Sumalig Kang Jehova sa Pagpatubo sa mga Butang
1 “Akong nasinati sa unang higayon ang talagsaong kalipay sa pagtabang sa pagtukod ug usa ka bag-ong kongregasyon. Mikabat kinig kapin sa duha ka tuig sa makugihong trabaho, kanunayng mga pag-ampo ug pagsalig kang Jehova kinsa ‘nagapatubo sa mga butang.’” Mao gayod ang gisulat sa usa ka malugotong payunir nga nakakat-on sa panginahanglan nga mosalig kang Jehova alang sa pagpatubo. (1 Cor. 3:5-9) Sa atong pagpangita ug mga tawo nga mahiligon sa espirituwal, kita usab nanginahanglag pagpaluyo sa Diyos kon ang atong ministeryo magmabungahon ugaling.—Prov. 3:5, 6.
2 Pagtubo Nanginahanglag Pagtikab: Ang binhi sa kamatuoran kinahanglang tikaron kon kini patuboon man. Ang pagduaw pag-usab sulod sa usa o duha ka adlaw human sa unang duaw kasagarang magpatunghag maayong mga resulta. Magmainiton ug magmahigalaon. Ibutang sa hayahay ang imong gikasulti. Ayawg pakyawa ang pagsulti. Tugoti siyang makaila kanimo, ug ipakita nga ikaw interesado kaniya ingong usa ka tawo.
3 Sa Agosto, kita padayong motanyag sa lainlaing mga brosyur ngadto sa mga tawo nga atong mahibalag. Bisan pa niana, kita usab kinahanglang mopaloap sa interes nga nakaplagan ug sa mga napahimutang nga nahimo. Atong mahimo kini pinaagi sa paghimog mga pagbalikduaw ug pagtanyag ug mga pagtuon sa Bibliya. (Mat. 28:19, 20) Tungod niini, ang Gikinahanglan nga brosyur hayan magamit sa pagsugod ug mga pagtuon. Hayan imong makaplagang makatabang ang mosunod nga upat ka sugyot.
4 Kon imong nakaestorya ang usa nga nabalaka sa nagkagrabeng mga kahimtang sa kalibotan, mahimong mapalunhaw mo ang panaghisgot sa pag-ingon:
◼ “Ako nagtuo nga ikaw mabalak-on sama kanako bahin sa pagkahugno sa moral diha sa tawhanong katilingban. Kita makadungog ug makapaguol nga mga taho sa kapintasan sa panimalay, nga miresulta sa pag-abuso sa mga bata, mga ginikanan, ug mga kapikas sa kaminyoon. Ug maorag daghang tawo ang mamakak o mangawat aron lamang tagbawon ang ilang kaugalingong mga tinguha. Sa imong hunahuna bililhon ba sa Diyos kon giunsa paggamit sa mga tawo ang ilang mga kinabuhi? [Tugoting motubag.] Gitukod sa Diyos ang tinong mga sukdanan alang sa tawo sa pagkinabuhi, ug kini dili gayod pabug-at alang kanato.” Basaha ang 1 Juan 5:3. Dayon ipresentar ang Gikinahanglan nga brosyur, ug paklia kana sa leksiyon 10. Basaha ang unang parapo. Ipunting ang giitalisar nga mga prase ug mga pulong sa sinugdanan sa mga parapo 2-6, ug suknaa ang tagbalay kon unsang buhata ang iyang gibati nga labing makadaot sa katilingban. Basaha ang nalangkit nga parapo ug tan-awa ang usa o duha ka kasulatan segun sa itugot sa kahigayonan. Taposa pinaagi sa pagbasa sa parapo 7, ug dayon himoa ang mga kahikayan sa pagbalik alang sa dugang panaghisgot.
5 Ngadto kanila nga imong gikahibalag nga nabalaka bahin sa ilang pamilya, ikaw makasultig ingon niini:
◼ “Sa imong hunahuna makataronganon ba ang pagdahom nga ang Maglalalang mohatag kanatog mga kahimanan nga atong gikinahanglan aron sa pagtukod ug usa ka malamposong kinabuhing pamilyahanon?” Tugoting motubag. Ipaila ang Gikinahanglan nga brosyur, paklia sa leksiyon 8, ug isaysay nga naundan kini sa mga prinsipyo gikan sa Bibliya alang sa matag membro sa pamilya. Tanyagi nga ipasundayag kon unsaon paggamit ang brosyur uban sa Bibliya aron makakuhag labing dakong kaayohan gikan niana. Sunda ang mga instruksiyon nga makaplagan sa panid 2 sa brosyur. Himoa ang mga kahikayan sa pagbalik aron ipadayon ang pagtuon sa leksiyon, o kon imong matapos kana, magtuon ug laing leksiyon nga pilion sa tagbalay diha sa brosyur.
6 Aniay deretsong paagi nga hayan imong magamit aron itanyag ang atong programa sa pagtuon sa Bibliya. Ipakita ang “Gikinahanglan” nga brosyur, ug moingon:
◼ “Kini nga brosyur naundan sa mahimsog nga kurso sa pagtuon, nga nagakobre sa paninugdang mga pagtulon-an sa Bibliya. Sa matag panid, imong makaplagan ang mga tubag sa mga pangutana nga nakapalibog sa mga tawo sa kasiglohan. Pananglitan, Unsa ang katuyoan sa Diyos alang sa yuta?” Paklia sa leksiyon 5, ug basaha ang mga pangutana sa sinugdan sa leksiyon. Suknaa ang tagbalay hain niana ang nakapainteres kaniya pag-ayo, ug dayon basaha ang katugbang nga parapo (o mga parapo), nga tan-awon ang tukmang mga kasulatan. Isaysay nga ang makapatagbawng mga tubag sa ubang mga pangutana mahimong makaplagan nga sama ra ka sayon sa gitagad nga pangutana. Isugyot nga mobalik ka aron hisgotan ang laing pangutana ug tubag.
7 O hayan gusto mong sulayan ang usa ka pinayanong paagi sa pagsugod ug pagtuon sa Bibliya pinaagi sa pag-ingon:
◼ “Nasayod ka ba nga pinaagig paggugol lamang ug pipila ka minutos, imong makaplagan ang tubag sa usa ka hinungdanong pangutana sa Bibliya? Pananglitan, . . .” Dayon hisgoti ang pangutana nga makita sa sinugdan sa usa sa mga leksiyon sa brosyur, usa nga imong gihunahunang makapatagad sa indibiduwal. Alang sa pipila ka ideya sa mga pangutana nga hayan imong magamit, tan-awa ang mga parapo 15 ug 16 diha sa pasukip sa Marso 1997 nga Atong Ministeryo sa Gingharian, nga nag-ulohan: “Pagbaton ug Kaisog sa Paghimog mga Balikduaw.”
8 Ang malipayong pagdawat sa hagit sa paghimog mga balikduaw ug pagdumalag mga pagtuon sa Bibliya maoy bahin sa pagkahimong “mga isigkamagbubuhat” sa Diyos. (1 Cor. 3:9) Samtang kita manikaysikay sa pag-ugmad sa interes nga atong makaplagan ug dayon mosalig kang Jehova sa pagpatubo sa mga butang, atong matagamtam ang tinuod nga katagbawan nga dili ikapatungha sa bisan unsang ubang buluhaton.