Tipigi Kini

Sugyot nga mga Presentasyon sa Pag-alagad sa Kanataran

Kon Unsaon Paggamit Kini nga Pasukip

Kadaghanan sa mosunod nga mga presentasyon anaa sa miaging mga gula sa Atong Ministeryo sa Gingharian. Sulayi paggamit ang daghan kutob sa imong gusto diha sa imong kalihokan sa pagsangyaw, ug tan-awa kon unsay resulta nga imong makuha. Tipigi kini nga pasukip, ug tamdi kini sa dihang mangandam alang sa ministeryo.

Imong mapukaw ang interes sa usa ka tawo sa Pulong sa Diyos kon molaktod ka sa punto. Pagsuknag espesipikong pangutana, dayon basaha ang mubong tubag sa Kasulatan. Mahimong sulayan mo kining mga sugyota:

“Samtang imong palandongon ang kaugmaon, gibati mo bang malaomon o nagaduhaduha? [Tugoting motubag.] Ang Bibliya nagtagna sa masamok nga mga hitabo nga atong makita karon ug ang epekto niini.”​—2 Tim. 3:​1, 2, 5; Prov. 2:​21, 22.

“Daghan ang nabalaka karon bahin sa pag-atiman sa panglawas. Nahibalo ka ba nga ang Diyos nagsaad nga permanenteng sulbaron niya ang tanang suliran sa panglawas?”​—Isa. 33:24; Pin. 21:​3, 4.

“Nahibalo ka ba nga ang Bibliya nagtagna nga sa ngadtongadto adunay usa na lamang ka gobyerno nga magmando sa tibuok kalibotan?”​—Dan. 2:44; Mat. 6:​9, 10.

“Unsa sa hunahuna mo ang mga kahimtang kon si Jesu-Kristo ang nagmando sa yuta?”​—Sal. 72:​7, 8.

“Daghang tawo ang nag-antos sa pagpihig tungod sa ilang pagkalalaki o pagkababaye, relihiyon, o rasa. Sa hunahuna mo unsay pagbati sa Diyos mahitungod sa maong pagpihig?”​—Buh. 10:​34, 35.

“Kita nahibalo nga si Jesu-Kristo naghimog daghang milagro sa iyang panahon. Kon makahangyo ka niya sa paghimog usa pa ka milagro, unsa man kana?”​—Sal. 72:12-14, 16.

“Kadaghanan sa mga tawo gikapoyan na sa pagpamatig mga problema. Gusto nilang makabati ug mga solusyon. Apan asa man nato makaplagi ang tinuod nga mga solusyon sa atong mga problema?”​—2 Tim. 3:​16, 17.

“Matino mo ba ang Gingharian nga ginaampo mo sa Pag-ampo sa Ginoo (o, Amahan Namo)?”​—Pin. 11:15.

Mga Igsusugod ug Panaghisgot

Ang listahan sa mga pangutana sa ubos, nga gihan-ay gikan sa mga ulohan nga makita diha sa librong Nangatarongan, nagpakita sa numero sa panid sa libro diin makaplagan ang tubag sa kada usa:

Nganong kita matigulang ug mamatay? (102; 98 E)

Unsa ang kahimtang sa mga patay? (103; 100 E)

Aduna bay undanon nga mga rason sa pagtuo diha sa Diyos? (141; 145 E)

Ang Diyos nagatagad ba gayod kon unsay mahitabo kanato nga mga tawo? (142; 147 E)

Ang Diyos ba tinuod nga persona? (143; 147 E)

Ang tanan bang maayong mga tawo mahalangit? (232; 162 E)

Kinahanglan ba ang tawo moadto sa langit aron makahupot sa tinuod malipayong ugma-damlag? (233; 163 E)

Nganong importanteng makaila ug makagamit sa personal nga ngalan sa Diyos? (217; 196 E)

Si Jesu-Kristo ba mao ang Diyos? (223; 212 E)

Unsa man ang malampos sa Gingharian sa Diyos? (182; 227 E)

Unsa ang katuyoan sa tawhanong kinabuhi? (130; 243 E)

Unsay makaabag sa pagpauswag sa kaminyoon? (113; 253 E)

Ang tanang relihiyon ba madawat sa Diyos? (362; 322 E)

Sa unsang paagi maila sa usa ka tawo kon hain ang hustong relihiyon? (368; 328 E)

Unsa ka gamhanan si Satanas diha sa kalibotan karon? (395; 364 E)

Nganong gitugotan sa Diyos ang kasakitan? (114; 393 E)

