Kon Unsaon sa Paghimog mga Tinun-an Pinaagig Librong Kahibalo

¹ Ang usa ka tilinguhaong tumong alang sa tanang Kristohanon mao ang pagtudlo sa kamatuoran ngadto sa uban ug paghimog mga tinun-an kanilang “sa husto nahimutang alang sa kinabuhing walay-kataposan.” (Buh. 13:48; Mat. 28:19, 20) Ang organisasyon ni Jehova nagbutang diha sa atong mga kamot ug usa ka talagsaong himan aron malampos kini​—ang librong Kahibalo nga Motultol sa Kinabuhing Walay Kataposan. Ang ulohan niini nagapatugbaw sa kahinungdanon sa mga pagtuon sa Bibliya sa balay, kay ang kinabuhing walay kataposan nagaagad man sa pagkuhag kahibalo kang Jehova ug sa iyang Anak, si Jesu-Kristo.​—Juan 17:3.

² Ang librong Kahibalo mao karon ang pangunang publikasyon sa Sosyedad nga gamiton sa pagdumalag mga pagtuon sa Bibliya sa balay. Ginamit kini, ikatudlo ta ang kamatuoran uban ang pagkayano, pagkatin-aw, ug pagkamubo. Kini makatabang sa pag-abot sa kasingkasing kanilang ginatudloan. (Luc. 24:32) Siyempre, adunay usa ka panginahanglan alang sa konduktor sa pagtuon nga mogamit ug maayong mga paagi sa pagpanudlo. Kini nga pasukip giandam alang niining tuyoa. Kini nagataganag mga sugyot, ug nagalaraw kini sa mga metodo sa pagpanudlo nga napamatud-an nang epektibo latas sa katuigan. Pinaagig pag-ila, ug sumala sa indibiduwal nga mga kahimtang, ikaw makaarang sa progresibong pagpadapat sa pipila o sa tanang gipresentar dinhi. Tapigi kini nga pasukip, ug sagad kining tagdon. Hayan moabag kini nimo sa pagkahimong mas epektibo sa paghimog mga tinun-an, nga nagagamit sa librong Kahibalo.

³ Pagdumalag Progresibong Pagtuon sa Bibliya sa Balay: Batoni ang tiunay personal nga interes diha sa estudyante ingong madahom Kristohanong tinun-an ug espirituwal nga igsoong lalaki o babaye. Magmainiton, magmahigalaon, ug magmaikagon. Sa pagkahimong maayong tigpaminaw, imong mailhan ang maong tawo​—ang iyang gigikanan ug situwasyon sa kinabuhi​—nga makatabang nimo sa pag-ila kon unsa ang labing maayong paaging maagak siya sa espirituwal. Magmahinangpon nga hagoon ang imong kaugalingon alang sa estudyante.​—1 Tes. 2:8.

⁴ Sa matukod na ang usa ka pagtuon, gipalabi nga ang mga kapitulo sa librong Kahibalo pagatun-an segun sa han-ay sa numero. Kini magatugot sa estudyante sa pagbaton ug progresibong pagsabot sa kamatuoran, sanglit ang libro nagaugmad sa mga ulohan sa Bibliya diha sa labing makataronganong han-ay. Hupting yano ang pagtuon ug makapainteres aron nga kini sadya ug nagapadayon. (Roma 12:11) Depende sa mga kahimtang ug katakos sa estudyante, tingali inyong maarangan ang pagkobre sa ubay-ubay nga mga kapitulo diha sa usa ka sesyon sa usa ka oras o kapin, nga walay pagdalidali sa pagtuon. Ang mga estudyante makahimog mas maayong pag-uswag kon ang magtutudlo ug ang estudyante magatuman sa ilang gikasabotan sa pagtuon matag semana. Busa, sa kadaghanang tawo, posible gayod nga makompleto ang 19 ka kapitulo sa libro sulod sa mga unom ka bulan o kapin.

