Tunghaan ug mga Saksi ni Jehova—Ang Pulyeto Nagatabang
Ang mga batang mobalik sa tunghaan karong tuiga nagkinahanglan sa tanang tabang nga ilang madawat, ilabina kadtong nagapaningkamot sa pagsunod sa diyosnong mga prinsipyo. Duha ka tuig nga miagi ang 32-panid nga basahong School and Jehovah’s Witnesses gitagana sa paghatag sa maong tabang.
INGON nga pamilya, nakasubli ba mo sa mga sulod sa School and Jehovah’s Witnesses? Matikdi ang unang mga pulong sa basahon: “Kining pulyetoha gipatik aron mouswag ang pagsinabtanay ug kooperasyon tali sa mga Saksi ni Jehova ug sa mga awtoridad sa tunghaan. Among tinguha nga mokooperar sa tanang nagapaningkamot alang sa kalamposan sa paninugdang mga programa sa edukasyon nga gitanyag sa tunghaan.”
Busa buot nimong matinong ang mga magtutudlo ug mga prinsipal magbaton ug personal nga kopya. “Hinungdanong ang mga ginikanan masinati sa mga magtutudlo sa ilang mga anak—nga maghimog mga kahikayan sa pagpakigkita ug pagpakigsulti kanila,” matud sa pulyeto. Busa, kon ang magtutudlo wala pa makadawat sa pulyeto, ang maong miting maoy nahiangayng panahon sa pagpresentar niana ug pagsaysay sa mga bahin niini. Kini tinuod nga tabang!
Tabang sa mga Magtutudlo
Usa ka inahan nga taga-Peoria, Illinois, misulat: “Ang magtutudlo sa among anak lalaki nagpasalamat kanamo sa makadaghan tungod sa paghatag kaniya sa pulyeto. Siya miingon nga kini nakatabang kaniya ‘dili lamang sa pagpahiuyon kondili sa pagsabot gayod sa baroganan sa mga Saksi sa daghang isyu.’
“Tungod niini, nakaarang kami sa paghupot nga bukas sa kanal sa komunikasyon. Ang magtutudlo sa among anak misulti kanamo nga ang pulyeto iyang gihimong mabatonan kanunay, ug kon siya dili makatino kon ang among anak angay bang moapil sa usa ka kalihokan sa tunghaan, iyang susihon ang pulyeto sa dili pa ang klase ug palakton siyang hilom ngadto sa laing proyekto kon kinahanglanon. . . .
“Sa makadaghan siya misulat sa akong bana ug kanako alang sa dugang katin-awan. Kami nakahatag ug dugang impormasyon kaniya latas sa tuig sa tunghaan, ug nakatin-aw kami sa daghang sayop nga impormasyong iyang nabatonan mahitungod sa mga Saksi.
“Ang maong pulyeto tinuod nakakab-ot sa katuyoan niini sa among bahin, nga nagpahinabo sa mas maayong relasyon tali sa tunghaan, estudyante, ug mga ginikanan.”
May mga panahong ang magtutudlo tingali dili makasabot sa tukma sa mga pagtuo sa mga Saksi ni Jehova. Unya iyang mabatonan ang dungog sa pagkadili-kooperatibo. Ang usa ka inahan nga taga-Salem, Oregon, misulat mahitungod sa tersero-grado nga magtutudlo sa iyang anak babaye nga may ingong dungog:
“Wala madugay sa pagsugod sa pagtungha kami nagbaton sa among unang ginikanan-magtutudlo nga miting. Gipresentar ko sa magtutudlo ang pulyetong School and Jehovah’s Witnesses. Akong gipunting ang kooperatibong tinamdan niini, nga mipakitang ang katawhan ni Jehova buot mahimong mga katabang sa mga magtutudlo. Misugyot ako nga basin buot niyang tipigan ang maong pulyeto ingong giya sa pagsabot sa among anak ug sa ubang Saksing estudyante nga mahimong iyang mabatonan sa umaabot nga katuigan.