Nganong dagsang kaayo ang pagkadaotan? (300; 427 E)

Kinsa ang nagamando niining kalibotana​—Diyos o si Satanas? (94; 436 E)

Mga Sugyot sa Pagtanyag sa Gikinahanglan nga Brosyur

“Sa walay duhaduha mouyon ka nga daghang tawo ang nagtuo sa Diyos. Ang tanan nga nagtuo kaniya mouyon nga adunay gikinahanglan ang Diyos gikan kanato. Ang mga tawo wala magkauyon kon unsay gikinahanglan sa Diyos kanato?” Dayon itanyag ang Gikinahanglan nga brosyur, paklia ngadto sa leksiyon 1, ug hisgoti kana.

“Uban sa daghang suliran sa pamilya karong adlawa, nakahunahuna ka na ba kon unsay sekreto aron makab-ot ang kalipay sa pamilya?” Human makatubag, ipatin-aw nga diha sa Bibliya, ang Diyos nagbutyag sa tinuod nga sekreto sa kalipay sa pamilya. Basaha ang Isaias 48:17. Dayon paklia ngadto sa leksiyon 8 sa Gikinahanglan nga brosyur, ug hisgoti ang pipila ka gisitar nga mga bersikulo sa Bibliya nga naghatag ug kasaligang giya alang sa matag membro sa pamilya. Basaha ang listahan sa mga pangutana sa sinugdanan sa leksiyon. Pangutan-a ang maong tawo kon buot ba niyang basahon ang mga tubag.

“Kining brosyura naundan ug detalyadong kurso sa pagtuon nga nagkobre sa paninugdang mga pagtulon-an sa Bibliya. Sa matag panid, makaplagan nimo ang mga tubag sa mga pangutana nga nakapatugaw sa mga tawo sa kasiglohan. Pananglitan, Unsa ang katuyoan sa Diyos alang sa yuta?” Paklia ngadto sa leksiyon 5, ug basaha ang mga pangutana diha sa sinugdanan sa leksiyon. Pangutan-a ang tagbalay kon hain ang nakapainteres pag-ayo kaniya, ug dayon basaha ang katugbang nga (mga) parapo, nga basahon ang nahiangay nga mga teksto. Ipatin-aw nga ang makapatagbawng mga tubag sa ubang mga pangutana dali rang makaplagan sama nianang nahisgotan na. Isugyot nga mobalik ka aron hisgotan ang lain pang pangutana.

“Sa imong hunahuna unsay hinungdan sa mapintas nga mga krimen taliwala sa mga batan-on karong adlawa? Tungod ba kini sa kakulang sa ginikananong pagbansay? O aduna bay laing hinungdan, sama sa impluwensiya sa Yawa?” Tugoting motubag. Kon ang maong tawo moingon nga tungod sa impluwensiya sa Yawa, basaha ang Pinadayag 12:​9, 12. Hisgoti ang papel sa Yawa sa pagpasamot sa kagubot sa kalibotan. Dayon paklia ang Gikinahanglan nga brosyur sa leksiyon 4, ug pangutan-a kon nahibulong ba ang maong tawo kon diin gikan ang Yawa. Dayon basaha ug hisgoti ang unang duha ka parapo. Kon ang maong tawo moingon nga ang “kakulang sa ginikananong pagbansay” maoy hinungdan sa kapintasan taliwala sa mga batan-on, basaha ang 2 Timoteo 3:1-3 ug hisgoti ang mga kinaiya nga dayag nga nakapasamot nianang problemaha. Dayon paklia ang brosyur nga Gikinahanglan ngadto sa leksiyon 8, basaha ang parapo 5, ug ipadayon ang panaghisgot.

“Nagtuo ka bang makataronganon ang pagdahom nga ang Maglalalang mohatag kanatog kahibalo nga atong gikinahanglan sa pagtukod ug malamposong pamilyahanong kinabuhi?” Human makatubag, itanyag ang Gikinahanglan nga brosyur. Paklia sa leksiyon 8, ug ipatin-aw nga naundan kinig mga prinsipyo gikan sa Bibliya alang sa matag membro sa pamilya. Itanyag nga imong ipasundayag kon unsaon paggamit ang brosyur uban sa Bibliya aron maangkon ang kinadak-ang kaayohan.

