Andam ba ang Inyong mga Anak?
1. Nganong kinahanglang magmaandam ang kabataan nga nag-eskuyla?
1 Abri na sa klase. Seguradong ang inyong mga anak nag-atubang ug bag-ong mga problema ug pagpit-os. Duna usab silay bag-ong kahigayonan sa ‘pagpamatuod sa kamatuoran.’ (Juan 18:37) Andam ba sila?
2. Aron maandam ang inyong mga anak, unsay angay nilang makat-onan?
2 Nakasabot ba gayod ang inyong mga anak kon unsay nalangkit sa pagpakigbahin sa nasyonalistikong mga seremonyas ug paganong mga selebrasyon ug kon nganong ang pagpakigbahin niini sayop? Andam ba silang moatubang sa pagpamit-os sa pagkuhag mas taas nga edukasyon, pagpakigdeyt, ug pag-inom-inom o pagdroga? Moingon ba lang sila nga gidili kana sa ilang relihiyon o mahibalo ba silang mopatin-aw sa ilang mga pagtulon-an?—1 Ped. 3:15.
3. Sa unsang paagi pahimuslan sa mga ginikanan ang Pamilyahanong Pagsimba sa pag-andam sa ilang mga anak?
3 Pahimusli ang Pamilyahanong Pagsimba: Tingali inyong hisgotan ang mga problema nga maatubang sa inyong mga anak sa tibuok tuig nilang pag-eskuyla. Ang inyong pagpaningkamot sa pagtagad sa ilang problema sa eskuylahan pagsugod pa lang sa klase makahatag kanilag kompiyansa. Nganong dili kamo mogahin ug panahon alang niini diha sa Pamilyahanong Pagsimba? Mahimong inyong pangutan-on ang inyong mga anak kon unsay nakapabalaka kaayo kanila niining tuig sa ilang pag-eskuyla. Ang mga butang nga inyong gihisgotan sa milabayng mga tuig mahimong hisgotan pag-usab karon nga dako-dako na sila ug mas makasabot na. (Sal. 119:95) Mahimong magpraktis-sesyon kamo diin ikaw konohay ang titser, guidance counselor, o estudyante. Tudloi ang inyong mga anak kon unsaon pagtubag base sa Bibliya ug sa paggamit sa mga libro sama sa Nangatarongan ug Gisukna sa mga Batan-on. Gipahimuslan sa usa ka ginikanan ang mga praktis-sesyon sa pag-andam sa iyang mga anak kon unsaon pagpakig-estorya sa ilang bag-ong mga titser matag abri sa klase ug sa pagpahibalo kanila nga sila mga Saksi ni Jehova.—Tan-awa ang Bantayanang Torre, Disyembre 15, 2010, panid 3-5.
4. Unsay himoon sa maalamong mga ginikanan?
4 Ang mga problema nga maatubang sa Kristohanong kabataan niining kataposang mga adlaw ‘nagkalisod sagubangon.’ (2 Tim. 3:1) Pangandaman kini sa maalamong mga ginikanan. (Prov. 22:3) Niining tuiga sa pag-eskuyla, himoa ang inyong maarangan sa pag-andam sa inyong mga anak.