Tagda Gayod ang Personal nga Kahikayan
1 “Kon gusto mong mahuman ang trabaho, ihatag kana ngadto sa puliking tawo.” Ang punto niining panultihona mao nga ang tawong puliki sagad nga organisado kaayo ug busa mas ang malampos. Ang tanan kanato aduna ing 24 oras nga gamiton sa matag adlaw. Kon ato mang usik-usikan kanang panahona o gamiton kana nga maalamon sagad magadepende sa atong personal nga organisasyon o kahikayan.
2 Aduna kanunay ing “daghang pagabuhaton diha sa buluhaton sa Ginoo.” (1 Cor. 15:58) Aduna kitay mga tigom nga pagatambongan ug ministeryo sa kanataran nga pagaambitan. Apan ang pangandam magauna niini. Sa laing pagkasulti, gikinahanglan tang gugolon ang panahon sa pagtuon aron kita epektibong “makahimog mga tinun-an” ug makapalig-on sa uban “sa gugma ug maayong mga buhat,” maingon nga kita gisugo niana sa pagbuhat. (Mat. 28:19; Heb. 10:24) Ang ordinaryong mga butang sa kinabuhi, sama sa sekular nga trabaho, suroy-pamalit, pangaon, panghinlo, pagbiyahe, pag-eskuwela, ug pagkatulog, kining tanan adunay ilang dapit. Ang pipila ka panahon, usab, magugol man sa lulinghayaw. Ang pagpasibo sa tanang butang sa hustong dapit niana nagatanyag ug usa ka hagit nga kinahanglang atong sagubangon. Unsaon sa pagbuhat niini?
PAG-UNA SA MGA UNAHONON
3 Si Jesus miingon: “Nan, padayong pangitaa pag-una ang gingharian ug ang iyang pagkamatarong, ug ang tanan niining mga butanga igadugang kaninyo.” (Mat. 6:33) Dayag nga, ang intereses sa Gingharian aduna gayod ing unang unahonon kon maylabot sa paggamit sa atong panahon. Kon atong eskedyolon ang atong panahon sama sa atong pagbadyet sa atong salapi, ang mga oras nga atong ginagugol alang sa Kristohanong mga miting, pagtuon sa Bibliya sa pamilya, ug sa maong teokratikanhong mga kalihokan sama sa ministeryo sa kanataran ug personal nga pagtuon dili gamiton sa pagpangagpas sa ubang intereses.
4 Nganha sa matag eskedyol kinahanglang anaa ang gikinahanglang mga butang sa kinabuhi. Ang panahon gigahin alang sa sekular nga trabaho sa pagsuportar sa kaugalingon ug sa pamilya sa usa. Ang pagkaon ug pagkatulog, maingon man ang pagtagad sa mga panginahanglan sa pamilya sa usa, kinahanglang ilakip. Una diha sa unahonong listahan sa mga ansiyano ug ministeryal nga mga alagad mao ang panahon nga ilang gugolon sa pag-andam ug pag-atiman sa teokratikanhong mga responsabilidad. Nganong dili molingkod ug himoon ang maong eskedyol, ug tinoon kon aduna bay mga butang di-hinungdanon nga maoy nauna sa imong listahan sa unahonon?
PAGBATON UG YANONG MATA
5 Sa mihisgot si Jesus sa kalihokan sa iyang mga sumusunod, siya mimatikod: “Nan, kon ang imong mata maoy yano, ang imong tibuok nga lawas magmasanag.” (Mat. 16:22) Unsa man ang nalangkit niini? Sa pasukaranan kini nagakahulogan sa padayong paghupot sa kinabuhi sa usa nga di-komplikado. Adunay daghang kababagan nga makakawat sa panahon sa usa. Ang telebisyon usa niini. Sa pipila ka panimalay, ang telebisyon gipaandar sa buntag ug gipasagdan kana sa tibuok nga adlaw. Makalingkod man ang usa ka tawo nga dili dugay sa pagtan-aw ug usa ka programa. Apan unya iyang makaplagan nga ang panahon nga sa sinugdan iyang giplano nga gamiton sa personal nga pagtuon o uban sa pamilya sa takulahaw molabay samtang siya nagapadayon sa pagtan-aw sa ubang mga programa. Pagkasayon ra sa pag-usik ug interong gabii nga walay bisan unsang mapuslanon nga malampos! Daghan ang dili mahibalo kon kanus-a pawongon ang telebisyon. Kon may suliran ka niini, hayan makahukom ka nga labing maayong dili patukaron ang telebisyon. Ang mga butang gikaikagan (hobbies), nga matang sa lingawlingaw sa uban, mahimong mopahurot usab sa panahon nga gigahin alang sa mas importanteng mga butang.
