Komosta man ang Nahimo sa Imong mga Anak sa Eskuwelahan?
1 Karon nga ang atong mga batan-on motunghaay na sa tuig nga ting-eskuwela, unsaon man nila ang pagkab-ot sa hagit sa pag-alagad kang Jehova ubos sa mga pagsulay sa ilang integridad? Sa unsang paagi kamong mga ginikanan makalig-on sa inyong mga anak sa mga pagsulay nga ilang sagubangon?
GAMITANG BROSYUR NGA SCHOOL
2 Ang School brosyur gidesinyo sa matin-aw nga pagpresentar ngadto sa mga magtutudlo sa mga pagtulon-an ug mga baroganan sa mga Saksi ni Jehova samtang kini may kalabotan sa mga kalihokan sa eskuwelahan. Kini usab nagataganag mga giya sa hiniusang baroganan sa mga Saksi ni Jehova maylabot sa moral nga panggawi.
3 Alang sa daghang mga batan-on kini nga brosyur nahimong tinuod nga panalipod. Pananglitan, usa ka Saksing ginikanan nakakat-on nga ang mga lektura sa edukasyon sa sekso gipahayag ngadto sa mga estudyante pinaagig mga tawo nga daotan ang moral. Nga dala ang brosyur, ang ginikanan mihisgot sa iyang mga pagsupak ug dihay kausaban nga gihimo sa mga klase sa iyang anak nga babaye.
4 Dakog mahimo ang mga ginikanan sa pagtabang sa ilang mga anak sa “paghimog panalipod atubangan sa tanan” kinsa mokuwestiyon kanila. (1 Ped. 3:15) Sa pipila ka hitabo ang mga ginikanan nag-eskedyol ug pupanahong mga duaw ngadto sa eskuwelahan aron makigsulti sa magtutudlo. Ang maong personal nga interes nagapalig-on sa bugkos tali sa ginikanan ug anak. Ang uban gani milingkod diha sa mga panaghisgot sa lawak-klasehanan diin kini gitugot.
MAHIMONG SAKSI SA MATAG ADLAW
5 Usa ka batan-ong Saksi sa Colorado mihangyo sa iyang magtutudlo sa pagtabang kaniya sa malisod nga mga pulong sa dihang nagbasa sa Examining the Scriptures Daily sa kada adlaw. Usa ka adlaw iyang namatikdan nga nawala ang iyang pulyeto. Ang iyang magtutudlo “mihulam” diay niana sa miuli siyag sayo tungod kay nasakit. Dili niya gusto nga masayloan ang pagbasa sa teksto.
6 Ang usa ka positibong panglantaw uban sa makugihong pagpangandam moabag sa mga ginikanan ug sa batan-on sa ‘pagsangkap sa ilang mga hunahuna sa buluhaton’ sulod sa tuig nga ting-eskuwela.—1 Ped. 1:13.