Andam na ba Kamo sa Pagpamatuod sa Eskuylahan?

1. Unsang mga kahigayonan ang bukas kaninyo sa inyong pagtungha?

¹ Una man kini o laing tuig sa inyong pagtungha, kamong Kristohanong mga batan-on makaatubang ug bag-ong mga hagit ug pagpit-os. Apan aduna usab kamoy bag-ong mga kahigayonan nga “magpamatuod sa kamatuoran.” (Juan 18:37) Andam na ba gayod kamo sa pagpamatuod?

2. Unsang pagbansay ang makatabang kaninyo sa pag-atubang sa mga hagit sa eskuylahan?

² Ang daghang pagbansay nga inyong nadawat gikan kang Jehova, sa inyong mga ginikanan, ug sa matinumanon ug maalamong ulipon makatabang kaninyo nga magmalamposon sa matag bahin sa inyong kinabuhi. (Prov. 1:8; 6:20; 23:23-25; Efe. 6:1-4; 2 Tim. 3:16, 17) Uban sa espirituwal nga pagbansay ug pagkahibalo sa mga hagit nga inyong maatubang adlaw-adlaw sa eskuylahan, andama ang inyong kaugalingon sa paghatag ug pamatuod. (Prov. 22:3) Pamalandonga pag-ayo ang instruksiyon ug mapuslanong mga sugyot sa Kasulatan nga makita diha sa duha ka tomo sa Gisukna sa mga Batan-on maingon man sa susamang mga artikulo sa Pagmata! nga regular nga gipatik.

3. Sa unsang mga paagi kamo makahatag ug pamatuod?

³ Diha sa eskuylahan makapamatuod kamo sa daghang paagi. Kon ang uban makamatikod sa inyong maayong pamesti ug pamostura, panggawi ug sinultihan, pagkamatinahoron ngadto sa inyong mga klasmet ug magtutudlo, ug bisan sa inyong mga grado, ug kon sila makamatikod sa inyong lig-ong baroganan, ang pipila lagmit mangutana, “Nganong lahi man mo kaayo?” (Mal. 3:18; Juan 15:19; 1 Tim. 2:9, 10) Kini maghatag kaninyog kahigayonan nga makapamatuod ug makasaysay sa inyong pagtuo. Sa tibuok tuig sa klase, tingali makaatubang kamog mga hagit sama sa nasodnong mga seremonyas ug mga selebrasyon. Kon pangutan-on kon nganong dili moapil niana, igo lang ba kamong moingon, “Supak kini sa among relihiyon; Usa ako sa mga Saksi ni Jehova,” o, inyo bang gamiton kini nga kahigayonan sa pagpamatuod bahin sa inyong mahigugmaong Amahan, si Jehova? Ang maayong pagpangandam uban sa giya ni Jehova mag-andam kaninyo sa pagpamatuod sa inyong mga magtutudlo, klasmet, ug sa uban pa.—1 Ped. 3:15.

4. Nganong kamo makasalig nga kamo magmalamposon sa paghatag ug pamatuod?

⁴ Bisan pag kamo nabalaka tingali bahin sa hagit sa pagpamatuod diha sa eskuylahan, hunahunaa nga si Jehova malipay sa dihang kamo maningkamot sa paghimo niana. Kami malipay nga kamo may kahigayonan sa pagpamatuod sa uban diha sa inyong eskuylahan. Busa magmadasigon ug magmaandam sa paghatag ug pamatuod diha sa eskuylahan!