“Uban sa tanang suliran nga atong giatubang niining modernong-adlawng pagkinabuhi, gibati ba nimo nga makatabang gayod kanato ang pag-ampo? [Tugoting motubag.] Daghan ang nag-ingon nga ang pag-ampo naghatag kanilag pangsulod nga kalig-on. [Basaha ang Filipos 4:​6, 7.] Bisan pa niana, ang usa ka tawo mahimong mobati nga ang iyang mga pag-ampo wala dungga. [Paklia ang Gikinahanglan nga brosyur sa leksiyon 7.] Kining brosyura nagpatin-aw kon sa unsang paagi kita bug-os nga makabenepisyo sa pag-ampo.”

“Nakigsulti mi sa atong mga silingan kon nganong adunay daghan kaayong nagkalainlaing relihiyon sa kalibotan. Apan, usa ray Bibliya. Sa imong opinyon, nganong adunay kalibog bahin sa mga relihiyon? [Tugoting motubag. Paklia ang Gikinahanglan nga brosyur sa leksiyon 13, ug basaha ang pangbukas nga mga pangutana.] Mabatonan nimo ang makapatagbawng mga tubag sa maong mga pangutana pinaagi sa pagbasa niining leksiyona.”

Human mapahimutang ang mga magasing Bantayanang Torre ug Pagmata! ngadto sa usa ka tawo, hangyoa kon mahimo ba nimong basahon ang usa ka mubong parapo ngadto kaniya. Kon tugotan ka niya, paklia ang Gikinahanglan nga brosyur sa leksiyon 5. Hisgoti ang mga pangutana nga gilista diha sa sinugdanan sa leksiyon, ug hangyoa siyang paminawon ang tubag sa unang pangutana samtang imong basahon ang unang parapo. Human mabasa ang parapo, isukna ang pangutana ug patubaga siya. Itanyag ang brosyur, ug kon kuhaon kana, hikaya nga mobalik aron mahibaloan ang iyang mga tubag sa sunod nga duha ka pangutana diha sa listahan.

Mga Sugyot sa Pagtanyag sa Kahibalo nga Libro

Nga bitbit ang Bibliya, sugdi pinaagi sa pag-ingon: “Ginapaambit namo ang usa ka teksto sa tanan dinhi sa inyong kalye niining adlawa. Kini nag-ingon . . .” Basaha ang Juan 17:​3, ug dayon mangutana: “Namatikdan ba nimo ang gisaad kon atong mabatonan ang hustong matang sa kahibalo? [Tugoting motubag.] Asa man makaplagi sa usa ka tawo ang maong kahibalo?” Human makatubag, ipakita ang Kahibalo nga libro, ug ingna: “Kining libroha nagpunting sa kahibalo nga motultol sa kinabuhing walay kataposan. Tungod kay kini nagtubag sa kadaghanang komon nga mga pangutana nga gisukna sa mga tawo bahin sa Bibliya.” Ipakita ang mga kaundan, ug pangutan-a ang maong tawo kon iya bang nahunahunaan sukad ang bisan hain sa maong mga ulohan.

“Nakahunahuna ka ba sukad kon ang Diyos nagtagad gayod bahin sa inhustisya ug pag-antos nga atong nakita sa atong palibot o ato mismong nasinatian? [Tugoting motubag.] Ang Bibliya nagpasalig kanato nga ang Diyos nahigugma kanato ug nga iya kitang tabangan latas sa mga panahon sa kalisdanan.” Basaha ang bahin sa Salmo 72:12-17. Paklia ang Kahibalo nga libro ngadto sa kapitulo 8, ug ibutyag nga kini naghatag ug makapahupay nga tubag sa pangutana nga gisukna sa milyonmilyong katawhan, Nganong gitugotan sa Diyos ang pag-antos? Kon posible, hisgoti ang pipila ka Kasulatanhong mga ideya nga gikobrehan sa mga parapo 3 hangtod sa 5, o hisgoti kana sa pagbalikduaw.

“Kadaghanan kanato namatyan na ug mga minahal. Nakahunahuna ka na ba sukad kon sila ba ato pang makita pag-usab? [Tugoting motubag.] Gipamatud-an ni Jesus nga ang atong mga minahal mahimong maluwas gikan sa kamatayon. [Basaha ang Juan 11:​11, 25, 44.] Bisan tuod nahitabo kini kasiglohan kanhi, kini nagpasundayag kon unsay gisaad sa Diyos nga buhaton alang kanato.” Paklia ang Kahibalo nga libro ngadto sa hulagway sa panid 85, ug basaha ang kapsiyon. Dayon ipakita ang hulagway sa panid 86, ug komentohi kana. Ipahiluna ang sukaranan alang sa sunod duaw pinaagi sa pagpangutana: “Buot ba nimong masayran ang hinungdan kon nganong ang mga tawo matigulang ug mamatay?” Mobalik aron hisgotan ang kapitulo 6.

