Palig-onang mga Estudyante sa Bibliya sa Pag-uswag
1 Diha sa mga Ebanghelyo ang terminong “disipulo” gipadapat ngadto kanilang dili lang nagatuo sa mga pagtulon-an ni Kristo kondili usab suod nga nagatuman niana. (Mat. 28:19, 20) Ang mga ginatun-an ba sa Bibliya nagaapresyar niini? Sa unsang paagi atong mapalig-on sila sa pag-uswag sa pagkahimong mga tinun-an?
TULTOLING INTERES NGADTO SA ORGANISASYON
2 Ang progreso sa estudyante tino nga nalambigit sa iyang pagpabili sa kapunongan ni Jehova. Busa, maoy atong kaakohan ingong mga magtutudlo sa pagtultol sa interes sa estudyante ngadto sa organisasyon sa Diyos. Sa katuigan kita gidasig sa paggugol ug lima o napulo ka minutos sa matag sesyon sa pagtuon sa Bibliya nga adunay ipatin-aw maylabot sa organisasyon. Ang brosyur nga Mga Saksi ni Jehova—Nahiusang Nagabuhat sa Kabubut-on sa Diyos sa Tibuok Kalibotan mosaler kaayo alang niining tuyoa. Aduna ba niini ing kopya ang imong estudyante sa Bibliya? Kon wala pa, tinoa nga makabaton siyag usa gilayon. Palig-ona siyang basahon kana, ug ipatin-aw nga imong pagatagdon ang mubong bahin niana sa kada pagtuon.
3 Ang impormasyon sa mga panid 14 ug 15 sa Nagabuhat sa Kabubut-on sa Diyos nga brosyur nagapalig-on sa pagpabili alang sa matag usa sa mga miting sa kongregasyon. Nganong di kobrehan ang usa lang o duha ka parapo sa kada semana? Ipakita kon sa unsang paagi ang kada tigom nagahulip sa tinong panginahanglan. Sa kainit palig-ona siyang moduyog kanato didto sa Kingdom Hall aron personal nga matagamtam niya ang panaghiusa ug gugma taliwala sa natigom nga katawhan ni Jehova.—Sal. 133:1; Juan 13:35.
PALAMBOA ANG ESPIRITUWAL NGA PAG-USWAG
4 Ang mga bag-ohan kinahanglang magtuon, aron mouswag sa kahibalo ug pagpadapat sa Pulong sa Diyos. Tungod niini atong padayonon ang pagtuon diha sa librong Mabuhing Walay Kataposan ug sa librong Nahiusa sa Pagsimba bisan pa kon ang estudyante mabawtismohan na antes makompleto ang maong mga basahon. Usab, kinahanglang atong ipunting ang kahinungdanon sa pagbaton ug mga suskrisyon sa Bantayanang Torre ug Pagmata! ug sa paghupot sa ubang mga basahon sa Sosyedad aron makanunot sa “sukod sa mga suplay sa pagkaon sa hustong panahon.” (Luc. 12:42) Kadtong mobuhat niana makagamot ug maayo, mapalig-on, ug mahimong lubasan sa pagtuo.—Col. 2:7.
5 Ang mga estudyante sa Bibliya nagakinahanglan sa atong tabang kon sila ugaling mouswag man sa pagkahamtong. (Heb. 5:14) Kita gayod mohatag ug pagdayeg aron madasig ang pag-uswag. (Filip. 3:16) Iya bang gipakig-ambit sa pamilya ug mga kaila ang mga butang iyang nakat-onan? Kon siya takos, siya ba miapil sa Teokratikanhong Ministeryong Tunghaan? Siya ba may tinguha sa pagkahimong usa ka magmamantala?
6 Ayawg kalimti ang gahom sa pag-ampo alang sa kaayohan sa mga estudyante sa Bibliya. Hangyoa si Jehova sa pagtultol kanila nga mosanong. (1 Cor. 3:6, 7) Hinaot nga sila mohimog mahukmanong aksiyon sa pagpakig-uban sa kongregasyon ug sa ingon makadugang sa pagdayeg sa ngalan ni Jehova.