Mga Batan-on—Pahimusli ang Inyong Pag-eskuyla
1 Unsa may inyong pagbati maylabot sa inyong pag-eskuyla karon nga mosulod na kamo sa ikatulo ka bulan ning tuiga sa pagtungha? Naningkamot ba gayod kamo aron makabenepisyo gikan sa edukasyon? Gipahimuslan ba ninyo ang mga kahigayonan nga gitagana sa eskuylahan kaninyo sa pagpaambit sa kamatuoran uban sa inyong mga klasmet ug mga magtutudlo? Kami masaligon nga buot ninyong buhaton ang inyo gayong maarangan diha sa eskuylahan.
2 Mahimong Usa ka Maayong Estubyante: Kon kamo mangandam pag-ayo sa dihang anaa kamo sa inyong mga klase ug maminaw pag-ayo, mahuptan ninyo ang dumalayong mga kaayohan. Magmakugihon bahin sa pag-atiman sa inyong mga homwork, apan ayaw tugoti ang inyong buluhaton sa eskuylahan sa pagbabag sa teokratikanhong mga kalihokan.—Filip. 1:10.
3 Kon wala pa ninyo mahimo kini, basaha ang brosyur nga Mga Saksi ni Jehova ug Edukasyon. Dayon, kamo o ang inyong mga ginikanan kinahanglang mohatag ug usa ka kopya ngadto sa matag usa sa inyong mga magtutudlo. Pahibaloa sila nga matubag ang bisan unsang mga pangutana nga tingali anaa kanila. Makatabang kini kanila nga mas makasabot sa inyong mga prinsipyo ug mga tinuohan ug magpulos kaninyo samtang inyong ipadapat ang gikatudlo kaninyo. Magpasalig usab kini sa inyong mga magtutudlo nga kamo ug ang inyong mga ginikanan gustong mokooperar kanila samtang sila motabang kaninyo sa pagbaton ug hinungdanong edukasyon.
4 Mahimong Usa ka Maayong Saksi: Nganong dili isipon ang eskuylahan ingon nga inyong personal nga teritoryo alang sa di-pormal nga pagsangyaw? Sulod sa umaabot nga tuig sa pagtungha, makabaton kamo ug talagsaong mga kahigayonan sa pagsangyaw. Naghupot kamo ug kahibulongang espirituwal nga kahibalo nga kon ipaambit, mahimong “maluwas ang imong kaugalingon ug kadtong kinsa mamati kanimo.” (1 Tim. 4:16) Pinaagig pagmentinar ug sulondan Kristohanong pamatasan ug pinaagi sa pagsangyaw sa panahon nga haom ang pagbuhat sa ingon, ikaw mismo ug ang uban makabenepisyo.
5 Usa ka batan-ong igsoong lalaki misangyaw nga di-pormal ngadto sa kaubang mga estudyante sa iyang eskuylahan. Lakip niadtong misanong nga mauyonon mao ang usa ka Katoliko, usa ka ateyista nga naanad sa pagyagayaga sa mga nagtuo ug Diyos, ug usa ka batan-on nga hinabako ug palainom. Tanantanan, kining batan-ong igsoong lalaki nakatabang ug 15 sa iyang mga kapareho ngadto sa pahinungod ug bawtismo!
6 Busa mga batan-on, ipadapat ang inyong kaugalingon sa pagkat-on ug sa pagkobre sa inyong talagsaong teritoryo sa pagsangyaw. Dayon inyong matagamtam ang labing dakong kaayohan gikan sa pag-eskuyla.