⁵ Buksi ang matag sesyon sa mubong mga pahayag nga magpukaw ug interes diha sa materyal. Imong mamatikdan nga ang ulohan sa matag kapitulo mao ang tema niini, nga kinahanglang ipasiugda. Ang matag sub-titulo nagapalahi sa pangunang punto, nga magatabang kanimo sa padayong pagpalutaw sa tema sa kapitulo. Magmatngong dili maghinobrag sulti. Hinunoa, sulayan mong makapatugbaw ang estudyante. Ang pagsuknag giyang mga pangutana sa estudyante, pinasukad kon unsay iyang nasayran na, motabang kaniya sa pagpangatarongan ug sa pagdangat sa hustong mga konklusyon. (Mat. 17:24-26; Luc. 10:25-37; tan-awang Giya sa Tunghaan, panid 51, parapo 10.) Sunda gayod ang pinatik nga impormasyon diha sa librong Kahibalo. Ang pagpaila ug ekstrang mga detalye makapasimang o makapalubog sa lintunganayng mga puntos ug makapataas sa pagtuon. (Juan 16:12) Kon ang usa ka pangutana motungha nga walay kalabotan sa ulohang ginatun-an, sa kasagarang mga kahimtang imong matubag kana inigtapos sa sesyon. Kini magatugot nimo sa pagkobre sa leksiyon sa maong semana nga dili mahitipas. Isaysay ngadto sa estudyante nga sa kapulihay ang kadaghanan sa iyang personal nga mga pangutana pagatubagon samtang nagapadayon ang pagtuon.​—Tan-awang Giya sa Tunghaan, panid 94, parapo 14.

⁶ Kon ang estudyante hugot nga nagatuo sa Trinidad, pagkadi-mamatay sa kalag, impiyernong-kalayo, o uban pa sa maong bakak nga mga doktrina, ug dili makapatagbaw kaniya kon unsa man ang gipresentar diha sa librong Kahibalo, imong ikahatag kaniya ang librong Nangatarongan o ubang publikasyon nga nagahisgot sa ulohan. Sultihi siyang hisgotan mo kana uban kaniya human niya mahunahuna ang bahin sa iyang mabasa.

⁷ Ang pagsugod ug pagtapos sa pagtuon pinaagig pag-ampo alang sa giya ug panalangin ni Jehova nagapaugdang sa okasyon, nagabutang sa usa diha sa matinahorong panghunahuna, ug nagapunting kang Jehova ingong ang matuod nga Magtutudlo. (Juan 6:45) Kon ang estudyante nagapanabako pa, tingali sa kapulihay kinahanglan mong hangyoon siyang dili magtabako sa panahon sa pagtuon.​—Buh. 24:16; Sant. 4:3.

⁸ Manudlong Epektibo Pinaagig mga Kasulatan, mga Ilustrasyon, ug Pagsubling mga Pangutana: Bisan kon unsa ka daghang higayon nga siya tingali nakatuon na sa materyal sa miagi, ang batid nga magtutudlo magasubli sa matag leksiyon uban sa tinong estudyante sa hunahuna. Kini moabag nga mapanagan-an ang pipila sa mga pangutana sa estudyante. Aron makatudlong epektibo, batoni ang tin-awng pagsabot sa lintunganayng mga puntos diha sa kapitulo. Susiha ang mga kasulatan sa pagtino kon sa unsang paagi kini mapadapat sa materyal, ug hukmi kon hain niini ang angayng basahon sa panahon sa pagtuon. Palandonga kon unsaon nimo sa pagtudlo ginamit ang mga ilustrasyon ug pagsubling mga pangutana sa kataposan sa kapitulo.

⁹ Pinaagig epektibong paggamit sa mga kasulatan, imong matabangan ang estudyante sa pagpabili nga siya nagatuon gayod sa Bibliya. (Buh. 17:11) Ginamit ang kahon nga “Sinatia ang Imong Bibliya,” sa panid 14 sa librong Kahibalo, tudloi siya kon unsaon sa pagkaplag sa mga kasulatan. Ipakita kaniya kon unsaon sa pag-ila sa kinutlong mga bersikulo sa leksiyon. Segun sa itugot sa panahon, tan-awa ug basaha ang gisitar nga mga kasulatan nga wala kutloa. Pakomentoha ang estudyante kon sa unsang paagi kini nagapalig-on o nagapatin-aw sa kon unsay gihisgotan diha sa parapo. Ipasiugda ang yawing mga puntos sa mga teksto aron nga iyang mapabilhan ang mga katarongan alang sa pangunang mga puntos sa leksiyon. (Neh. 8:8) Kasagaran, walay panginahanglan alang sa magtutudlo nga dugangan ug mas pang mga teksto kay sa anaa sa libro. Komentohi ang bili sa pagkat-on sa mga ngalan ug han-ay sa mga libro sa Bibliya. Tingali makatabang sa estudyante ang pagbasa sa mga panid 27-30 sa Hunyo 15, 1991, Bantayanang Torre. Sa dihang tukma, idasig ang paggamit sa New World Translation. Sa inanay imong ikapasundayag kon unsaon sa paggamit ang lainlaing mga bahin niana, sama sa mga panaplin nga mga reperensiya ug indise sa mga pulong sa Bibliya.

