Mga Ulo sa Pamilya​—Padayona ang Maayong Naandan sa Espirituwal nga Paagi

¹ Bisan pag nagkinabuhi sulod sa daghang dekada taliwala sa idolatriya ug pagkadaotan sa Babilonya, nailhan si Daniel tungod sa pag-alagad kang Jehova “kanunay.” (Dan. 6:​16, 20) Sa unsang paagi iyang padayong nahuptan ang iyang espirituwalidad? Ang rekord sa Bibliya nagpaila nga duna siyay maayong naandan sa pagtuman sa mga kalihokan nga nalangkit sa matuod nga pagsimba. Pananglitan, naandan na niyang mag-ampo katulo sa usa ka adlaw diha sa iyang lawak-sa-atop. (Dan. 6:10) Walay duhaduha, nakahimo na usab siyag kahikayan alang sa ubang espirituwal nga mga kalihokan, sama sa pagbasa sa Balaod. Busa, sa dihang nakaatubang ug pagsulay nga nagpameligro sa iyang kinabuhi, si Daniel wala matarog sa iyang debosyon kang Jehova, ug siya naluwas sa milagrosong paagi.​—Dan. 6:4-22.

² Sa samang paagi karong adlawa, kita kinahanglang manlimbasog nga “magpadayon sa pagtukaw uban ang bug-os nga pagkamakanunayon.” (Efe. 6:18) Ang kalibotan nga atong gipuy-an “nailalom sa gahom sa usa nga daotan.” (1 Juan 5:19) Ang pagsupak o mga pagsulay mahimong kalit nga motungha ug magsulay sa atong pagtuo. Sa panahon sa dakong kasakitan, ang mga alagad sa Diyos mao ang tumong sa bug-os nga pag-atake ni Gog sa Magog, nga niana morag walay kaikyasan. Kini nagkinahanglan ug bug-os nga pagsalig kang Jehova.​—Ezeq. 38:14-16.

³ “Ang usa ka hinungdanong butang mao ang paghimo sa epektibong pamilyahanong pagbasa, pagtuon, ug panaghisgot sa Bibliya nga paagi sa kinabuhi.” Kana ang giingon sa introduksiyon sa drama sa distritong kombensiyon sa 1998 nga nag-ulohan ug “Mga Pamilya​—Himoa ang Adlaw-Adlaw nga Pagbasa sa Bibliya nga Paagi sa Inyong Kinabuhi!” Kini nagpadayon: “Kon sundon sa mga pamilya ang maong programa nga regular ug sa paagi nga maghimo sa Bibliya nga buhi, kining binase-sa-Bibliya nga rutina mahimong adunay dakong epekto sa pamilya. Kini magapauswag sa atong kahibalo. Palig-onon niini ang atong pagtuo. Ug kini maghatag kanatog mga panig-ingnan​—matinumanon gayod nga mga lalaki ug babaye sa karaang panahon—nga magadasig, magatukmod kanato sa pagbarog dapig sa kamatuoran.” Samtang tagdon nato ang lainlaing mga bahin sa maayong espirituwal nga naandan, ang mga ulo sa pamilya kinahanglang mangitag usa o duha ka paagi sa pagpauswag sa espirituwal nga programa sa ilang pamilya.

⁴ Pagsusi sa Pulong sa Diyos sa Adlaw-Adlaw: “Sa dihang ang Gingharian sa Diyos magmando nga walay mosupak ug ang iyang kabubut-on matuman sa yuta maingon man sa langit, walay mga tawong mapintas​—wala, wala bisan mga mananap—ang mohimog ‘kadaot o mopahinabog bisan unsang paggun-ob.’ (Isa. 11:9; Mat. 6:​9, 10)” Kanang mga pulonga mabasa sa Pagsusi sa Kasulatan sa Adlaw-Adlaw​—2001 diha sa mga komento sa teksto alang sa Septiyembre 11. Pagkamakapahupay niining maong pahinumdom! Ingong ulo sa pamilya, naandan mo ba sa matag adlaw ang pagsusi sa teksto sa Bibliya ug mga komento uban sa imong pamilya? Mapuslanon kaayo kini. Kon dili praktikal nga magkauban sa buntag, tingali mahimo mo kini sa gabii. Usa ka amahan miingon: “Ang panihapon maoy usa ka maayong panahon nga kami maghisgot sa inadlawng teksto sa Bibliya.”

