“Dili Kami Makahunong sa Pagsulti”
1 Si Jesu-Kristo nagapaniid pag-ayo sa buluhatong pagsangyaw. (Mat. 28:20; Mar. 13:10) Bisan pag adunay hapit sa unom ka milyong aktibong mga magmamantala nga nagapanaksi diha sa 234 ka nasod, dili gayod kita magkanayon nga ang atong pagsangyaw natapos na. Hangtod nga ipahayag sa Diyos nga ang buluhaton natapos na, ‘dili kita makahunong sa pagsulti’ bahin sa mga butang nga atong nakat-onan.—Buh. 4:20.
2 Salig sa Espiritu sa Diyos: Hilabihan ang pagpit-os ni Satanas aron maluya kita. (Pin. 12:17) Ang atong kaugalingong di-hingpit nga unod naghampak usab kanato sa daghang suliran. Ang maong mga butang makapatipas sa atong pagtagad gikan sa hinungdanon-kaayong buluhatong pagsangyaw. Bisan pa niana, kon kita mosalig kang Jehova, ang iyang espiritu motabang kanato nga atubangon ang bisan unsang suliran.
3 Sa dihang ang unang-siglong Kristohanong kongregasyon grabeng gilutos, ang mga igsoon miampo ngadto sa Diyos alang sa tabang aron padayong magsulti sa iyang pulong uban ang tanang kaisog. Gitubag ni Jehova ang ilang pag-ampo, nga nagdasig kanila pinaagi sa iyang espiritu ug naghatag kanila sa gikinahanglang kasibot ug determinasyon sa pagpadayon sa pagsangyaw. Ingong sangpotanan, sila nagpadayong walay hunong sa pagpahayag nga maisogon sa maayong balita.—Buh. 4:29, 31; 5:42.
4 Ayawg Kahadlok sa Makapaluyang mga Hungihong: Ang opinyon sa kadaghanan o mapasipalahong publisidad tingali maghatag ug makapaluyang epekto diha kanato. Apan, hinumdomi ang maisogong pahayag ni Pedro ug sa ubang mga apostol ngadto sa Sanhedrin, nga natala sa Buhat 5:29-32. Ingon sa pag-ila sa magtutudlo sa Balaod nga si Gamaliel, ang buluhaton nga iya sa Diyos dili mapukan. Dili kini mapalampos pinaagi sa atong gahom. Kining dakong buluhaton adunay pagpaluyo sa Diyos, ug siya lamang ang makapalampos niana!—Zac. 4:6.
5 Mangamuyo kita kang Jehova kada adlaw alang sa iyang espiritu sa pagtabang kanato nga masibotong imantala ang maayong balita. Hinaot kita moingon, sama sa gisulti ni Jeremias, nga ang mensahe sa Gingharian maoy sama sa nagdilaab nga kalayo sulod sa atong kabukogan. (Jer. 20:9) Dili kita mahimong magpakahilom!