Ipunting ang Imong Kinabuhi sa Buluhaton ni Jehova
1 Gipakasama ni Jesus ang iyang mga mamiminaw sa duha ka matang sa mga magtutukod. Ang usa nagtukod sa iyang paagi sa kinabuhi diha sa batong pamag-ang sa pagsunod kang Kristo ug nakahimo sa pagbarog sa mga bagyo sa pagsupak ug kasakitan. Ang lain nagtukod diha sa balas sa hinakog nga pagkadi-masinundanon ug wala makahimo sa pagbarog sa dihang midangat ang pagpit-os. (Mat. 7:24-27) Sa pagkinabuhi niining konklusyon sa sistema sa mga butang, atong masugamak ang daghang bagyo sa kasakitan. Sa kapunawpunawan ang naglugitom nga mga panganod sa dakong kasakitan kusog kaayong nanibug-ok. Molahutay ba kita ngadto sa kataposan uban ang atong tibuok nga pagtuo? (Mat. 24:3, 13, 21) Nag-agad ug dako kon sa unsang paagi kita nagatukod sa atong mga kinabuhi karon. Busa, dinalian ang pagsukna sa atong kaugalingon, ‘Ako ba lig-ong nagatukod sa akong Kristohanong kinabuhi diha sa masinundanong pag-alagad ngadto sa Diyos?’
2 Unsay ipasabot sa pagpunting sa atong mga kinabuhi sa buluhaton ni Jehova? Nagpasabot kini sa paghimo kang Jehova nga sentro gayod sa atong mga kinabuhi. Nagalangkit kini sa pagpunting sa Gingharian ingon nga maoy atong pangunang kabalaka. Nanginahanglan kinig pagsunod sa Diyos diha sa tanang kalihokan sa atong matag adlawng mga kinabuhi. Gikinahanglan niini ang atong pagkabug-os-kasingkasing sa atong personal, pamilyahanon, ug kongregasyonal nga pagtuon sa Bibliya ug sa atong ministeryo sa kanataran, nga maghimo niini nga atong mga unahonon. (Eccl. 12:13; Mat. 6:33) Ang maong masinundanong dalan moresulta sa malig-on-bato nga pagtuo, nga dili mahugno atubangan sa bisan unsang mga bagyo sa kasakitan nga tingali mohampak.
3 Usa ka kalipay ang paglantaw sa minilyong katawhan nga masaligong nagapunting sa ilang mga kinabuhi ug sa ilang mga paglaom alang sa umaabot diha sa pag-alagad sa Diyos, sama sa gihimo ni Jesus. (Juan 4:34) Gisunod nila ang masubayong eskedyul sa teokratikanhong mga kalihokan ug nagapahimulos sa dagayang mga panalangin ingong resulta. Usa ka inahan misaysay kon sa unsang paagi siya ug ang iyang bana malamposong nakamatuto sa ilang duha ka anak nga lalaki sa pag-alagad kang Jehova: “Among gipuno ang among mga kinabuhi sa kamatuoran—pag-adto sa tanang kombensiyon, pagpangandam ug pagtambong sa mga tigom, ug sa paghimo sa pag-alagad sa kanataran nga regular nga bahin sa among mga kinabuhi.” Ang iyang bana midugang: “Ang kamatuoran dili bahin sa among kinabuhi, kini mao ang among kinabuhi. Ang tanang ubang butang nagalibot na niana.” Ikaw ba usab naghimo sa pag-alagad kang Jehova ingong unahonon gayod sa imong pamilya?
4 Paglaraw ug Mosaler nga Senemanang Eskebyul: Ang organisasyon ni Jehova nagatabang kanato sa pagsunod sa usa ka maayong espirituwal nga rutina pinaagig paghikay ug lima ka tigom sa usa ka semana. Ang mga Kristohanon nga nagapunting sa ilang mga kinabuhi sa pagsimba kang Jehova nagahikay sa ilang sekular ug pamilyahanong mga kalihokan aron makatambong sa tanan niining hinungdanong mga tigom. Dili nila tugotan ang mga butang nga di-kaayo importante sa pagbalda sa ilang regular nga pagtambong.—Filip. 1:10; Heb. 10:25.
5 Ang hamtong nga mga Kristohanon nagaila nga ingon gayod nga hinungdanon ang pagbaton ug regular nga mga pagkaon sa tinong mga panahon sa matag adlaw, mao man hinungdanon ang paghimog tinong eskedyul alang sa personal ug pamilyahanong pagtuon, lakip ang pagpangandam sa mga tigom. (Mat. 4:4) Makagahin ka ba ug labing menos 15- o 20-minutos nga yugto sa matag adlaw alang sa personal nga pagtuon? Ang yawi mao ang dili pagtugot sa ubang mga butang nga makahilabot sa panahon nga gigahin sa pagtuon. Himoa kana nga mapuslanong batasan. Kini hayan nanginahanglan nga mobangon nga sayosayo sa matag buntag kay sa imong ginahimo karon. Ang 17,000 ka membro sa tibuok-kalibotang pamilyang Bethel mobangong sayo sa buntag aron sa paghisgot sa teksto sa adlaw. Siyempre, ang pagbangon ug sayo nagakinahanglan sa pag-eskedyul sa pagkatulog sa pagkagabii sa rasonableng oras aron makasugod sa pagkaugma nga piskay ug nakapahulay.
