naghunahuna kon unsang paghupay ang ikahatag ngadto sa mga pamilya sa mga biktima. Unsay imong hunahuna?” Tugoting motubag. Dayon paklia ngadto sa panid 299, ug ipakita ang esena sa pagkabanhaw nga giilustrar. Padayon pinaagi sa pag-ingon: “Daghan ang natingala sa pagkahibalo nga ang mga matarong ug di-matarong nga mga tawo pagabanhawon ngadto sa kinabuhi diha sa Paraisong yuta. [Basaha ang Buhat 24:15 ingon sa gikutlo diha sa parapo 9 sa panid 297, ug dayon ihatag ang katin-awan nga makita diha sa parapo 10.] Kining libroha naghisgot ug daghan pang makapainteres nga mga kasayoran bahin sa katuyoan sa Diyos alang sa umaabot.”
Ang Bibliya—Pulong sa Diyos o sa Tawo?
“Kita nagkinabuhi sa panahon diin halos tanang tawo nag-atubang ug seryosong mga problema. Daghan ang modangop sa tanang matang sa mga magtatambag alang sa giya. Ang uban modangop sa mga espiritista alang sa tabang. Sa imong hunahuna, asa kita makakaplag ug maayong tambag nga mosaler gayod para kanato? [Tugoting motubag.] Ang Bibliya naghisgot ug usa ka hinungdanong kamatuoran nga kinahanglang pabilhan natong tanan. [Basaha ang 2 Timoteo 3:16. Dayon paklia ngadto sa panid 187, ug basaha ang parapo 9.] Kining libroha motabang kanimo sa pagpabili kon sa unsang paagi ang pagpadapat sa giingon sa Bibliya kanunayng mopatunghag kinamaayohang mga resulta.”
Ang Labing Bantogang Tawo nga Nabuhi Sukad
“Karong panahona daghang tawo ang maghunahuna bahin kang Jesus. Apan, tungod sa daghan kaayong daotang mga butang nga nahitabo sa tibuok kalibotan, nagduhaduha ang uban kon si Jesus nagtagad ba gayod kanato. Unsay imong pagbati bahin niana?” Tugoting motubag. Paklia ngadto sa kapitulo 24, ug hisgoti kadiyot kon nganong si Jesus mianhi sa yuta. Dayon basaha ang Juan 15:13, nga magpasiugda sa kinasingkasing nga gugma ni Jesus alang sa uban.
“Kon dunay tawo nga maghisgot bahin kang Jesu-Kristo, daghang tawo maghunahuna kaniya ingong usa ka bata o nag-antos nga tawo nga himalatyon. Ang ilang panghunahuna bahin kang Jesus naglangkit lamang sa iyang pagkatawo ug iyang pagkamatay. Ang kahibulongang mga butang nga iyang gisulti ug gibuhat sulod sa iyang pagkinabuhi kasagarang nataligam-an. Ang iyang napalampos makaapektar sa tanang tawo nga nabuhi sukad niining yutaa. Kanay hinungdan kon nganong kinahanglan kitang makakat-on ug daghan kutob sa atong maarangan bahin sa kahibulongang mga butang nga iyang nabuhat para kanato.” Basaha ang Juan 17:3. Paklia ngadto sa unang panid sa introduksiyon, ug basaha ang ikaupat nga parapo.
Unsay Gikinahanglan sa Diyos Kanato?
“Nagtuo ka ba nga katuyoan sa Diyos nga kita magkinabuhi nga punog mga suliran sama nianang giatubang nato karon? [Tugoting motubag. Dayon basaha ang Mateo 6:10.] Gihunahuna mo ba kon unsa gayod kanang Gingharian sa Diyos?” Paklia ngadto sa leksiyon 6, ug basaha ang mga pangutana sa sinugdanan sa leksiyon. Hisgoti dayon ang maong leksiyon, o hikaya nga hisgotan kana sa sunod duaw.
“Bisan pa sa mga kauswagan sa modernong katilingban, ang sakit ug kamatayon padayong nagpahinabo ug dakong pag-antos ug kagul-anan sa mga tawo. Nahibalo ka ba kon unsay buhaton ni Jesus para sa mga masakiton, tigulang, ug bisan sa mga patay?” Tugoting motubag. Kon ang maong tawo gustong mahibalo sa tubag, paklia ngadto sa leksiyon 5, ug basaha ang mga pangutana para sa mga parapo 5-6. Hisgoti ang mga parapo, o hikaya nga hisgotan kana sa sunod duaw.
Simbaha ang Bugtong Matuod nga Diyos
“Sa imong hunahuna, asa kita makadangop aron masagubang ang mga kapit-os sa kinabuhi? [Tugoting motubag. Dayon basaha ang Roma 15:4.] Matikdi nga ang inspiradong Kasulatan naghatag kanato ug instruksiyon, paghupay, ug paglaom, nga makapalig-on kanato aron makalahutay sa mga kalisdanan. Kining libroha naghatag ug mapuslanong mga sugyot kon sa unsang paagi kita makabenepisyo gayod gikan sa pagbasa sa Bibliya.” Ipasiugda ang upat ka punto nga gilaraw diha sa panid 30.
“Sukad sa mga adlaw nga dinhi si Jesus sa yuta, daghang tawo nag-ampo nga moabot unta ang Gingharian sa Diyos. Nahibulong ka ba sukad kon unsay kahulogan niana para sa katawhan inig-abot sa maong Gingharian? [Tugoting motubag. Dayon basaha ang Daniel 2:44.] Kining libroha nagpatin-aw kon unsa ang Gingharian sa Diyos, kon unsay buhaton niini, ug kon sa unsang paagi kita makabenepisyo gikan sa matarong nga pagmando niini.” Ipasiugda ang ilustrasyon sa mga panid 92-3.