School and Jehovah’s Witnesses—Gigamit ba Nimo Kini?

ANG pulyetong School and Jehovah’s Witnesses gitagana sa pagtabang sa mga awtoridad sa eskuylahan sa pagsabot nganong ang Saksing mga batan-on dili moapil sa pila ka okasyon ug programa sa eskuylahan. Kini nagatabang usab sa mga Saksi ni Jehova sa pagsaysay kon ngano, ingong resulta sa ilang mga pagtuo, nabatonan nila ang maong baroganan.

Ugaling, aron matuman sa pulyeto ang gipahayag niini nga katuyoan, “ang pagpauswag sa pagsinabtanay ug kooperasyon tali sa mga Saksi ni Jehova ug sa mga awtoridad sa eskuylahan,” ang Saksing mga pamilya kinahanglang unang magtuon niini ug unya tinoong ang mga magtutudlo makadawat ug kopya. Kadtong nagagamit sa pulyetong School nakapahimulos ug maayong mga resulta.

Pananglitan, sa Mayo 6, 1983, ang Ministeryo sa Edukasyon sa Bahamas nagpadalag sirkular nga naghikay sa programa sa pagtigom sa buntag alang sa tanang eskuylahan. Ang kataposang tudling-pulong sa sirkular nag-ingon: “Palihog matikding sa mga butang maylabot sa Nasodnong mga Simbolo wala itugot ang kaugalingong pagbuot.”

Apan, unya, sa ting-init sa 1983, ang pulyetong School giluwatan panahon sa mga kombensiyon sa mga Saksi ni Jehova ug gigamit sa Bahamas. Lagmit ingong resulta sa maong paggamit, dihang ang bag-ong sirkular gipadala ngadto sa mga prinsipal sa mga eskuylahan sa Enero 18, 1984, may kompletong pagbalit-ad bahin sa nasodnong mga simbolo. Sa kataposang parapo ilalom sa ulohang “PAG-APIL SA ESTUDYANTE SA PATRIOTIKONG MGA KALIHOKAN SA ESKUYLAHAN,” ang sirkular miingon:

“Ang pagsaludar sa bandera ug sa nasodnong alawiton gituyo sa pagsilsil sa nasodnong garbo ug pagbati sa patriotismo diha sa katawhan ug sa nasod. Basta adunay nagkalainlaing nasod, ang bandera ug ang nasodnong mga alawiton may ilang dapit diha sa organisadong katilingban. Bisan pa niana, kon ang usa ka pundok nakabaton, ingong usa sa mga pagtulon-an sa relihiyon niini nga ang pag-awit sa nasodnong alawiton ug pagsaludar sa bandera maoy pagano ug busa gidili, nan ang batakang-balaod nagamando nga kinahanglang sila hatagan sa kagawasan sa pagtudlo ug paghunahuna niana.”

Apresasyon sa mga Awtoridad sa Eskuylahan

Ang mga awtoridad sa eskuylahan mapasalamaton kaayo nga nasayod sa unsang paagi ang mga pagtuo sa mga Saksi ni Jehova nagaapektar sa ilang pag-entra sa mga kalihokan sa eskuylahan. Ang usa ka kopya sa pulyeto gibilin kang Gn. Andre Lemieux, ang prinsipal sa Chibougamau School Board sa Quebec, Canada, ug sa ulahi iyang gisultihan ang Saksing mihatag niadto: “Ang inyong pagtulon-an nangayong among ipahigawas ang inyong mga anak gikan sa mga saulog sa pangilin ug kami wala makasabot ngano, bisan pag ilang gisaysay kana kanamo. Apan tungod niining pulyetoha, labi pa namong masabtan ang inyong mga anak ug among tagdon ang inyong moral nga mga prinsipyo.”

Unya siya nangutana: “Posible bang makabaton ug walo alang sa tanang eskuylahan, labing menos usa alang sa matag eskuylahan?” Sa giingnan nga kadto dili suliran, siya miingon: “Kon maohon, dawaton nako ang 40 ingong pagsugod.” Siya midugang, “Kon ang tanang relihiyon magpatin-aw sa pagtulon-an niini, menos ang atong mga suliran sa mga bata. Salamat kaayo.”

Ang usa ka Saksing ginikanan sa estado sa Kentucky sa Tinipong Bansa mipatin-awng ang iyang mga anak may bag-ong prinsipal, mao nga siya miadto sa eskuylahan aron makigsulti kaniya, nga gidala ang pulyetong School. “Gisusi niya kadto pag-ayo,” siya miingon, “ug buot masayod kon may dugang pa akong makuha. Ako natingala sa nangayo siyag dugang 25. Siya miingong buot niyang hatagan ug usa ang matag magtutudlo.”