¹⁰ Ang Tun-anan 34 diha sa Giya sa Tunghaan sa Teokratikanhong Ministeryo nagasaysay nga ang mga ilustrasyon nagapukaw sa mga proseso sa panghunahuna sa usa ug magapasayon sa pagsabot sa bag-ong mga ideya. Gihiusa niini ang kamadanihon sa salabotan uban sa emosyonal nga puwersa, aron ang mensahe ikasilsil uban ang puwersa nga kasagaran dili mahimo sa yanong mga pagpahayag sa kamatuoran. (Mat. 13:34) Ang librong Kahibalo adunay daghang ilustrasyon nga yano apan kusganon. Pananglitan, usa ka ilustrasyon nga gigamit diha sa kapitulo 17 nagatukod ug pagpabili kon sa unsang paagi si Jehova sa espirituwal nga pagsabot nagataganag pagkaon, besti, ug puy-anan pinaagi sa Kristohanong kongregasyon. Ang maanindot nga mga hulagway diha sa librong Kahibalo epektibong magamit aron pukawon ang mga emosyon. Ubos sa sub-titulong “Ang Malipayong Pagkabanhaw,” sa panid 185, ang epekto gayod sa parapo 18 mapalig-on pinaagig pagpatan-aw pag-usab sa estudyante sa hulagway sa panid 86. Kini makatandog kaniya sa paghunahuna sa pagkabanhaw ingong katinuoran ubos sa Gingharian sa Diyos.

¹¹ Ang mga estudyante sa Bibliya angayng maghimog espirituwal nga pag-uswag sa matag leksiyon. Tungod niining katarongana, ayawg sipyata ang pagsukna sa pagsubling mga pangutana diha sa “Taksa ang Imong Kahibalo” nga kahon nga anaa sa kataposan sa matag kapitulo. Paminawa ang labaw kay sa hustong tubag lamang sa kon unsay ginatun-an. Ang pipila niining mga pangutanaha gidesinyo sa pagpagula sa personal nga sanong gikan sa kasingkasing. Pananglitan, tan-awang panid 31, diin ang estudyante gisukna: “Unsang mga hiyas ni Jehova nga Diyos ang ilabinang nakadani kanimo?”​—2 Cor. 13:5.

¹² Bansayang mga Estudyante sa Pagpangandam sa Pagtuon: Ang estudyante kinsa nagabasa sa leksiyon nga abante, nagamarka sa mga tubag, ug nagahunahuna kon unsaon ikapahayag kini diha sa iyang kaugalingong mga pulong magpadali sa espirituwal nga pag-uswag. Pinaagi sa imong panig-ingnan ug pagdasig, imong mabansay siya sa pag-andam alang sa pagtuon. Ipakita kaniya ang imong libro, nga imong gipatugbaw o gilinyahan ang yawing mga pulong o mga prase. Isaysay kon unsaon sa pagkaplag sa diretsong mga tubag sa pinatik nga mga pangutana. Ang duyog nga pag-andam sa usa ka kapitulo tingali makatabang sa estudyante. Dasiga siyang mosulti sa iyang kaugalingon diha sa iyang kaugalingong mga pulong. Nianang panahona lamang mahimong madayag kon iya bang nasabtan ang materyal. Kon iyang basahon ang iyang tubag gikan sa libro, imong mapalihok ang iyang panghunahuna pinaagig pagsukna kaniya kon unsaon niya pagsaysay ang punto ngadto sa laing tawo diha sa iyang kaugalingong mga pulong.

