Mga Pagtuon sa Bibliya nga Nagahimog mga Tinun-an
1 “Unsay nakapugong kanako nga mabawtismohan?” misukna ang Etiopianong yunuko human nga si Felipe ‘mipahayag kaniya sa maayong balita bahin kang Jesus.’ (Buh. 8:27-39) Sa kahimtang sa yunuko, may gugma na siya sa dinasig nga mga sinulat sa Diyos, ug human makadawat ug espirituwal nga tabang gikan kang Felipe, andam na siya sa pagkahimong tinun-an. Apan dili ang tanang tawo kombinsido nga kinahanglan nilang susihon ang Kasulatan sa ilang kaugalingon.
2 Nga mapasalamaton, ang organisasyon ni Jehova nagtagana sa brosyur nga, Unsay Gikinahanglan sa Diyos Kanato?, aron dasigon ang mga tawo sa pagsusi sa mensahe sa Bibliya sa ilang kaugalingon mismo. Diha sa pipila lamang ka mugbong mga panid, ang mga tawo makakat-og daghan bahin sa Kasulatan. Usab, sa Leksiyon 15 ug 16 kini magtabang kanila sa pagkasabot kon unsay gikinahanglan sa Diyos kanila. Kining maayong kahimanan gidisenyo sa pagdasig sa mga tawo sa mubong panahon sa paghimog mga lakang sa pagpahimuot kang Jehova.
3 Sa pagsugod ug pagtuon sa Bibliya, makatabang ang pagsubli sa ekselenteng mga sugyot nga gipatik diha sa Hunyo 1996 nga pasukip sa Atong Ministeryo sa Gingharian kon sa unsang paagi ang mabungahong pagtuon madumala diha sa Kahibalo nga libro. Sa lakat sa pagtuon, tagda ang pag-uswag nga ginahimo sa estudyante aron imong matino kon haing mga bahina ang nagakinahanglag dugang pagtagad. Dasiga ang estudyante sa pagpangandam sa iyang mga leksiyon nga abante, nga tan-awon ang mga kasulatan. Ang mga komento nga gisulti sa iyang kaugalingong mga pulong hayan magbanaag sa iyang kinasingkasing nga pagpabili sa kamatuoran. Ang kusog nga pag-uswag kasagarang mahimo niadtong kinsa nagabasag dugang sa mga publikasyon sa Sosyedad ug makanunayong nagatambong sa mga tigom sa kongregasyon. Dasiga siya sa pagsulti sa di-pormal nga paagi ngadto sa uban bahin sa iyang nakat-onan. Malulotong ipakita kaniya kon unsay iyang gikinahanglang buhaton sa paghimog espirituwal nga pag-uswag. Kinahanglang dili nato dumalahag mga pagtuon sa panahong walay tino ang mga maduhaduhaon. Ang mga estudyante kinahanglang maoy mouna sa pagkat-on, mobarog nga malig-on dapig sa kamatuoran, ug mouswag ngadto sa pahinungod ug bawtismo.
4 Sa pipila ka panimalay, kapin sa usa ka pagtuon ang ginadumala, samtang ang lainlaing mga membro sa pamilya adunay separadong mga pagtuon. Bisan pa niana, ang paghimog nahiusang pagtuon sa pamilya mahimong palabihon sa kadaghanang kahimtang, sanglit makatabang kini sa paghiusa sa pamilya sa espirituwal nga paagi.
5 Ang sugo ni Jesus mao nga kita manglakaw maghimog mga tinun-an. (Mat. 28:19) Sa pagbuhat sa ingon, kinahanglang magdumala kitag mga pagtuon sa Bibliya nga makatabang sa uban sa pag-uswag ngadto sa punto nga sila hayan mosukna, “Unsay nakapugong kanako nga mabawtismohan?”