6 Ang pagsalga diha sa mga kalihokan sa dulang pakusog, pagtambong sa mga dula, o pagtan-aw niana diha sa telebisyon makahurot sa bililhong panahon. Mga bana, mga asawa, ug mga anak magtino pag-ayo nga dili sila matulisan sa panahon nga ilang magamit sa pagtuon ug duyog nga pagpakig-uban. Ang tanan kanato kinahanglang magbantay nga dili himoong komplikado ang atong kinabuhi pinaagig mga paghinobra diha sa mga dulang pakusog o lulinghayaw.
7 Ang seryosong suliran mosangpot kon tugotan ta ang sekular nga trabaho nga mobalda sa unahonon nga panahon. Ang uban makakaplag sa ilang kaugalingon nga natugob sa ilang trabaho o mabalaka kaayo sa mga kalaoman sa pinansiyal nga mga bintaha nga sila wala nay lugar diha sa ilang eskedyol sa mga tigom, ministeryo sa kanataran, o sa espirituwalidad sa ilang pamilya. (Efe. 5:15, 16) Maayong pangutan-on ang atong kaugalingon, ‘Kinsa man gayod ang malipay sa akong pagbaligya ngadto sa sekular intereses sa panahon nga ako nang gipahinungod ngadto sa pagsimba kang Jehova nga Diyos?’
MGA PAAGI SA EPEKTIBONG PAGGAMIT SA PANAHON
8 Ang pag-organisar sa kinabuhi sa usa para sa mas epektibong paggamit sa panahon nagakinahanglan sa paghupot ug espirituwal nga mga tumong ug hamiling mga pagpabili. Kini ang yawi sa pagpahimutang ug inadlawng mga unahonon. Ayaw pag-unyaunyaa. Kon gikagahin mo ang panahon aron buhaton kana, gamita kana alang sa maong katuyoan. Ibutang ang mga utlanan alang sa imong kaugalingon. Paninguhang tun-an ang tinong materyal sa igong panahon aron gamiton kana sa ministeryo sa kanataran o sa mga tigom. Buhata ang ingon usab niana bahin sa matag adlaw nga mga buluhaton palibot sa balay.
9 Bansaya ang paggamit ug panahon nga sa ubang paagi mausik lang. Pananglitan, kon kinahanglan nga maghulat ka sa uban, gamitag maayo kanang panahona pinaagig pagbasa, pagsulat ug mga sulat, o paghuman sa pipila ubang hinungdanong buluhaton. Kon ikaw nagahulat diha sa linya, hayan makaarang ka sa pagpakighisgot nga motultol ngadto sa paghatag ug pamatuod. Ang laing hinungdanon alang sa tanan mao ang pagbaton ug igong pahulay ug lulinghayaw aron magpabiling mahimsog ug maigmat. Kini mapaarang kanimo sa pagtrabaho nga mas epektibo. Ang sakit nga gipatungha pinaagig kakulang sa gikinahanglang pahulay o katulog magpapugong kanimo sa paghatag ug hustong pagtagad sa mga butang nga mga unahonon gayod sa kinabuhi.
PAGPAUSWAG SA PERSONAL NGA KAHIKAYAN
10 Diha sa kalibotan sa negosyo, ang dugang panahon ug panlimbasog gigugol sa pagplano lamang kon unsaon sa pagpalampos sa gipunting nga buluhaton. Ang maayong negosyante makakaplag nga gasto-epektibo sa pag-organisar sa mga trabahante ug materyal sa dili pa ipatungha ang gipunting nga produkto. Siya nagaamgo nga kon ang gikinahanglang mga trabahante ug mga materyal dili mabatonan kon kanus-a ug kon diin kini gikinahanglan, dakong panahon ug salapi ang mawala ug siya dili makaganansiya. Kita, hinuon, aduna ing mas halangdong mga motibo sa pag-organisar sa atong kaugalingon. Kini nagaapil sa atong tinguha sa paghupot kanunay sa maayong relasyon uban kang Jehova, nga mahimong epektibo sa paghimog mga tinun-an, ug pagkab-ot sa atong tumong sa kinabuhing dayon. Busa, gikinahanglan sa pagpaneguro nga ania kanato ang hustong mga himan sa hustong panahon.
11 Pananglitan, aduna kitay lima ka miting sa kongregasyon sa matag semana. Ang materyal alang niining mga tigoma gipasukad sa pipila lainlaing mga basahon. Kana bang mga basahona anaa na? Ang gula ba sa Bantayanang Torre nga atong pagatun-an sa maong semana nagahin na, o ang panahon gigugol sa pagpangita niana? Ug unsa na man ang ubang gikinahanglang mga basahon, sama sa Atong Ministeryo sa Gingharian, ang songbok, Bibliya, ug ang publikasyon nga atong ginatun-an didto sa Pagtuon sa Basahon sa Kongregasyon? Maayo nga may tinudlong dapit alang niining mga butanga ug huptan kana dinha sa dihang dili gamiton. Niining paagiha, dali ta nga makita ang tukmang mga publikasyon sa dihang mangandam alang sa pag-alagad sa kanataran o sa mga tigom.
