Unaha ang Mas Importanteng mga Butang
1 Unsa ang pipila ka importanteng mga butang nga hinungdanon sa atong espirituwal nga kaayohan? Maglakip gayod kini sa personal nga pagtuon, pagtambong sa tigom, malahutayong pag-ampo, maayong panagkauban, ug ang Kristohanong ministeryo. Dili nato mamentinar ang maayong espirituwal nga kahimsog kon dili huptan ang importanteng mga butang nga panguna sa atong mga kinabuhi.
2 Bisan pa niana, kitang tanan adunay pakig-away batok sa unodnong mga tinguha ug adunay panginahanglan sa disiplina. (Gal. 5:17) Dili gayod kita mobating may dugang maangkon sa pagpangab-ot sa hinakog nga mga intereses. (Jer. 17:9) Busa, kon buot natong bantayan ang atong kasingkasing ug makalikay nga mahisalaag, ang regular nga pagsusi sa kaugalingon maoy hinungdanon.—Prov. 4:23; 2 Cor. 13:5.
3 Susiha ang Imong Kaugalingong Kasingkasing: Mahimo nimo kini pinaagig pagsukna sa imong kaugalingon ug pipila ka prangkang mga pangutana: Gipangandoy ko ba ang pagbasa sa Pulong sa Diyos? (1 Ped. 2:2) Ako bang gipabilhan ang pagkaimportante sa pagtambong sa tanang tigom sa kongregasyon? (Heb. 10:24, 25) Nagalahutay ba ako sa pag-ampo? (Roma 12:12) Ako bang ginapangita ang panag-uban sa mahunahunaon sa espirituwal nga mga tawo? (Roma 1:11, 12) Ako bang gibati ang personal nga obligasyon sa pagpahayag sa maayong balita? (1 Cor. 9:16) Ang positibong mga tubag magpakita nga ikaw matinguhaon nga unahon ang mas importanteng mga butang.
4 Susiha ang Imong Ablaw-Ablawng Rutina: Kinahanglang imong paloapon ang pagsusi sa mga tinguha sa imong kasingkasing pinaagig pagtino sa mga unahonon alang sa paggamit ug panahon. Nagalakip kini sa makanunayong pag-eskedyul ug panahon sa pagbasa sa Bibliya ug sa matag isyu sa Ang Bantayanang Torre ug Pagmata!, maingon man ang pagpangandam sa mga tigom. Ang panahon kinahanglang igahin usab alang sa pamilya sa pagtuon ug pag-ampo nga tingob. Limitahe kon unsa ka dakong panahon ang igahin atubangan sa TV o sa kompiyuter. Magmadeterminado sa pagtambong sa tanang tigom sa kongregasyon, ug unaha gayod ang pagtambong sa tigom. Planoha nga ang tibuok pamilya makig-ambit sa pag-alagad sa kanataran sa matag semana.
5 Sa walay duhaduha, ang pag-una sa mas importanteng mga butang sa atong kinabuhi mapamatud-ang usa ka hinungdan sa kalipay.