¹³ Dasiga ang estudyante sa pagsusi sa wala-kutloang mga kasulatan ingong bahin sa iyang senemanang pagpangandam, basin wala na ing panahon sa pagbasa sa tanan niini sa panahon sa pagtuon. Dayega siya sa paningkamot nga iyang gihimo diha sa iyang mga leksiyon. (2 Ped. 1:5; tan-awang Agosto 15, 1993, Bantayanang Torre, mga panid 13-14, alang sa dugang mga sugyot kon unsa ang mahimo sa magtutudlo ug estudyante sa pag-uswag sa pagkakat-on diha sa pagtuon sa Bibliya.) Niining paagiha, ang estudyante mabansay sa pag-andam ug pagkomento didto sa mga tigom sa kongregasyon. Iyang makat-onan kon unsaon pag-ugmad ang mga batasan sa maayong personal nga pagtuon nga magsangkap kaniya sa padayong pag-uswag diha sa kamatuoran human makompleto ang iyang personal nga pagtuon sa Bibliya diha sa librong Kahibalo.​—1 Tim. 4:15; 1 Ped. 2:2.

¹⁴ Tultoli ang mga Estudyante Ngadto sa Organisasyon ni Jehova: Maoy responsabilidad sa tighimog tinun-an ang pagtultol sa interes sa estudyante ngadto sa organisasyon ni Jehova. Ang estudyante mas daling mouswag sa espirituwal nga pagkahamtong kon siya makaila sa organisasyon ug makaamgo sa panginahanglang mahimong bahin niana. Buot natong makaplagan niya ang kalipay sa pakig-uban sa katawhan sa Diyos ug moduyog kanato sa Kingdom Hall, nga didto iyang madawat ang espirituwal ug emosyonal nga pagpaluyo nga ginatanyag sa Kristohanong kongregasyon.​—1 Tim. 3:15.

¹⁵ Ang brosyur nga Mga Saksi ni Jehova​—Nahiusang Nagabuhat sa Kabubut-on sa Diyos sa Tibuok Kalibotan gihimo aron masinati ang mga indibiduwal sa bugtong makitang organisasyon nga gigamit ni Jehova karong adlawa sa pagpalampos sa iyang kabubut-on. Sa dihang ang pagtuon natukod na, nganong dili hatagan ang estudyante ug usa ka kopya? Gikan gayod sa pagsugod, padayong dapita ang estudyante sa mga tigom. Isaysay kon sa unsang paagi kini ginadumala. Masultihan mo siya sa ulohan sa umaabot nga pakigpulong publiko o ipakita kaniya ang artikulo nga pagahisgotan sa Pagtuon sa Bantayanang Torre. Tingali imong makuyogan siya aron makita ang Kingdom Hall sa dihang walay tigom nga ginahimo aron nga makunhoran ang bisan unsang kabalaka niya maylabot sa pag-adto sa usa ka bag-ong dapit sa unang higayon. Hayan maarangan mo sa pagtanyag ug kasakyan paingon sa mga tigom. Sa dihang siya motambong, pabatia siyang giabiabi ug komportable. (Mat. 7:12) Ipailaila siya sa ubang mga Saksi, lakip sa mga ansiyano. Nga malaomon, mosugod siya sa pag-isip sa kongregasyon ingong iyang espirituwal nga pamilya. (Mat. 12:49, 50; Mar. 10:29, 30) Tingali himoon mo ang usa ka tumong alang kaniya, sama sa pagtambong ug usa ka tigom matag semana, ug inanay nga iuswag ang tumong.​—Heb. 10:24, 25.

¹⁶ Samtang padayon ang pagtuon sa Bibliya sa balay pinaagig librong Kahibalo, ipasiugda ang mga bahin nga nagapatugbaw sa panginahanglan alang sa regular nga pakig-uban sa mga tigom sa kongregasyon. Matikdi ilabina ang mga panid 52, 115, 137-9, 159, ingon man ang kapitulo 17. Ipadayag ang imong kaugalingong lalom nga mga pagbati sa pagpabili dapig sa organisasyon ni Jehova. (Mat. 24:45-47) Sulting positibo bahin sa lokal nga kongregasyon ug bahin sa kon unsay imong nakat-onan diha sa mga tigom. (Sal. 84:10; 133:1-3) Maoy maayo kon ang estudyante makakita sa mga video sa Sosyedad, sugod sa Jehovah’s Witnesses​—The Organization Behind the Name. Alang sa dugang mga ideya kon sa unsang paagi mapunting ang interes ngadto sa organisasyon, tan-awang Mayo 1, 1985, Bantayanang Torre, mga panid 14-18, (Nobyembre 1, 1984 sa Ingles) ug ang Abril 1993 Atong Ministeryo sa Gingharian nga pasukip.

