Mauswagong Pagtagad sa Dinaliang Buluhatong Paghimog mga Tinun-an
1 Una pa mobiya sa yuta, gisugo ni Jesus ang iyang mga sumusunod sa “paghimog mga tinun-an sa katawhan sa tanang kanasoran.” Nagkinahanglan kini sa paghimog dakong pagsangyaw ug pagpanudlong kampanya ug sa pagpasangkad sa ilang buluhaton ngadto sa tibuok gipuy-ang yuta. (Mat. 28:19, 20; Buh. 1:8) Gilantaw ba nila kining sugoa ingong usa ka kabug-at—lisod kaayong pas-anon? Dili sumala kang apostol Juan. Human makagugol ug 65 ka tuig ingong usa ka tighimog tinun-an, siya misulat: “Ang paghigugma sa Diyos nagakahulogan niini, nga atong sundon ang iyang mga sugo; ug gani ang iyang mga sugo dili man mabug-at.”—1 Juan 5:3.
2 Ang Kasulatanhong talaan sa kalihokan sa unang mga Kristohanon nagpamatuod nga dinalian nilang gihimo ang gisugo kanila sa paghimog mga tinun-an ni Jesu-Kristo. (2 Tim. 4:1, 2) Ilang gihimo kini, dili lamang kay katungdanan, apan tungod sa ilang mahigugmaong tinguha sa pagdayeg sa Diyos ug sa pagdalag paglaom sa kaluwasan ngadto sa uban. (Buh. 13:47-49) Tungod kay ang tanang nahimong mga tinun-an sa ulahi maoy mga tighimog mga tinun-an mismo, ang Kristohanong kongregasyon kusog nga mitubo sa unang siglo.—Buh. 5:14; 6:7; 16:5.
3 Ang Buluhaton sa Paghimog Tinun-an Gipakusgan: Ang labing dakong buluhaton sa paghimog tinun-an sa tanang panahon ginapalampos ning ika-20ng siglo! Sa pagkakaron, milyonmilyong tawo ang midawat sa maayong balita ug milihok uyon niana. (Luc. 8:15) Sanglit ang panahon talitapos na gayod alang sa presenteng sistema sa mga butang, “ang kasaligan ug mabuot nga ulipon” nagtagana kanato sa mga kahimanan sa paghimo niining posible alang sa mga tawong matinud-anog kasingkasing nga daling makakat-on sa kamatuoran.—Mat. 24:45.
4 Sa 1995 atong nadawat ang librong Kahibalo nga Motultol sa Kinabuhing Walay Kataposan, ug sa 1996 kini gisundan sa brosyur nga Unsay Gikinahanglan sa Diyos Kanato? Bahin sa Kahibalo nga libro, ang Enero 15, 1996, nga isyu sa Ang Bantayanang Torre, panid 14, nag-ingon: “Kining 192-panid nga libro mahimong tun-an sa mas mubo nga panahon, ug kadtong ‘sa husto nahimutang alang sa kinabuhing walay kataposan’ igong makakat-on pinaagi sa pagtuon niana aron makapahinungod kang Jehova ug makapabawtismo.”—Buh. 13:48.
5 Ang pasukip sa Hunyo 1996 nga Atong Ministeryo sa Gingharian, “Kon Unsaon Paghimog mga Tinun-an Pinaagig Librong Kahibalo,” naghatag kanato ning tumonga: “Depende sa mga kahimtang ug katakos sa estudyante, tingali inyong maarangan ang pagkobre sa ubay-ubay nga mga kapitulo diha sa usa ka sesyon sa usa ka oras o kapin, nga walay pagdalidali sa pagtuon. Ang mga estudyante makahimog mas maayong pag-uswag kon ang magtutudlo ug ang estudyante magatuman sa ilang gikasabotan sa pagtuon matag semana.” Ang artikulo nagpadayon sa pag-ingon: “Kinahanglang madahom nga sa panahong ang usa ka tawo makakompleto sa usa ka pagtuon diha sa librong Kahibalo, ang iyang sinseridad ug kalalom sa interes sa pag-alagad sa Diyos madayag na.” Ang “Pangutana” diha sa Oktubre 1996 nga Atong Ministeryo sa Gingharian nagsaysay: “Gidahom nga sulod sa mubomubong panahon, ang epektibong magtutudlo makahimo sa pagtabang sa sinsero kasarangang estudyante sa pagbaton ug igong kahibalo sa paghimog intelihenteng desisyon sa pag-alagad kang Jehova.”
