Gipangita Mo ba ang Diyosnong Kaalam?
1 “Padayong Pangitaa Ingong Natagong mga Bahandi” mao ang tema sa makapalihok nga pakigpulong sa ikaduhang adlaw sa “Balaang Hustisya” nga mga Kombensiyon. Kita ba nagapanikaysikay sa pagkahimong mas kugihang mga tigpangita sa mga bahandi sa kaalam?—Prov. 2:1-6.
2 Kita mahimong pordoy nga mga tigpangita sa bahandi kon panagsa lang nga basahon ta ang Bibliya o kon kita mapakyas sa pagbasa sa Ang Bantayanang Torre ug Pagmata! Kita ba nagakutkot sa mga bahandi sa kaalam diha sa Pulong sa Diyos sa dihang nagaandam sa mga pakigpulong, sa pagtubag sa mga pangutana sa Bibliya, o nagapangitag mga sulosyon sa mga gumonhap? Ang panahon sa pagdukiduki gikinahanglan aron makakaplag sa mga bahandi sa Bibliya, pero pagkadakong kalipay ang moresulta!—Prov. 3:13-18.
3 Karon atong magamit ang bag-ong publikasyong Insight on the Scriptures uban sa Index, Concordance, Reference Bible, ug ubang mga basahon sa atong librarya. Pagkamahinatagon gayod ni Jehova nga misuplay kanato sa tabang nga atong gikinahanglan aron pangitaon “ang lalom nga mga butang sa Diyos”!—1 Cor. 2:10.
4 Sa buntag sa Domingo sa kombensiyon, atong nadunggan ang pakigpulong “Pagmentinar sa Espirituwal nga Kahimsog diha sa Masakitong Kalibotan.” Imo bang mahinumdoman kon sa unsang paagi kita makalikay sa espirituwal nga sakit tungod sa mga kahuyangan sa unod, kalibotanong mga impluwensiya, ug mga paglingla sa Yawa? Mipatin-aw ang mamumulong nga atong mahuptan kanunay ang espirituwal nga kahimsog pinaagig dili gayod pagsalindot sa pagtuon, pagtambong sa tigom, ug pag-alagad sa kanataran. Ang paglikay sa daotang panagkauban ug mangil-ad kalibotanong lulinghayaw samtang usab nagalikay sa mga tawong “dili mosanong sa maayong mga pulong” makabulig man kanato sa pagmentinar sa mahimsog nga pagtuo.—1 Tim. 6:3, 4; Tito 1:13.
5 Samtang pagasundon ta ang mga puntos nga nakat-onan didto sa “Balaang Hustisya” Distritong Kombensiyon, kita magdesido nga maminaw pag-ayo sa Kristohanong mga tigom ug sa ingon makabaton ug dugang diyosnong kaalam.—2 Tim. 2:7.