“Napalandong ba nimo sukad kon nganong ang mga tawo nangandoy ug mas taas nga kinabuhi?” Human makatubag, paklia ang Kahibalo nga libro ngadto sa kapitulo 6, ug basaha ang parapo 3. Pangatarongan pinasukad sa gisitar nga mga teksto. Nagtumong sa duha ka pangutana sa kataposan sa parapo, pangutan-a ang maong tawo kon buot ba niyang mahibaloan mismo ang tubag. Kon mouyon siya, hisgoti ang sunod duha ka parapo.

“Gipangutana namo ang mga tawo kon nagtuo ba sila niini . . .” Basaha ang Genesis 1:​1, ug dayon pangutan-a: “Mouyon ka ba sa maong pahayag?” Kon mouyon ang maong tawo, nan ingna: “Mouyon usab ako niini. Apan, naghunahuna ka ba nga kon ang Diyos mao ang naglalang sa tanang butang, siya usab ang responsable sa pagkadaotan?” Human matagad ang tubag sa maong tawo, basaha ang Ecclesiastes 7:29. Paklia ang Kahibalo nga libro ngadto sa kapitulo 8, ug basaha ang parapo 2. Kon dili siya mouyon sa Genesis 1:​1, awhaga siya nga susihon ang ebidensiya nga ang Maglalalang naglungtad.​—Tan-awa ang librong Nangatarongan, mga panid 309-11 (84-6 sa Ingles).

“Mouyon ka ba nga duyog sa kusog nga nagakausab nga moral nga mga gimbut-an karong adlawa, kita nagkinahanglan ug kasaligang giya sa kinabuhi? [Tugoting motubag.] Bisan tuod kini mao ang labing karaan sa mga basahon, ang Bibliya naghatag ug praktikal nga tambag alang sa modernong pagkinabuhi ug malipayong pamilyahanong kinabuhi.” Dayon paklia ngadto sa kapitulo 2 sa Kahibalo nga libro, ug basaha ang parapo 10 ug ang unang tudling-pulong sa parapo 11, lakip ang 2 Timoteo 3:​16, 17.

“Buot ba nimong masayran kon unsay anaa sa umaabot alang kanato ug alang sa yuta? [Tugoting motubag.] Ang Bibliya naglangkob sa umaabot sa usa ka pulong​—Paraiso! Kana mao ang dapit nga gibutang sa Diyos ang unang tawhanong pares sa dihang iyang gilalang sila. Matikdi kining maong paghubit kon sama sa unsa gayod unta kadto.” Paklia ang Kahibalo nga libro ngadto sa panid 8, ug basaha ang parapo 9, ilalom sa sub-ulohang “Kinabuhi sa Paraiso.” Dayon hisgoti ang mga punto sa parapo 10, ug basaha ang gisitar nga teksto, sa Isaias 55:​10, 11. Itanyag nga padayonon ang panaghisgot kon sama sa unsa ang kinabuhi sa napasig-uling Paraiso, nga magkobre sa mga parapo 11-16.

Sa dihang mohimog mga balikduaw niadtong imong napahimutangan ug mga magasing Bantayanang Torre ug Pagmata!, makaingon ka niini:

“Sa miagi kong pagduaw, nalipay ko sa pagbilin kanimog kopya sa magasing Bantayanang Torre. Tingali namatikdan nimo nga ang tibuok ulohan sa magasin mao Ang Bantayanang Torre Nagapahayag sa Gingharian ni Jehova. Karon buot kong ipatin-aw kanimo kon unsa kini nga Gingharian ug unsay kahulogan niini alang kanimo ug sa imong pamilya.” Dayon paklia ang brosyur nga Gikinahanglan ngadto sa leksiyon 6, ug basaha ug hisgoti kana segun sa itugot sa panahon sa maong tawo.

“Miduaw ko nimo di pa dugay ug nagbilin kanimog mga kopya sa mga magasing Bantayanang Torre ug Pagmata! Kining mga magasina nagpauswag sa pagtahod sa mga tawo sa Bibliya ug sa moral nga giya niini. Tungod kay gibati ko nga angayng masabtan sa tanan ang Pulong sa Diyos, mibalik ako aron ipakita kanimo ang usa ka butang nga makatabang nimo sa paghimo niana.” Ipaila ang brosyur nga Gikinahanglan o ang librong Kahibalo, ug itanyag ang pagtuon sa Bibliya.