¹⁷ Dasigang mga Estudyante sa Pagpanaksi Ngadto sa Uban: Ang atong tumong sa pagtuon uban sa mga tawo mao ang paghimog mga tinun-an kinsa nagapanaksi dapig kang Jehova. (Isa. 43:10-12) Kana nagakahulogan nga ang magtutudlo nagadasig sa estudyante nga mosulti ngadto sa uban kon unsa ang iyang nakat-onan gikan sa Bibliya. Kini mahimo sa yanong pagsukna: “Unsaon nimo pagsaysay kining kamatuorana sa imong pamilya?” o “Unsang kasulatan ang imong magamit sa pagpamatuod niini sa imong higala?” Ipasiugda ang angayng mga luna diha sa librong Kahibalo diin ang pagpanaksi gidasig, sama sa mga panid 22, 93-5, 105-6, maingon man ang kapitulo 18. Ang estudyante hayan matagaan ug pipila ka tracts nga magamit sa di-pormal nga pagsangyaw ngadto sa uban. Isugyot nga dapiton niya ang mga membro sa iyang pamilyang motambong sa iyang pagtuon. Aduna ba siyay mga higala kinsa buot usab nga magtuon? Hangyoa siyang ipaila ka ngadto kanilang mga interesado.

¹⁸ Pinaagig pagtambong sa Teokratikanhong Ministeryong Tunghaan ug sa Tigom sa Pag-alagad, ang gilaomang tinun-an makadawat ug dugang pagbansay ug pag-agda nga makatabang kaniyang mahimong usa ka magmamantala sa maayong balita. Sa dihang magapadayag siya sa tinguhang magpatala diha sa tunghaan o mahimong di-bawtismadong magmamantala, ang mga prinsipyo nga gilatid sa mga panid 98 ug 99 sa librong Atong Ministeryo mapadapat. Kon ang usa ka bahin sa iyang kinabuhi nagapugong kaniyang mahimong takos, ikaw makapangita diha sa mga publikasyon sa Sosyedad alang sa makatabang nga materyal nga nagahisgot sa maong butang ug ipaambit kini kaniya. Pananglitan, ang usa ka estudyante tingali nalisdan sa pagbuntog sa pagkagiyan sa tabako o ubang mga droga. Ang librong Nangatarongan nagapunting ug kusganong Kasulatanhong mga katarongan kon nganong ang mga Kristohanon magalikay sa maong makadaot nga mga batasan, ug sa panid 153 kini nagalaraw ug paagi nga napamatud-ang malamposon sa pagtabang sa uban nga makalingkawas. Pag-ampo uban kaniya bahin sa maong butang, nga nagatudlo kaniya sa paglig-on sa iyang pagsalig kang Jehova alang sa tabang.​—Sant. 4:8.

¹⁹ Ang paagi nga pagasundon sa pag-ila kon ang usa takos ba nga makig-ambit sa publikong ministeryo gilaraw sa Enero 15, 1996, Bantayanang Torre, panid 16, parapo 6. Sa dihang ang estudyante mahimong takos, maoy makatabang nga maghimog praktis sesyon sa pag-andam kaniya alang sa iyang unang adlaw diha sa pag-alagad sa kanataran. Sa positibong paagi, hisgoti ang mga sanong ug mga pagsupak sa mga tawo nga sagad sa inyong teritoryo. Pasugda siya diha sa pamalaybalay nga buluhaton kon ugaling posible, ug inanayng bansaya siya sa ubang mga bahin sa ministeryo. Kon huptan mo ang imong presentasyon nga mubo ug yano, mahimong sayon kaniya sa pagsundog. Himoang makapalig-on ug madasigon, nagabanaag ug kangaya diha sa buluhaton, aron nga siya makamatikod sa imong espiritu ug magabanaag niana. (Buh. 18:25) Ang tumong sa usa ka bag-ong tinun-an mao gayod ang pagkahimong regular, masibotong magmamantala sa maayong balita. Tingali imong matabangan siya nga makahimog usa ka praktikal nga eskedyul alang sa pag-alagad. Aron siya magauswag sa iyang katakos sa pagpanaksi ngadto sa uban, hayan makasugyot ka nga iyang basahon ang mga isyu sa Bantayanang Torre sa Agosto 15, 1984, mga panid 15-25; Hulyo 15, 1988, mga panid 9-20; Enero 15, 1991, mga panid 15-20; ug Enero 1, 1994, mga panid 20-5.