“Ang iyang sanong nakapatingala kanako, kay akong gidahom nga akong maagoman ang una kong kasinatian sa dili-kooperatibong magtutudlo. Maikagon niyang gikuha ang pulyeto, gipakli kana sa madali ug maorag sinsero sa mitubag siya nga malipay gayod siya nga may makapatin-aw sa atong mga pagtuo ug mga tulomanon.
“Mibalik ako pila ka adlaw sa ulahi ug misukna sa magtutudlo kon siya nakapanahon ba sa pagbasa sa pulyeto. Siya miingong siya milingkod sa katre ug mibasa niana sa bug-os—gikan sa atubangan ngadto sa likod. Miuyon siya nga ang impormasyon maayo kaayong pagkapahayag; nalipay kaayo siyang nakabaton niadto. Giingnan ko siya nga kon ugaling siya may mga pangutana mahitungod niana o sa mga lihok sa among anak mahimo nga iya akong pahibaloon. Iya akong gipasaligan nga iya akong pahibaloon.
“Usa ka bulan sa ulahi, samtang ang klase puliki sa pagpangandam alang sa Adlaw sa Patay, ang among anak babaye nagpakita kanamo sa usa ka workbook ug misaysay nga siya lamang sa klase ang duna niadto. Gihatagan siya niadto sa magtutudlo ug gisultihan siya nga kadto ang iyang buhaton dihang ang klase may buhaton nga sa iyang pagbati dili niya angay buhaton.
“Ang maong pulyeto, School and Jehovah’s Witnesses, sa pagkamatuod mao ang labing maayong butang nga may taktika ug kooperatibong espiritu ug pagkapraktikal.”
Daghang ubang pamilya nga nagpahimulos sa pulyetong School mipahayag sa susama. Sila nalipay sa positibong sanong sa mga magtutudlo nga nagpabili sa mga giya nga gitagana.
Tabang sa Saksing mga Estudyante
Sa linain, ang Saksing mga estudyante nakabatog kaayohan, ug daghan ang nagpahayag sa pasalamat. Usa ka batang babaye nga taga-Ontario, Canada, mitaho:
“Ang among magtutudlo sa historya nakigsulti sa klase bahin sa iyang pagabation kon ang mga tawo dili motindog alang sa nasodnong awit panahon sa mga dulang hockey ug ubang dula. Siya miingon nga kadto maoy dili pagtahod dili lamang sa nasod kondili sa uban usab. Buot kong makigsulti kaniya human sa klase, apan ako wala makahigayon. Busa gisulatan ko siya ug gisukip ang pulyeto. . . . Sa akong katingala siya mibalos. Kini ang iyang gisulat.
“‘Ang imong relihiyosong mga pagtuo maoy imong kaugalingon. Sila personal kaayo, nga takos sa pagtahod ug nahiangayng konsiderasyon, pinaagi kanimo ug niadtong wala magbaton sa imong pagtuo. Palihog, ayaw hubara ang akong mga pagbati ug mga opinyon ingong pagsaway kanimo o sa imong mga pagtuo. Nagalaom ako sa pagpahayag sa mga tinamdan sa pagtahod ug pagkamatinugoton ug aktibong magpaluyo sa katungod sa kagawasan sa relihiyon ni bisan kinsang tawo. . . . Salamat sa pulyeto, kadto malamdagon kaayo.’”
Sa masubsob ang pulyetong School nakatabang sa mga magtutudlo sa pag-ila sa mga pagtuo sa mga Saksi ni Jehova ug pagpakiglabot nga masinabtanon sa mga estudyante. Ang mga batan-on nga nagapaningkamot sa pagsunod sa diyosnong mga prinsipyo sa ingon matabangan. Sumala sa giingon sa batang babaye nga taga-Oregon: “Tungod niana labi pang sayon nga kami makigsulti sa mga magtutudlo ug kaubang mga estudyante mahitungod sa atong mga pagtuo.” Busa paneguroa nga ang mga magtutudlo magbaton sa pulyeto ug madasig sa pagbasa niana.