Padayon sa Paglakaw nga Mauswagon Diha sa Hapsay nga Paagi

¹ Si apostol Pablo adunay espesyal nga pagbati sa kongregasyon sa Filipos, nga iyang natabangan nga matukod. Siya mapasalamaton sa ilang materyal nga mga tagana ug naghisgot kanila ingong usa ka maayong panig-ingnan.​—2 Cor. 8:1-6.

² Ang sulat ni Pablo sa mga taga-Filipos maoy tinukmod sa halalom nga gugma. Ang librong Insight, Tomo 2, panid 631, mitaho: “Sa tibuok sulat siya nagadasig sa kongregasyon sa Filipos sa pagpadayon sa ilang maayong kurso​—pagtinguha ug mas lalom nga pagsabot ug seguradong pagpangupot sa Pulong sa kinabuhi, mas malig-ong pagtuo, ug paglaom sa ganti nga moabot.” Sila mainitong misanong, nga nagalig-on sa bugkos sa gugma taliwala kanila ug sa apostol. Ang mga pulong ni Pablo may espesyal nga kahulogan alang kanato karon, ug may maayo kitang katarongan sa pagtagad ilabina sa iyang tambag sa Filipos 3:15-17.

³ Ang Hamtong nga Tinamdan sa Kaisipan Hinungdanon: Sa Filipos 3:15, si Pablo nagsulat ingong usa ka tawo nga may mga tuig sa kasinatian. Siya naghangyo kanila ingong hamtong nga mga Kristohanon nga may hustong tinamdan sa kaisipan. Samtang ang ilang tinamdan sa kaisipan nagbanaag sa pagpaubos ug pagpabili nga gipasundayag ni Jesus, sila magapadayong “walay-ikasaway ug inosente, mga anak sa Diyos nga walay lama . . . , nga padayong hugot nga nangupot sa pulong sa kinabuhi.” (Filip. 2:15, 16) Sa dihang basahon nato kanang mga pulonga, angayng bation nato nga si Pablo nakigsulti kanato. Sa ingon kita nagatinguha gayod sa pagbaton sa samang tinamdan sa kaisipan nga nabatonan ni Jesus, nga magapakitag mapainubsanong pagpabili sa atong mga pribilehiyo. Kanunay kitang mangamuyo kang Jehova sa pag-ampo, nga magahangyo ug panabang alang niini ug sa ubang mga butang.​—Filip. 4:6, 7.

⁴ Ingon sa gipakita sa Filipos 3:16, kitang tanan angayng maningkamot nga mouswag. Ang pulong “uswag” nagakahulogang “nagalihok paunahan, pag-abante.” Ang mga tawong mauswagon “interesado sa bag-ong mga ideya, mga kaplag, o mga kahigayonan.” Buot ni Pablo nga makasabot ang mga taga-Filipos nga ang Kristiyanidad dili gayod diaktibo ug kadtong nangangkon niana kinahanglang padayong magalihok paunahan. Ang ilang mauswagong espiritu ipakita pinaagig pagkaandam nga mosusi sa kaugalingon, sa pag-ila sa ilang mga kahuyangan, ug sa pagpangab-ot sa mga kahigayonan nga makabuhat ug labaw pa. Karong adlawa ang yutan-ong organisasyon ni Jehova padayong nagauswag sa unahan. Ang matag usa kanato kinahanglang maganunot niana, nga magapahimulos sa tanang mga tagana niini ug bug-os nga makig-ambit sa buluhaton niini.

⁵ Ang Pag-uswag Nagakinahanglan ug Mahapsay nga Paagi: Si Pablo mipadayon pinaagig pagdasig sa iyang mga igsoon nga “managlakaw nga mahusay sa samang naandan nga paagi.” (Filip. 3:16) Ang pagkahapsay nagakinahanglan nga ibutang nato sa hustong mga dapit ang mga butang nga may kalabotan sa usag usa. Ang mga Kristohanon sa Filipos nagpabilin diha sa ilang hustong dapit, nagapabiling suod sa organisasyon ni Jehova ug sa usag usa. Ang ilang mga kinabuhi gimandoan sa balaod sa gugma. (Juan 15:17; Filip. 2:1, 2) Si Pablo miawhag kanila nga “managgawi sa paaging takos sa maayong balita.” (Filip. 1:27) Ang panginahanglan sa pagkahapsay ug maayong pamatasan maoy sama ka hinungdanon alang sa mga Kristohanon karon.