Sa dihang itanyag ang bisan unsang daandaang 192-panid nga mga libro, mahimo nimong sulayan kining presentasyona:

“Gipasiugda pag-ayo ang panginahanglan sa dekalidad nga edukasyon. Sa imong opinyon, unsang matanga sa edukasyon ang angayng kab-oton sa usa ka tawo aron maseguro ang labing dakong kalipay ug kalamposan sa kinabuhi? [Tugoting motubag. Dayon basaha ang Proverbio 9:​10, 11.] Kining basahona [ipaila ang ulohan sa libro nga imong itanyag] gipasukad sa Bibliya. Nagpunting kini sa bugtong tinubdan sa kahibalo nga motultol sa kinabuhing walay kataposan.” Ipakita ang usa ka espesipikong pananglitan diha sa libro, ug dasiga ang maong tawo nga basahon kana.

Ubang mga Publikasyon

Gisugyot nga mga presentasyon alang sa dugang nga mga libro ug mga brosyur nga makaplagan diha sa Watch Tower Publications Index ilalom sa:

Presentations

List by Publication

Ang Deretsong Paagi

Aron makasugod ug pagtuon sa Bibliya, gamita ang usa niining deretsong mga paagi:

“Nahibalo ka ba nga sa pipila lang ka minuto, makaplagan na nimo ang tubag sa usa ka hinungdanong pangutana sa Bibliya? Pananglitan, . . .” Dayon, isukna ang pangutana nga makita sa sinugdanan sa usa sa mga leksiyon diha sa brosyur nga Gikinahanglan ug nga gihunahuna nimong makadani sa maong tawo.

“Mihapit ako aron ipakita kanimo ang among libreng programa sa pagtuon sa Bibliya. Dangtan lamang kinig mga lima ka minuto aron mapasundayag. Makagahin ka bag lima ka minuto?” Kon mouyon, gamita ang leksiyon 1 sa brosyur nga Gikinahanglan aron ipasundayag ang pagtuon, nga magabasa lang ug usa o duha ka piniling mga teksto. Pagkahuman, pangutan-a: “Kanus-a ka makagahin ug mga 15 minutos aron makobrehan nato ang sunod nga leksiyon?”

“Daghang tawo ang adunay Bibliya, apan wala sila makaamgo nga kini nagbaton sa mga tubag sa hinungdanong mga pangutana bahin sa atong kaugmaon. Ginamit kini nga tabang sa pagtuon [ang brosyur nga Gikinahanglan o ang librong Kahibalo] sulod sa usa ka oras o kapin pa kada semana, maangkon nimo ang paninugdang kahibalo sa Bibliya sulod lang sa pipila ka bulan. Malipay ako sa pagpakita kanimo kon sa unsang paagi himoon ang programa.”

“Miduaw ako aron itanyag kanimo ang libreng kurso sa pagtuon sa Bibliya sa balay. Kon imo kong tugotan, buot kong ipasundayag kanimo sulod lang sa pipila ka minuto kon sa unsang paagi ang mga tawo sa mga 200 ka kayutaan nagtuon sa Bibliya sa balay ingong mga grupo sa pamilya. Magamit nato ang bisan hain niining mga ulohana ingong basehanan sa panaghisgot. [Ipakita ang mga kaundan sa librong Kahibalo.] Hain ang ilabinang nakapainteres kanimo?” Paabota nga makapili ang maong tawo. Paklia ngadto sa kapitulo nga napili, ug sugdi ang pagtuon sa unang parapo.

“Ako naghatag ug libreng mga leksiyon sa Bibliya ug aduna koy bakanteng panahon alang sa dugang mga estudyante. Mao ni ang tabang sa pagtuon sa Bibliya nga among gigamit. [Ipakita ang librong Kahibalo.] Ang kurso dangtan lamang ug pipila ka bulan ug nagtanyag ug tubag sa mga pangutanang sama sa: Nganong gitugotan sa Diyos ang pag-antos? Nganong kita matigulang ug mamatay? Unsay mahitabo sa atong namatay nga mga minahal? Ug unsaon nato pagduol ang Diyos? Mahimo ko bang ipasundayag ang usa ka leksiyon?”

Kon ikaw adunay nakaplagang epektibong presentasyon nga miresulta sa pag-ugmad sa interes, angay mong ipadayon ang paggamit niana! Ipahiangay lang kana sa tanyag nga literatura sa maong bulan.