²⁰ Palihoka ang mga Estudyante Ngadto sa Pahinungod ug Bawtismo: Maarangan gayod alang sa usa ka mabuot-kasingkasing nga estudyante sa pagkat-on ug igo pinaagig pagtuon sa librong Kahibalo sa paghimog usa ka pahinungod sa Diyos ug mahimong takos alang sa bawtismo. (Itandi ang Buhat 8:27-39; 16:25-34.) Apan, sa di pa ang usa ka tawo palihokon sa paghimog usa ka pahinungod, kinahanglang ugmaron niya ang debosyon ngadto kang Jehova. (Sal. 73:25-28) Latas sa katibuk-an sa pagtuon, pangitag kahigayonan sa pagtukod ug pagpabili alang sa mga hiyas ni Jehova. Ipadayag ang imong kaugalingong lalom nga mga pagbati alang sa Diyos. Tabangi ang estudyante sa paghunahuna sa paaging maugmad ang mainit, personal nga relasyon uban kang Jehova. Kon siya gayod makadangat sa pag-ila ug sa paghigugma sa Diyos, nan siya magaalagad Kaniya nga maunongon, kay ang diyosnong debosyon may kalabotan kon unsay atong pagbati bahin kang Jehova ingong usa ka persona.​—1 Tim. 4:7, 8; tan-awang Giya sa Tunghaan, panid 76, parapo 11.

²¹ Paningkamoting matandog ang kasingkasing sa estudyante. (Sal. 119:11; Buh. 16:14; Roma 10:10) Kinahanglan niyang masabtan kon sa unsang paagi ang kamatuoran nagaapektar kaniya sa personal ug maghukom kon unsa ang angay niyang himoon sa iyang nakat-onan. (Roma 12:2) Siya ba gayod nagatuo sa kamatuoran nga gipresentar kaniya matag semana? (1 Tes. 2:13) Tungod sa maong tumong, imong mapasulti ang estudyante pinaagig pagpangutanag mailahong punto de vista nga mga sukna, sama sa: Unsay imong pagbati bahin niini? Unsaon nimo sa pagpadapat niini sa imong kinabuhi? Pinaagi sa iyang mga komento hayan mailhan mo kon asa nga ang dugang tabang gikinahanglan aron matandog ang iyang kasingkasing. (Luc. 8:15; tan-awang Giya sa Tunghaan, panid 52, parapo 11.) Ang mga ulohan alang sa mga hulagway sa mga panid 172 ug 174 diha sa librong Kahibalo misukna: “Ikaw ba nakapahinungod na sa Diyos diha sa pag-ampo?” ug “Unsay nakapugong kanimo sa pagpabawtismo?” Kini mahimong epektibong makaagda sa estudyante sa paglihok.

²² Ang paagi nga pagasundon sa dihang ang usang di-bawtismadong magmamantala nagatinguhang mabawtismohan gilaraw diha sa Enero 15, 1996, Bantayanang Torre, panid 17, parapo 9. Ang librong Kahibalo gisulat uban ang tumong sa pagsangkap sa tawo sa pagtubag sa “Mga Pangutana Alang Kanilang Nagatinguhang Mabawtismohan,” nga makaplagan diha sa apendise sa librong Atong Ministeryo, nga maoy irepaso sa mga ansiyano uban kaniya. Kon imong napasiugda ang mga tubag sa mga pinatik nga mga pangutana diha sa librong Kahibalo, ang estudyante angay gayod nga nasangkapan alang sa mga sesyon sa pangutanang ginadumala sa mga ansiyano ingong pagpangandam alang sa iyang bawtismo.