6 Kon ikaw usa ka ulo sa pamilya, panguna sa pagplano ug pag-organisar sa eskedyul sa imong pamilya sa teokratikanhong kalihokan. Ang pipila ka pamilya mobasa sa Bibliya, sa Yearbook, o laing publikasyon nga tingob samtang sila mopahulay human sa panihapon. Daghang ginikanan nga nakakita sa ilang mga anak nga mitubong himsog sa espirituwal nga mga Kristohanon miingon nga ang usa ka hinungdan nga nakadugang sa ilang kalamposan mao ang kostumbre sa pamilya sa paggahin ug usa ka gabii sa matag semana nga nianang higayona ilang duyog nga natagamtam ang espirituwal nga kalig-on. Usa sa maong amahan miingon: “Akong gibati nga ang espirituwal nga kaugmaran sa among mga anak maoy sa dakong bahin tungod sa among regular nga pagtuon sa pamilya sa magabii sa Miyerkoles, nga nagsugod mga 30 ka tuig na kanhi.” Ang tanang tulo sa iyang mga anak nabawtismohan sa sayong pangedaron, ug sa ulahi ang tanang tulo misulod sa bug-os-panahong ministeryo. Dugang pa sa pagtuon sa pamilya, ang mga presentasyon sa pag-alagad sa kanataran o mga bahin sa tigom mahimong mabansaybansay ug ang ubang makaayong mga kalihokan mahimong tingob nga mapahimuslan.
7 Sa imong senemanang eskedyul, imo bang ‘gipalit ang panahon’ para sa pagsangyaw sa Gingharian? (Col. 4:5) Ang kadaghanan kanato dunay puliki nga mga kinabuhi, nga may pamilyahanon ug kongregasyonal nga mga kaakohan nga atimanon. Kon dili kita maghimog tinong mga kahikayan sa pag-ambit sa buluhatong pagsangyaw ug pagpanudlo sa matag semana, dali ra kaayo alang sa ubang mga butang sa pagtuok niining hinungdanong kalihokan. Ang tag-iya sa usa ka dakong ranso sa baka miingon: “Sa mga 1944 akong naamgohan nga ang bugtong paagi nga ako makagawas sa pagsangyaw mao ang pag-eskedyul ug usa ka tinong adlaw alang niana. Hangtod karon mogahin gihapon ko ug usa ka adlaw sulod sa semana alang sa pagsangyaw.” Usa ka Kristohanong ansiyano nakakaplag nga ang pagbaton ug tinong eskedyul sa pagsangyaw nagapaarang kaniya sa pag-aberids ug 15 oras sa usa ka bulan diha sa pagsangyaw nga buluhaton. Kon duna siya ing sekular nga negosyo sa Sabado, iyang ieskedyul kana human sa iyang pag-alagad sa kanataran sa buntag. Ikaw ba ug ang imong pamilya makaeskedyul ug labing menos usa ka adlaw sa matag semana sa pag-alagad sa kanataran, nga maghimo niini nga bahin sa imong espirituwal nga paagi sa kinabuhi?—Filip. 3:16.
8 Susiha ang Imong Rutina sa Kinabuhi: Adunay mga butang nga mobabag sa pagpunting sa atong mga kinabuhi sa buluhaton ni Jehova. Ang wala-damhang mga kahimtang tingali mosamok sa atong giplano pag-ayong eskedyul sa pagtuon, mga tigom, ug pagsangyaw. Ug ang atong Kaaway, si Satanas, mobuhat sa tanan niyang mahimo aron ‘moali sa atong alagianan’ ug magpakgang sa atong mga plano. (1 Tes. 2:18; Efe. 6:12, 13) Ayawg tugoti kining mga babaga sa pagpaluya kanimo, aron ikaw moundang. Himoa ang bisan unsang mga pagpasibo nga gikinahanglan sa pagtuman sa imong gieskedyul nga teokratikanhong kalihokan. Ang determinasyon ug paglahutay maoy kinahanglanon sa pagpalampos sa tinuod nga mapuslanon.
