Ting-eskuyla na Usab

¹ Sa Hunyo ang atong mga batan-on mosugod sa usa ka bag-ong tuig nga ting-eskuyla. Adunay makapalipayng mga butang nga dahomon, apan adunay pipila ka butang usab nga makapabalaka. Daghang batan-on ang maasayn sa lainlaing mga magtutudlo, matala sa bag-ong mga kurso, ug makig-uban sa mga estudyante kinsa mga dili kaila. Ang atong mga batan-on buot nga motambayayong sa mga awtoridad sa eskuylahan ug magmahigalaon sa kaubang mga estudyante, apan nanginahanglan silang magbantay batok sa bisan unsa nga makadaot sa espirituwal nga paagi.​—1 Cor. 15:33.

² Ang dakong tagdonon alang sa kabataang Saksi mao ang paglikay sa makatakod nga impluwensiya sa kalibotan, nga nagatuhop sa mga sistema sa edukasyon karong adlawa. Ang mga Kristohanon kinahanglang magmaisogon sa pagsalikway sa kalibotanong mga sukdanan ug panghunahuna nga ginapasiugda karon bahin sa mga moral, ug sila kinahanglang ‘padayong magmatngon’ pinaagig kanunayng pagkonsulta ug pagpagiya sa Pulong ni Jehova. (Sal. 119:9) Ang mabalak-ong mga ginikanan angayng masayod kon unsa ang naapil sa curriculum sa eskuylahan aron makahatag ug tukmang pagtultol sa ilang kabataan. Kon unsay gitudlo sa eskuylahan nga mosumpaki sa pagkabalaan ug kaputli nga gikinahanglan sa mga alagad ni Jehova, kinahanglang likayan kana.​—1 Ped. 1:15, 16.

³ Sagad usab nga masagubang ang mga isyu nga nagalambigit sa nasyonalistikanhong mga seremonyas, mga selebrasyon sa piyesta opisyal, mga kalihokang esports, o sosyal nga mga panagtapok. Ang brosyur nga Mga Saksi ni Jehova ug Edukasyon makatabang sa mga batan-on bahin niining mga butanga. Ang malisod nga mga situwasyon makunhoran sa dihang ang mga ginikanan sa batan-ong mga anak moduol sa mga magtutudlo uban ang kopya niining publikasyona. Sila makasaysay nga kini makatabang sa magtutudlo nga masabtan kon nganong ang mga Saksi ni Jehova nagapili nga dili moapil sa pipila ka kalihokan. Kini hayan dakog mahimo sa pagpatunghag usa ka espiritu sa kooperasyon.

⁴ Dugang pa, maoy maayo alang sa Kristohanong mga estudyante nga magbaton ug personal nga kopya sa Edukasyon nga brosyur uban sa ilang materyal sa tun-anan sa eskuylahan. Ang higayon sagad motungha sa paghatag ug pagpamatuod ngadto sa ubang mga estudyante kinsa mangutana sa dihang mahisgotan ang atong mga pagtulon-an. Usab, ang kabataang Saksi kinahanglang sa tanang panahon dala nila ang ilang kinaulahiang Advance Medical Directive/Release card o Identity Card nga tukmang gisaksihan, ug pinermahan. Silang nagapadapat niining tambaga mahimo gayong sama sa ‘mabuot nga tawo kinsa makakita sa daotan ug magatago sa iyang kaugalingon.’​—Prov. 22:3.