Ang maong inahan nakigsulti usab sa mga magtutudlo sa iyang mga anak. Sila miingon kaniyang buot ra nilang magtudlo sa Saksing mga bata apan usahay sila dili makasabot sa mga hinungdan sa ilang mga lihok. Bisan pa niana, ang inahan misulat: “Tapos sa pagbasa sa pulyeto, natubag ang daghan sa ilang mga pangutana, ug tungod niadto mas sayon na ang pag-eskuyla alang sa akong mga anak ug sa ubang anak sa Saksi sa samang eskuylahan.”

Ang usa ka inahan nga taga-New York City misulat nga ang iyang 8-anyos nga kaluhang anak babaye may problema sa pagpasabot sa ilang mga magtutudlo sa ilang mga pagtuo. “Ang usa ka magtutudlo nga nagatudlo kanilag musika napikal kaayo mahitungod sa nasodnong mga alawiton ug mga adlaw sa pangilin,” matud niya. “Gisulayan sa among mga anak babaye sa pagpatin-aw ngadto kaniya sa among baroganan ug gihatagan siya sa pulyeto.” Unsa ang resulta? Iya silang gipasalamatan, ug sa ulahi misulat kanila mahitungod sa pulyeto:

“Kini nagapahayag nga tin-aw kaayo kon unsa sa eksakto ang hunahuna sa mga Saksi mahitungod sa nagkalainlaing pangilin ug nganong sila dili moapil niana. Akong nahibaloan ang pipila ka hinungdan sa nangagi, apan wala ako mahibalo sa uban. Ingong magtutudlo akong gibati nga kon labaw akong masinati sa nagkalainlaing relihiyon sa akong mga estudyante, labaw ko pa silang hisabtan.”

Pagpasalamat sa Batan-ong mga Saksi

Gipasalamatan ilabina sa mga batan-on ang pulyeto. “Ang laing kaayohan mao ang reaksiyon sa akong mga anak,” misulat ang usa ka inahan nga taga-British Colombia, Canada. “Ang pagkainahan nga may bana nga dili magtutuo usahay mapamatud-ang lisod kon bahin sa paglig-on sa hunahuna ni Jehova bahin sa mga pangilin, bandera, ubp. Apan tungod kay ang mga batang babaye nasayod nga ang magtutudlo nagadahom gayod nga sila malahi, ang dalan nahimong sayon alang kanila. Sila manguli sa balay nga magsulti kanako mahitungod sa mga panahong sila mibarog, sa dihang sa nangagi sila mahadlokon. Gisugid usab nila kanako ang mga okasyon diin hilom nga gitabangan sila sa magtutudlo sa paglingkawas sa mga kahimtang pinaagi sa usa o duha ka malulutong pulong.”

Ang ubay-ubayng batan-on nagsulat sa pagsugid sa unsang paagi sila natabangan sa pulyeto. Ang usa ka batan-on nga taga-Chicago, Illinois, misugid mahitungod sa usa ka magtutudlo nga nagpit-os kaniya sa pagkandidata alang sa pagkarayna sa eskuylahan (homecoming queen). “Sa pagkaugma akong gidala ang pulyeto,” matud sa dalaga, “ug sa dihang iyang nabasa ang bahin sa pagkarayna sa eskuylahan miingon siyang dili kinahanglang ako moapil sa bangga. Kadto nahimong sayon kaayo.”

Usa ka batan-ong taga-Georgia, sa Tinipong Bansa, mipatin-aw nga ang iyang magtutudlo, nga iyang gihatagan sa pulyeto, malulutong nagpahigawas kaniya sa pag-apil sa pila ka kalihokan tapos sa pagbasa niana. “Kini nga pulyeto importante kaayo alang sa mga batan-ong nagaeskuyla,” misulat ang batan-on, “ug buot kong pasalamatan kamo niini. Maayo nga ang Sosyedad nagahunahuna sa mga batan-on nga kinahanglang moatubang niining mga sulirana.”

Ang pulyetong School usa gayod ka maayong galamiton sa pagtabang sa pagpauswag sa pagsinabtanay ug kooperasyon tali sa mga Saksi ni Jehova ug sa mga awtoridad sa eskuylahan. Gigamit ba nimo kini?