²³ Tabangi Silang Nakahuman sa Pagtuon sa Bibliya sa Balay: Kinahanglang madahom nga sa panahong ang usa ka tawo makakompleto sa usa ka pagtuon diha sa librong Kahibalo, ang iyang sinseridad ug kalalom sa interes sa pag-alagad sa Diyos madayag na. (Mat. 13:23) Mao kana kon ngano ang kataposang sub-ulohan sa libro nagasukna, “Unsay Imong Buhaton?” Ang pangataposang mga parapo nagadani sa estudyante sa pagpunting sa relasyon nga angayng iyang naugmad uban sa Diyos, ang panginahanglan sa pagpadapat sa kahibalo nga iyang nakat-onan, ug ang panginahanglang molihok gilayon sa pagpasundayag sa iyang gugma alang kang Jehova. Walay tagana alang sa pagtuon sa dugang mga publikasyon uban kanilang nakakompleto na sa librong Kahibalo. Isaysay nga maluloton ug matin-aw ngadto sa estudyante kinsa napakyas sa pagsanong diha sa kahibalo sa Diyos kon unsa ang iyang angayng himoon aron sa pag-uswag sa espirituwal. Tingali sa pupanahon imong mapadayon ang pagkontak kaniya, nga padayong bukas ang dalan alang kaniya sa paghimog mga lakang nga motultol sa kinabuhing walay kataposan.​—Eccl. 12:13.

²⁴ Ang bag-ong tinun-an kinsa nagadawat sa kamatuoran ug mabawtismohan adunay dako pa gayong pagtubo nga pagahimoon sa iyang kahibalo ug pagsabot aron mahimong bug-os makabarog sa pagtuo. (Col. 2:6, 7) Inay kay ipadayon ang iyang pagtuon sa Bibliya sa balay human makompleto ang librong Kahibalo, ang imong kaugalingon anaa man sa pagtaganag bisan unsang personal nga tabang nga hayan iyang gikinahanglan aron mohamtong sa espirituwal. (Gal. 6:10; Heb. 6:1) Alang sa iyang bahin, iyang makompleto ang iyang pagsabot pinaagig pagbasa sa Bibliya matag adlaw, personal nga magtuon sa Ang Bantayanang Torre ug ubang mga publikasyon sa matinumanong ulipon, pag-andam ug pagtambong sa mga tigom, ug paghisgot sa kamatuoran sa kaubang mga magtutuo. (Mat. 24:45-47; Sal. 1:2; Buh. 2:41, 42; Col. 1:9, 10) Ang iyang pagbasa sa librong Atong Ministeryo ug pagpadapat kon unsay unod niini magadulag hinungdanong bahin sa pagkahimo niyang organisado sa teokratikanhong paagi sa pagtuman sa iyang ministeryo nga bug-os.​—2 Tim. 2:2; 4:5.

²⁵ Ugmara ang Arte sa Pagtudlo: Kita gisugo sa “paghimog mga tinun-an sa katawhan . . . , magatudlo kanila.” (Mat. 28:19, 20) Sanglit ang arte sa pagtudlo nalanggikit man gayod sa paghimog tinun-an, buot natong manlimbasog nga mouswag ingong mga magtutudlo. (1 Tim. 4:16; 2 Tim. 4:2) Alang sa dugang mga sugyot kon unsaon sa pag-ugmad ang arte sa pagtudlo, hayan buot mong basahon ang: “Pag-ugmad sa Arte sa Pagtudlo” ug “Pagtandog sa Kasingkasing sa Imong mga Tigpatalinghog” diha sa Giya sa Tunghaan, mga tun-anan 10 ug 15; “Teacher, Teaching” sa Insight, Tomo 2; ug ang mga artikulo sa Bantayanang Torre “Pagtukod nga Gigamit ang Materyales nga Dili Masunog” ug “Sa Dihang Magatudlo Ka, Abota ang Kasingkasing,” Pebrero 1, 1985 (Agosto 1, 1984 sa Ingles); “Epektibo Ka Bang Mangatarongan Gikan sa Kasulatan?” sa Marso 1, 1986; ug “Kon Unsaon sa Pagkaplag ug Kalipay sa Paghimog Tinun-an,” Pebrero 15, 1996.

²⁶ Samtang nagapanlimbasog ka sa paghimog mga tinun-an, ginamit ang librong Kahibalo, mag-ampo kanunay kang Jehova, ang usa “nga maoy nagapatubo,” nga panalanginan ang imong mga panikaysikay sa pagtandog sa tawhanong mga kasingkasing pinaagig maayong balita sa Gingharian. (1 Cor. 3:5-7) Matagamtam mo unta ang kangaya sa pagtudlo sa uban sa pagsabot, sa pagpabili, ug sa paglihok maylabot sa kahibalo nga motultol sa kinabuhing walay kataposan!