6 Ang Kahibalo nga Libro Nakabatog mga Resulta: Sa okasyon sa bawtismo sa usa ka batan-ong babaye, iyang giasoy kon unsay iyang gibati bahin sa pagtuon sa Kahibalo nga libro. Taudtaod na, nagtuon siya sa librong Mabuhing Walay Kataposan. Sa dihang ang librong Kahibalo giluwatan, ang sister nga nagdumala kaniya sa pagtuon mibalhin sa bag-ong libro. Sa wala madugay, nakita sa estudyante nga nagkinahanglan kinig desisyon sa iyang bahin, ug siya nadasig sa paghimog kusog nga pag-uswag gikan sa maong panahon. Ang batan-ong babaye, nga karon ato nang sister, miingon: “Ang Mabuhing Walay Kataposan nga libro nagtabang nako sa paghigugma kang Jehova, apan ang Kahibalo nga libro nagtabang nako sa paghimog desisyon sa pag-alagad kang Jehova.”
7 Matikdi kon unsa ka dali ang laing babaye nakakat-on sa kamatuoran. Human sa iyang ikaduhang pagtuon, siya mitambong sa usa ka tigom sa Kingdom Hall sa panahon sa duaw sa magtatan-aw sa sirkito. Nianang semanaha, sulod sa iyang ikatulong pagtuon, iyang giingnan siya nga nakapahinungod na siya kang Jehova ug buot nga mahimong usa ka di-bawtismadong magmamantala. Nakigtagbo siya sa mga ansiyano, nga nag-aprobar kaniya ingong usa ka magmamantala, ug sa pagkasunod semana misugod siya sa pag-alagad sa kanataran. Nalangkit siya pag-ayo sa iyang pagtuon sa Bibliya nga mikuha siyag leave of absence gikan sa iyang trabaho aron makatuon ug duha o tulo ka higayon sa usa ka semana ug makagugol ug dugang panahon diha sa ministeryo. Usahay, kobrehan nila ang duha o tulo ka kapitulo sa matag sesyon. Gisugdan niya pagpadapat ang iyang nakat-onan diha sa tanang bahin sa iyang kinabuhi, natapos ang Kahibalo nga libro sa upat ka semana, ug miuswag ngadto sa bawtismo!
8 Ang bana sa usa ka sister naghubit sa iyang kaugalingon ingong “usa ka kinaiyanhong di-matinuohong kapikas.” Usa ka adlaw, usa ka igsoong lalaki mitanyag niyag pagtuon sa Bibliya diha sa Kahibalo nga libro sa kondisyon nga ang tawo mahimong mohunong human sa unang pagtuon o sa bisan unsang panahon human niana. Miuyon ang bana nga sulayan kini, bisan tuod dili maayong estudyante sa iyang mga adlaw sa pagkabatan-on ug wala makatuon ug relihiyosong literatura sa bisan unsang matang sulod sa kapin sa 20 ka tuig. Unsay iyang sanong sa pagtuon sa Kahibalo nga libro? Siya miingon: “Maoy usa ka tinuod nga kalipay sa pagkakaplag nga kini nga tabang sa Bibliya gisulat nga yano kaayo. Ang impormasyon gipresentar nga tin-aw kaayo ug lohikal nga sa wala madugay, gipaabot ko ang among sunod nga pagtuon uban ang dakong kahinam. Ang akong magtutudlo mahanasong nagsunod sa mga paagi sa paghimog-tinun-an nga gitagik sa Sosyedad, ug uban sa tabang sa espiritu ni Jehova, ako nabawtismohan upat ka bulan sa ulahi. Ako makaingon gayod nga kon atong ugmaron ang gugma sa paghimog mga tinun-an, magpadayon sa pagpangita niadtong mga matul-id ug kasingkasing diha sa ministeryo sa kanataran, maggamit sa Kahibalo nga libro ug ubang mga tabang sa Bibliya segun sa gisuplay sa Sosyedad ug, labing importante, mag-ampo alang sa pagtultol ni Jehova, mabatonan ta ang labing espesyal nga pribilehiyo sa pagtabang aron sa paghimog mga tinun-an.” Ang anaa sa ibabaw maoy talagsaong mga kasinatian. Kadaghanan sa atong mga estudyante dili makadangat sa kamatuoran sa ingon niini kadali.
