Kon Unsaon sa Pagpalit sa Nahiangay nga Panahon
1 Ang pagbaton ug daghang buluhaton sa pag-alagad kang Jehova padayong nagapapuliki kanato! (1 Cor. 15:58) Atong giila ang panginahanglan sa personal nga pagtuon ug ingong usa ka pamilya, sa pagbasa sa Bibliya sa matag adlaw, sa pagpangandam alang sa ug pagtambong sa mga tigom sa kongregasyon, ug sa pagpakig-ambit nga makanunayon sa pag-alagad sa kanataran. Ang mga magtatan-aw adunay pagbantay ug uban pang mga responsabilidad sa kongregasyon. Ang pipila hayan adunay mga responsabilidad sa pamilya o mga obligasyon ngadto sa uban. Aron tukmang malampos ang tanan, gikinahanglan sa matag usa ang timbang ug maayong personal nga organisasyon.
2 Tinoa ang mga Unahonon: Ang kalamposan sa ‘pagpalit sa nahiangayng panahon alang sa atong kaugalingon’ nahasalig sa atong pagsabot ug maayong panghukom. (Efe. 5:15, 16) Angay natong tinoon kon unsa “ang mas hinungdanong mga butang” ug unahon kini. (Filip. 1:10) Usa ka magtiayon mihubit sa ilang panimalay niining paagiha: “Among gipuno ang among mga kinabuhi sa kamatuoran . . . Ang kamatuoran dili bahin sa among kinabuhi, kini mao ang among kinabuhi. Ang bisan unsa pang butanga nagasumikad diha niana.” Ang pag-una sa pagsimba ni Jehova sa kinabuhi sa usa maoy hinungdanon.
3 Ilha ang mga Tig-usik ug Panahon: Adunay 168 oras sa usa ka semana, ug kinahanglang gamiton nato sa maalamong paagi ang maong panahon. Aron makabaton ug igong panahon sa teokratikanhong mga kalihokan, angay natong maila ug pamenosan ang mga tig-usik ug panahon. Usa ka surbi nagpadayag nga ang aberids nga hamtong sa Tinipong Bansa nagagastog kapin sa 30 oras matag semana sa pagtan-awg TV! Alang sa uban, dakong panahon ang gikonsumo sa pagbasag kalibotanong mga basahon. Ang pipila hayan modebotog dako kaayong panahon sa sosyal nga mga buluhaton, lulinghayaw, o kalihokan sa kompiyuter. Maalamon ang pagsusi sa atong adlaw-adlaw nga rutina ug limitehan ang panahon nga atong gitugot sa di-hinungdanong mga buluhaton.
4 Ugmara ang Maayong Rutina: Bisan unsa pay atong personal nga mga sirkumstansiya, ang matag usa kanato makapalit sa panahon alang sa espirituwal nga mga pangagpas. Nakaplagan sa pipila nga ang pagsugod ug sayo sa matag adlaw nakatabang kanila nga makalampos ug dugang. Kon mogugol kitag dakong panahon sa pagsakay padulong sa trabaho o paghulat sa uban, hayan magamit nato ang pipila nianang panahona sa pagbasa sa Bibliya, pagpangandam sa mga tigom, o pagpaminaw sa mga cassette nga gitagana sa Sosyedad. Makabenepisyog dako ang mga pamilya pinaagig paggahin ug tinong panahon sa pagtuon nga tingob. Kon ang matag membro sa pamilya maanaa sa hustong panahon alang sa pagtuon sa pamilya, ang matag usa makapahimulos sanglit walay panahon nga mausik.
5 Sa matag adlaw nga molabay, labi pa kitang makaamgo nga “ang panahong nabilin mubo na.” (1 Cor. 7:29) Ang atong mga kinabuhi nahasandig kon giunsa nato paggamit ang nahibiling panahon. Kita mapanalanginan kon atong paliton ang nahiangayng panahon ug busa padayong nagauna sa intereses sa Gingharian!—Mat. 6:33.