9 Kinahanglang dili nato tugotan ang kalibotanong mga impluwensiya ug ang pagnudnod sa atong di-hingpit nga unod nga mopasulod ug di-espirituwal nga mga kalihokan nga mosugod sa dugang ug dugang pa nga pagtibawas sa atong panahon ug pagtagad. Ang pagsusi sa kaugalingon kinahanglanon, nga nagagamit sa maong mga pangutana sama sa: ‘Ang ako bang dalan sa kinabuhi hinayhinay nga nahimong di-timbang o wala mapunting, ingnon ta? Misugod ba ako sa pagpunting sa akong kinabuhi sa mga butang niining lumalabay nga kalibotan? (1 Juan 2:15-17) Unsa ka dakong panahon ang akong ginagahin sa personal nga mga pangagpas, paharuhay nga panaw, mga kalihokan sa esports, o ubang kalingawan—lakip na ang pagtan-awg telebisyon o sa pagsuhid sa Internet—kon itandi sa panahong gigugol diha sa espirituwal nga mga kalihokan?’
10 Kon imong mamatikdan nga ang imong kinabuhi nagkalamokat na sa dugang ug dugang di-kinahanglanong mga kalihokan, unsay angayng himoon? Sama gayod kang Pablo nga miampo nga ang iyang mga igsoon ‘mapasibo ug balik,’ o ‘mamatul-id sa tukma,’ nganong dili mangaliya kang Jehova alang sa tabang aron masentro pag-usab diha sa iyang pag-alagad? (2 Cor. 13:9, 11, ptn.) Dayon magmadeterminado sa pagkinabuhi sumala sa imong gihukom ug himoa ang gikinahanglang mga pagpasibo. (1 Cor. 9:26, 27) Si Jehova motabang nimo nga dili makaliso ngadto sa tuo o sa wala sa masinugtanong pag-alagad kaniya.—Itandi ang Isaias 30:20, 21.
11 Pagpabiling Puliki sa Malipayong Pag-alagab sa Diyos: Minilyon ang kawang nga nangagpas ug kalipay lamang nakakaplag nga samtang ang kataposan sa kinabuhi nagakahiduol, ang materyal nga mga butang nga ilang mainitong ginapangab-ot wala maghatag kanilag dumalayong kalipay. Kadto maoy “paghakop ug hangin.” (Eccl. 2:11) Sa laing bahin, sa dihang atong huptan ang atong mga kinabuhi nga nasentro kang Jehova, ‘nga magbutang kaniya sa atong atubangan kanunay,’ atong masinati ang dulot nga katagbawan. (Sal. 16:8, 11) Kini ingon niana tungod kay si Jehova mao gayod ang rason sa atong paglungtad. (Pin. 4:11) Kon wala siya, ang Dakong Tagtuyo, ang kinabuhi walay kahulogan. Ang pag-alagad kang Jehova nagpuno sa atong mga kinabuhi sa mapuslanon, may-katuyoang kalihokan nga nagahatag kaayohan kanato maingon man sa uban diha sa dumalayong paagi, oo, diha sa walay kataposang paagi.
12 Hinungdanon nga dili mahimong di-magmabalak-on ug mawad-an sa atong sentido sa pagkadinalian maylabot sa kusog-nagsingabot nga kataposan sa kalibotan ni Satanas. Ang atong adlaw-adlaw nga pagkinabuhi naimpluwensiyahan sa atong panglantaw sa umaabot. Ang katawhan sa mga adlaw ni Noe, nga wala motuo nga dunay globonhong lunop, ‘wala magmatikod,’ nga nagsentro sa ilang matag adlawng mga kinabuhi diha sa personal nga mga pangagpas—nanagpangaon, nanagpanginom, ug nanagminyo—hangtod ang lunop “mibanlas kanilang tanan.” (Mat. 24:37-39) Karong adlawa, silang nagasentro sa ilang mga kinabuhi niining kalibotana makakita sa ilang mga palaaboton sa umaabot nga mapusgay sa ilang atubangan diha sa labing dakong kalaglagan nga sukad masinati sa tawo, “ang adlaw ni Jehova.”—2 Ped. 3:10-12.
13 Nan, padayon sa pagpunting sa imong kinabuhi sa buhi nga Diyos, si Jehova, ug sa pagbuhat sa iyang kabubut-on. Walay puhonan nga imong mahimo niining kinabuhia nga aduna ing maong kasaligang Tigpaluyo nga sama kang Jehova. Siya dili mamakak—siya magmatinud-anon sa iyang mga saad. (Tito 1:2) Siya dili mamatay—walay butang nga gisalig kang Jehova ang mawala. (Hab. 1:12; 2 Tim. 1:12) Ang kinabuhi sa pagkamasinugtanon ug pagtuo nga atong ginatukod karon mao lamang ang sinugdanan sa usa ka kinabuhi nga molungtad sa walay kataposan diha sa malipayong pag-alagad sa atong malipayong Diyos!—1 Tim. 1:11; 6:19.
[Blurb sa panid 3]
“Ang kamatuoran dili bahin sa among kinabuhi, kini mao ang among kinabuhi. Ang tanang ubang butang nagalibot na niana.”