⁵ Angay kang dayegon kon duna ka nay maayong naandan sa paghisgot sa inadlawng teksto ingong pamilya. Tingali makabaton kag dugang kaayohan pinaagi sa pagbasa ug usa ka bahin sa Bibliya sa samang higayon. Gibatasan sa uban ang pagbasa sa tibuok kapitulo nga gikuhaan sa teksto sa maong adlaw. Ang uban naghimog sunodsunod nga pagbasa, nga anam-anam nga humanon ang piniling basahon sa Bibliya. Ang pagbasa sa Bibliya adlaw-adlaw motabang sa imong pamilya sa pag-ugmad ug maayong kahadlok nga dili makapasuko kang Jehova ug mopalalom sa ilang tinguha sa pagbuhat sa iyang kabubut-on.​—Deut. 17:18-20.

⁶ Ang programa sa imong pamilya sa pagbasa sa Bibliya ug pagsusi sa inadlawng teksto mas makahatag pa ug kaayohan kon mogahin kag pipila ka minuto sa paghisgot sa praktikal nga bili sa maong impormasyon. Ang Tunghaan sa Ministeryo nga teksbok, sa panid 60, naghatag niini nga sugyot: “Mahimong mopili kag pipila ka bersikulo gikan sa gieskedyul nga pagbasa sa Bibliya alang sa semana, mohisgot sa kahulogan niini, ug unya mosuknag mga pangutanang ingon niini: ‘Sa unsang paagi kini makahatag ug giya alang kanato? Sa unsang paagi magamit nato kining mga bersikuloha diha sa ministeryo? Unsay gibutyag niini bahin kang Jehova ug sa iyang paagi sa pagbuhat sa mga butang, ug sa unsang paagi palig-onon niini ang atong pagpabili alang kaniya?’” Ang maong espirituwal nga mga panaghisgot motabang sa tanan sa imong panimalay nga ‘padayong masabtan kon unsa ang kabubut-on ni Jehova.’​—Efe. 5:17.

⁷ Pagtuon sa Pamilya: Ang pagdumala ug makanunayon nga pagtuon sa pamilya matag semana maoy usa ka maayong paagi alang sa mga ulo sa pamilya sa pagpakita sa ilang mga anak nga angayng unahon ang espirituwal nga mga butang. Usa ka batan-ong lalaki nahinumdom: “Usahay kapoy na kaayo si Papa gikan sa trabahoan ug katulogon na kaayo, apan bisan pa niana gidumala gihapon ang pagtuon, ug kini nakatabang kanamo sa pagpabili sa pagkaseryoso niini.” Makaamot usab ang mga anak sa kalamposan sa maong kahikayan. Usa ka pamilya nga may siyam ka anak ang regular nga mibangon ug alas singko aron ipahigayon ang ilang pagtuon sa pamilya tungod kay walay laing panahon nga mahimo kini.

⁸ Aron epektibo ang pagtuon sa pamilya, ang ulo sa pamilya kinahanglang ‘magtagad kanunay sa iyang pagpanudlo.’ (1 Tim. 4:16) Ang Tunghaan sa Ministeryo nga teksbok, sa panid 32, nag-ingon: “Ikaingon nga ang epektibong pagtuon sa pamilya magsugod pinaagi sa pagtuon sa imong pamilya mismo. Komosta ang pag-uswag sa espirituwal sa mga membro sa imong pamilya? . . . Sa dihang ikaw kauban sa imong mga anak sa ministeryo sa kanataran, dili ba sila maulaw nga magpaila sa ilang kaugalingon ingong mga Saksi ni Jehova atubangan sa ilang mga isigkaingon? Nagkalipay ba sila sa inyong programa sa pamilyahanong pagbasa ug pagtuon sa Bibliya? Ginahimo ba gayod nila ang dalan ni Jehova nga ilang dalan sa kinabuhi? Ang maampingong pagpaniid mobutyag kon unsay angay nimo, ingong ulo sa pamilya, nga buhaton aron matukod ug malig-on ang espirituwal nga mga hiyas sa matag membro sa pamilya.”

⁹ Mga Tigom sa Kongregasyon: Ang pagpangandam ug pagtambong sa mga tigom sa kongregasyon angayng mahimong hinungdanong bahin sa imong senemanang naandan. (Heb. 10:​24, 25) Usahay, makahimo ka sa pag-andam alang sa pipila ka tigom ingong pamilya. Inay himoon kana nga apiki na sa panahon, makapangandam ka ba nga mas abante? Ang usa ka hapsay nga naandan niining bahina magpauswag sa kalidad sa imong pagpangandam ug sa mga kaayohan nga imong madawat gikan sa mga tigom.​—Prov. 21:5.