12 Ang mga ansiyano ug ministeryal nga mga alagad ilabinang nagakinahanglan nga magmahunahunaon sa ilang personal nga kahikayan. Tungod kay daghan ang buhatonon, sa sekular man o diha sa kongregasyon, “ang mas importanteng mga butang” usahay malimtan o mapasagdan. (Filip. 1:10) Pinaagig pagsunod sa sugyot nga huptan kanunay ang talaan sa mga unahonon mahimo gayong makabenepisyo. Imo ba kining gisulayan? Ang usa ka igsoong lalaki nagbaton sa maong listahan ug nagasubli niana sa dili pa ang kada tigom. Niining paagiha dako ang iyang malampos ug matino nga ang gikinahanglang buluhaton sa kongregasyon mabuhat.
13 Ang mga ansiyano kinahanglang adunay maayong paagi sa pag-atiman sa mga sulat sa kongregasyon. Ang mga sulat usahay mahimong makalibog ug mabudlay kon kana dili hustong pagkahikay. Busa, maayong mogahin kanunay ug pipila ka minutos aron lainon ang mga sulat nga kinahanglang tagoon o ipasa ngadto sa lain ug paglabog niadtong mahimo nang gision. Kon anaa kanimo ang mga sulat nga kinahanglang ilibot ngadto sa ubang ansiyano, paneguroa nga ikalibot kana gilayon. Ang pagbaton ug tinong luna diha sa imong sudlanan o kaha ibutang ang mga sulat sa separadong sobre o ‘folder’ makabulig kanimo nga matagad ang mga sulat o ubang materyal nga nagakinahanglan ug pag-atiman. Niining paagiha, ang importante mga sulat dili mawala o malangan.
KAHIKAYAN—USA KA ULIPON, DILI AGALON
14 Human masubli ang imong eskedyol, tinoa kon unsa ka dakong kahikayan ang gikinahanglan mo. Dili ta buot nga mahimong panatikong mga maghihingpit, nga sobra ang pag-organisar sa atong personal nga kinabuhi ngadto sa punto nga wala nay lawak sa paglainlain. Hinumdomi, kitang tanan mga tawo ug ang matag usa kanato adunay talagsaong luna sa mga kahimtang. Ang uban kanato mga ulitawo-dalaga, ang uban mga minyo. Ang mosaler sa usa ka pamilya basin dili mosaler sa lain. Ang personal nga kahikayan kinahanglang magtagad sa atong indibiduwal ug banaynong mga kahimtang. Batoni ang pag-ila ug mahimong mapaayonon subay sa mga prinsipyo sa Bibliya nga maoy mogiya kanimo sa pagbaton ug malamposong eskedyol.—Tan-awang The Watchtower sa Septiyembre 15, 1988, mga panid 28-30; Awake! sa Disyembre 8, 1987, mga panid 24-7; ug Awake! sa Disyembre 22, 1965, mga panid 9-12.
15 Sa di pa dugayng katuigan, ang pagpayano pinaagig pagsunod sa mga prinsipyo sa maayong kahikayan nagpatunghag pagkamasangpoton (efficiency) sa palakaw sa yutan-ong organisasyon ni Jehova. Mahimong bation sa uban nga aduna silay mga paagi nga mas pa gayong mosaler alang kanila sa personal. Buot nila nga ang Sosyedad modasig sa uban sa paggamit sa maong mga paagi, apan sagad kini gitagad na ug gisalindot tungod kay kana dili praktikal sa organisasyonal nga paagi. Nan, diha sa kaayohan sa panaghiusa ug kahanas, maoy maalamon nga sundon ang giaprobahan organisasyonal nga mga paagi, nga nagagamit sa mga paagi ug mga metodo nga nasabtan ug gigamit sa uban nga hayan maapektahan sa imong buluhaton.
16 Si Jehova maoy Diyos sa kahikayan ug kalinaw. (1 Cor. 14:33, 40) Siya nagtudlog panahon sa pagtuman sa iyang kabubut-on ug katuyoan. (Buh. 1:7) Pinaagi sa iyang Pulong, siya mahigugmaong milaraw kon unsa ang magpabalaka kanato ingong di-hingpit nga mga tawo. Pinaagig pagtultol gikan ni Jesu-Kristo pinaagig “matinumanon ug maalamong ulipon,” si Jehova nagatagana ug mapuslanong mga instruksiyon kon sa unsang paagi palamposon ang labing importanteng buluhaton nga ginahimo karon. (Mat. 24:45-47; 28:19, 20; Eccl. 12:13) Busa pinaagig pagsunod sa Kasulatanhong tambag nga anaa sa mga publikasyon sa Sosyedad, apil na ang nunot-panahong mga pahinumdom nga gilaraw niini nga suplemento, kita mahimong mas pa gayong organisado alang sa bug-os nga pagtuman sa atong ministeryo.—2 Tim. 4:5.