“Unsaon Ko man Paghimo . . . Gawas Kon May Usa nga Magtudlo Kanako?”
1 Sa dihang ang ebanghelisador nga si Felipe nangutana sa Etiopianhong eunuko kon nasabtan ba niya ang iyang gibasa gikan sa Pulong sa Diyos, ang lalaki mitubag: “Sa pagkatinuod, unsaon ko man paghimo sa ingon, gawas kon may usa nga magtudlo kanako?” Malipayong gitabangan siya ni Felipe aron masabtan ang maayong balita bahin kang Jesus, nga nagresulta sa dihadihang pagbawtismo sa lalaki. (Buh. 8:26-38) Si Felipe nagtuman sa sugo ni Kristo sa ‘paghimog mga tinun-an sa katawhan sa tanang kanasoran, nga magabawtismo kanila ug magatudlo kanila.’—Mat. 28:19, 20.
2 Kinahanglan natong tumanon ang sugo sa paghimog mga tinun-an, sama sa gibuhat ni Felipe. Apan, ang matang sa dali nga pag-uswag sa espirituwal nga gihimo sa Etiopianhong eunuko dili kasagarang makita taliwala sa mga tawo nga atong gitun-an sa Bibliya. Kadtong lalakiha, usa ka Hudiyohanong proselita nga sinati kaayo sa Kasulatan, adunay madinawatong kasingkasing ug gikinahanglan lamang ang pagdawat nga si Jesus mao ang gisaad nga Mesiyas. Maoy usa ka hagit kon kadtong atong gitun-an dili sinati sa Bibliya, nalimbongan sa bakak nga relihiyosong mga pagtulon-an, o nabug-atan tungod sa malisod personal nga mga problema. Unsay makatabang kanato aron magmalamposon sa paggiya sa mga estudyante sa Bibliya ngadto sa pagpahinungod ug bawtismo?
3 Ilha ang Espirituwal nga mga Panginahanglan sa Estudyante sa Bibliya: Ang pasukip sa Agosto 1998 nga Atong Ministeryo sa Gingharian naghisgot sa gitas-on sa panahon nga tingali atong matun-an ang mga tawo, ginamit ang brosyur nga Gikinahanglan ug ang librong Kahibalo. Kini naghatag niini nga pagtultol: “Kinahanglang timbangtimbangon ang gikusgon sa pagtuon sumala sa mga kahimtang ug katakos sa estudyante. . . . Dili nato buot nga isakripisyo ang pagpakabaton sa estudyante ug tin-aw nga pagsabot aron lamang daling matapos ang libro. Gikinahanglan sa matag estudyante ang solidong pasukaranan sa iyang bag-ong nakaplagang pagtuo diha sa Pulong sa Diyos.” Busa, mapuslanon nga dili magdali sa pagkobre sa materyal diha sa librong Kahibalo tungod sa panghunahuna nga sulayang taposon ang libro sa unom ka bulan. Mahimong magkinahanglan kanag labaw pa gayod sa unom ka bulan aron tabangan ang pipila ka indibiduwal nga mouswag ngadto sa bawtismo. Samtang imong dumalahon ang pagtuon kada semana, gugola ang bisan unsang panahong gikinahanglan sa pagtabang sa estudyante nga masabtan ug dawaton ang iyang nakat-onan gikan sa Pulong sa Diyos. Sa pipila ka kahimtang, tingali duha o tulo ka semana ang gikinahanglan sa pagkobre sa usa ka kapitulo diha sa librong Kahibalo. Maghatag kinig panahon sa pagbasa ug pagpasabot sa daghang gisitar nga mga kasulatan.—Roma 12:2.
4 Apan, komosta na man kon pagkahuman sa librong Kahibalo, imong masabtan nga ang pagsabot sa estudyante sa kamatuoran nagkinahanglan pang bug-oson o siya wala pa gayod mapalihok sa pagdapig sa kamatuoran ug pagpahinungod sa iyang kinabuhi ngadto sa Diyos? (1 Cor. 14:20) Unsa ang dugang nimong buhaton sa paggiya kaniya ngadto sa dalan nga motultol sa kinabuhi?—Mat. 7:14.
5 Tagbawa ang Espirituwal nga mga Panginahanglan sa Estudyante sa Bibliya: Kon dayag nga ang tawo nagamauswagon, bisan kon hinayhinay, ug nga siya nagaugmad ug pagpabili kon unsay iyang nakat-onan, nan ipadayon ang pagtuon sa Bibliya diha sa ikaduhang libro pagkahuman sa brosyur nga Gikinahanglan ug librong Kahibalo. Hayan kini dili kinahanglanon sa matag kaso, apan kon kini gikinahanglan, ipadayon ang pagtuon diha sa librong Matuod nga Kalinaw, sa librong Nahiusa sa Pagsimba, o sa librong Pulong sa Diyos. Kadaghanang magmamantala adunay personal nga mga kopya niini nga mga libro nga magamit kon ang kongregasyon walay suplay. Kon gikinahanglan kining mga libroha mahimong orderon gikan sa sangang buhatan. Sa tanang kahimtang, ang brosyur nga Gikinahanglan ug ang librong Kahibalo tun-an pag-una. Ang pagtuon sa Bibliya, mga pagbalikduaw, ug ang oras nga gigugol sa pagpadayon sa pagtuon angayng iphon ug itaho, bisan kon ang estudyante nabawtismohan na sa dili pa mahuman ang ikaduhang libro.
6 Kini ba nagkahulogan nga kadtong di pa dugayng nabawtismohan apan mituon lamang ug usa ka libro angayng tabangan karon pag-usab sa pagtuon sa ikaduhang libro? Dili kinahanglan. Bisan pa niana, sila tingali nahimong di-aktibo o basin wala mouswag diha sa kamatuoran, ug hayan sila mibati nga sila nagkinahanglag personal nga tabang sa paghimog mas dakong pagpadapat sa kamatuoran diha sa ilang mga kinabuhi. Ang magtatan-aw sa pag-alagad angayng konsultahon sa dili pa himoon pag-usab ang pagtuon uban sa bawtismadong magmamantala. Apan, kon adunay pipila nga imong nahibaloan nga mituon sa librong Kahibalo sa miagi apan wala gayod mouswag ngadto sa pagpahinungod ug bawtismo, basin gusto mong mohimog unang tikang sa pagsusi kon buot ba nilang ipadayon ang ilang pagtuon sa Bibliya.
7 Ang paghatag ug suod, personal nga pagtagad sa matag interesadong tawo nga atong ginatun-an maoy timailhan sa Kristohanong gugma. Ang atong tumong maoy sa pagtabang sa estudyante nga makab-ot ang mas dakong pagsabot sa kamatuoran sa Pulong sa Diyos. Dayon siya makahimo ug tino, may-kahibalong pagbarog dapig sa kamatuoran ug ipahinungod ang iyang kinabuhi kang Jehova, nga pasimbolohan kana nga pagpahinungod pinaagi sa bawtismo sa tubig.—Sal. 40:8; Efe. 3:17-19.
8 Nahinumdoman ba nimo kon unsay nahitabo human mabawtismohi ang Etiopianhong eunuko? “Siya padayon mang nagpanaw nga nagmaya” ingong bag-ong tinun-an ni Jesu-Kristo. (Buh. 8:39, 40) Hinaot nga kita ug kadtong atong malamposong gigiyahan sa dalan sa kamatuoran makakaplag ug dakong kalipay sa pag-alagad kang Jehova nga Diyos—karon ug sa walay kataposan!