9 Ang mga Estubyante Mouswag sa Nagkalainlaing Gikusgon: Kinahanglang ilhon nga ang mga katakos sa mga magtutudlo ug mga estudyante sa Pulong sa Diyos mahimong magkalahi kaayo. Ang espirituwal nga pagtubo mahimong hinay o kusog. Ang ubang mga estudyante makahimo sa pag-uswag sa pipila ka bulan nga tingali mas dugay nga makab-ot sa uban. Ang gikusgon sa espirituwal nga pagtubo sa usa ka tawo maapektohan sa iyang edukasyonal nga kahimtang, sa gidak-on sa iyang pagpabili sa espirituwal nga mga butang, ug sa giladmon sa iyang debosyon kang Jehova. Dili tanan nga atong ginatun-an adunay “tumang kaikag sa hunahuna” sa pagtuon sa Kasulatan sa adlaw-adlaw, ingon sa gihimo sa karaang mga taga-Berea nga nahimong mga magtutuo.—Buh. 17:11, 12.
10 Maoy hinungdan nga ang pasukip sa Abril 1998 nga Atong Ministeryo sa Gingharian, “Gikinahanglan—Dugang mga Pagtuon sa Bibliya,” mihatag niining matinud-anong pagtultol: “Siyempre, dili tanang estudyante sa Bibliya mouswag sa samang gikusgon. Ang pipila dili mahiligon sa espirituwal sama sa uban ni ingon kadali sa pagsagop sa mga butang nga ginatudlo. Ang uban nagakinabuhing puliki ug tingali dili makadeboto sa panahong gikinahanglan sa pagkobre sa tibuok nga kapitulo sa matag semana. Busa, sa pipila ka kaso kinahanglanon ang pagdumalag kapin sa usa ka sesyon sa pagtuon aron sa pagkobre sa tinong mga kapitulo ug ubang dugang mga bulan aron sa paghuman sa libro.”
11 Mga Tighimog Tinun-an Maghupot ug Timbang nga Panglantaw: Kinahanglang timbangtimbangon ang gikusgon sa pagtuon sumala sa mga kahimtang ug katakos sa estudyante. Tungod kay kita gidasig sa pagsugod ug mga pagtuon diha sa Gikinahanglan nga brosyur, mokabat tingali kinig gikan sa duha ngadto sa tulo ka bulan sa pagkobre niana una pa mongadto sa Kahibalo nga libro. Kon atong gamiton ang tanang sugyot nga gilaraw diha sa pasukip sa Hunyo 1996 nga Atong Ministeryo sa Gingharian, kini lagmit dangtan ug laing unom ngadto sa siyam ka bulan sa pagtapos sa Kahibalo nga libro. Ang uban nga mao pay pagsugod sa pagtuon sa Kahibalo nga libro mibalhin sa Gikinahanglan nga brosyur aron tabangan ang estudyante nga makakat-on sa pangunang mga kamatuoran sa Bibliya nga mas dali. Dayon ang pagtuon sa Kahibalo nga libro sugdan pag-usab. Kon ang pagtuon gisugdan diha sa Kahibalo nga libro ug nag-uswag pag-ayo, hayan makaayo nga tun-an ang Gikinahanglan nga brosyur human matapos ang libro, busa daling masubli ang pangunang mga kamatuoran sa Pulong sa Diyos. Bisan hain nianang kahimtanga, dili nato buot nga isakripisyo ang pagpakabaton sa estudyante ug tin-aw nga pagsabot aron lamang daling matapos ang libro. Gikinahanglan sa matag estudyante ang solidong pasukaranan sa iyang bag-ong nakaplagang pagtuo diha sa Pulong sa Diyos.
12 Tungod sa pagkasayod kon hain na kita sa lakat sa panahon, mas dinalian kay sukad masukad ang pagtabang sa uban nga makakat-on sa kamatuoran. Gawas pa sa pagpadayon sa pag-ampo nga makasugod ug bag-ong mga pagtuon sa Bibliya, kita mag-ampo alang niadtong nagtuon na uban kanato. Dayon mao unyay atong kalipay ang pagpadayon sa pagbawtismo ug dugang mga tinun-an “sa tanang mga adlaw hangtod sa katiklopan sa sistema sa mga butang.”—Mat. 28:20.