¹⁰ Ang kalidad ug pagkamakanunayon maoy mga timailhan sa usa ka epektibong espirituwal nga naandan. Unsa na man kon ang mga kahimtang makapalisod kanimo sa pagpangandam sa tanang tigom? Ang Tunghaan sa Ministeryo nga teksbok, sa panid 31, misugyot niini: “Likayi ang mga lit-ag sa pagdalidali ug basa sa materyal aron lang matapos kana o, daotan pa, sa dili na lang pagtuon kay dili ka man makatuon sa tanan. Hinunoa, tinoa kon pilay imong matun-an, ug tun-i kanag maayo. Himoa kana sa kada semana. Ngadtongadto, paningkamoti ang pagpauswag aron maapil ang ubang mga tigom.”

¹¹ Kon ang mga pamilya moabot ug sayo sa mga tigom, motabang kini kanila sa pag-andam sa ilang hunahuna sa pagdayeg kang Jehova ug sa pagkuhag kaayohan gikan sa instruksiyon nga iyang gitagana. Naandan ba kini sa imong pamilya? Nagkinahanglan kini ug maayong pagplano ug kooperasyon sa tanan diha sa panimalay. Kon mamatikdan mo kanunay nga ang imong pamilya nagdalidali ug wala mahimutang panahon sa tigom, makahimo ka bag mga pagpasibo sa imong naandan? Duna bay mga butang nga kinahanglang andamon daan? Kon ang usa ka membro sa pamilya nabug-atan sa daghang buluhaton, makatabang ba ang uban? Dili ba mamenosan ang kapit-os kon andam nang mobiya ang tanan pipila ka minutos nga sayosayo? Ang maayong pagplano makaamot sa pagpalambo sa espiritu sa kalinaw diha sa pamilya ug sa kongregasyon.​—1 Cor. 14:​33, 40.

¹² Pag-alagad sa Kanataran: Ang pagtukod ug tinong mga panahon sa pagpakig-ambit diha sa ministeryo maoy laing bahin sa maayong espirituwal nga naandan. Usa ka batan-ong lalaki nga ginganlag Jayson nahinumdom: “Sa akong pamilya, ang mga Sabado sa buntag kanunay gayod nga igugol sa pag-alagad sa kanataran. Maayo kini alang kanako tungod kay sa magsige ako ug gula sa kanataran, mas dako ang akong nakitang kaayohan nga nahimo niini ug mas malipay na akong makigbahin niini.” Daghang gimatuto sa panimalay nga Saksi ang nakamatikod nga ang pagbaton ug tinong panahon alang sa ministeryo matag semana nakatabang kanila sa pag-uswag ingong Kristohanong mga ministro.

¹³ Ang usa ka hapsay nga naandan makatabang usab aron mas makalilipay ug mas mabungahon ang panahon nga gigugol sa imong pamilya diha sa pag-alagad sa kanataran. Sa unsang paagi kini mapalampos? Ang Hulyo 1, 1999, Bantayanang Torre, panid 21, misugyot niini: “Kamo ba sa matag karon ug unya naggamit ug panahon sa inyong pagtuon sa pamilya aron sa pag-abag sa mga membro sa inyong panimalay sa pagpangandam alang sa pag-alagad sa kanataran sa maong semana? Ang paghimo sa ingon mahimong mapuslanon kaayo. (2 Timoteo 2:15) Kini makatabang sa paghimo sa ilang pag-alagad nga makahuloganon ug mabungahon. Usahay, igahin tingali ninyo ang bug-os nga sesyon sa pagtuon alang sa maong pagpangandam. Mahimong inyong hisgotan ang mga bahin sa pag-alagad sa ministeryo nga mas subsob diha sa mas mugbong mga panaghisgot sa kataposan sa pagtuon sa pamilya o sa uban pang panahon sa sulod sa maong semana.” Nasulayan na ba kini sa imong pamilya?

¹⁴ Magpadayon sa Pag-uswag: Gikan ning maong panaghisgot, namatikdan mo ba ang mga bahin nga maayo ang nahimo sa imong pamilya? Dayega ang imong pamilya, ug paningkamoti nga mapauswag kini. Kon nakita mong daghang bahin ang kinahanglang pauswagon, pagpilig usa o duha ka bahin nga unang pauswagon. Kon mahimo na kining bahin sa imong espirituwal nga naandan, pauswaga ang lain pang usa o duha ka bahin. Magmapositibo ug magmauswagon. (Filip. 4:​4, 5) Ang pagtukod ug maayong naandan sa espirituwal nga paagi alang sa imong pamilya nagkinahanglag dakong paningkamot, apan takos gayod kini, tungod kay si Jehova nagpasalig kanato: “Siya nga nagasubay sa matul-id nga dalan, ipakita ko kaniya ang pagluwas sa Diyos.”​—Sal. 50:23.