⁶ Ang usa ka naandang paagi maoy usa ka nabatasan nga pagtuman sa usa ka napahiluna na nga pamaagi. Ang pagbaton ug usa ka naandang paagi maoy mapuslanon tungod kay dili na kinahanglang mohunong kita aron pagdesider kon unsay buhaton sa sunod​—natukod na nato ang usa ka napahilunang sumbanan nga atong gisunod pinaagig pagbatasan niana.

⁷ Ang usa ka hapsay nga teokratikanhong paagi nagalangkob sa mga panggawi nga makapalig-on​—uban sa tumong nga maglig-on sa atong kaugalingon sa espirituwal, pagtabang sa uban, ug pagbuhat ug labaw pa sa pag-alagad kang Jehova. Aron mabatonan kining mga tumonga nagakinahanglan ug pagtukod ug usa ka naandang paagi sa personal nga pagtuon, regular nga pagtambong sa mga tigom, ug pagpakig-ambit sa pagwaling buluhaton.

⁸ Mga Kinahanglanon nga Nalakip sa usa ka Hapsay nga Paagi: Usa ka kinahanglanon mao ang “tukmang kahibalo ug bug-os mailahong pagpanabot.” (Filip. 1:9) Ang personal nga pagtuon nagapalalom sa atong pagtuo, nagalig-on sa atong gugma sa kamatuoran, ug nagapalihok kanato ngadto sa maayong mga buhat. Hinuon, ang pipila naglisod sa paghupot ug regular nga mga batasan sa pagtuon. Usa sa mga katarongang gihatag mao ang kakulang sa panahon.

⁹ Ang matag adlaw nga pagbasa sa Bibliya “mapuslanon” sa tanang paagi. (2 Tim. 3:16, 17) Unsaon man nato paggahin ug panahon alang sa pagtuon sa Bibliya diha sa atong matag adlaw nga kalihokan? Ang pipila nagabuhat niana pinaagig pagbangon mga pipila ka minuto nga mas sayo matag buntag, sa dihang lagsik ang ilang hunahuna. Ang uban magabasa sulod sa pipila ka minuto una pa matulog. Ang mga asawa nga naa ra sa balay makagamit ug diyutayng panahon sa matag hapon una pa manguli ang uban gikan sa trabaho o eskuwelahan. Dugang pa sa pagbasa sa Bibliya, ang pipila nagalakip pagbasa sa librong Mga Magmamantala diha sa ilang senemana nga kalihokan sa pagtuon.

¹⁰ Sa dihang kita magpahiluna ug bag-ong mga batasan, kini mahimong mosumpaki sa atong daang mga batasan. Sa miagi mahimong gitugotan nato ang dili-hinungdanong mga kalihokan nga makahurot sa atong panahon. Ang pagbiya nianang batasana dili sayon. Walay usa nga magdiktar sa atong mga batasan sa pagtuon; ni gisugo kita nga magpatin-aw kon unsay atong gibuhat niining bahina. Ang atong regular nga mga batasan sa pagtuon nagadepende sa atong pagpabili sa “mas mahinungdanong mga butang” ug sa atong pagkaandam nga magpahimulos sa “nahiangayng panahon.”​—Filip. 1:10; Efe. 5:16.

¹¹ Ang Kristohanong mga tigom nagadulag mahinungdanong papel sa atong espirituwal nga pag-uswag, nga nagataganag instruksiyon ug pagdasig. Busa, ang pagtambong sa mga tigom maoy laing hinungdanong bahin sa atong hapsay nga kalihokan. Si Pablo nagpasiugda nga kana dili kay usa ka kapilian.​—Heb. 10:24, 25.

¹² Unsaon man nato pagpakitag kahapsay sa dihang ginaplano nato ang atong senemanang eskedyol? Ang pipila nagahikay ug tinong mga panahon sa pag-atiman sa personal nga mga pangagpas ug unya mosulay sa pagpalusot sa mga tigom kon makalugar, apan dili gayod kana angay. Ang atong senemanang mga tigom kinahanglang hatagan ug pangunang pagtagad, nga ang ubang mga kalihokan giplano sa mga panahong walay mga tigom.

¹³ Ang regular nga pagtambong sa tigom nagakinahanglag maayong pagplano ug pagtinabangay sa pamilya. Sa mga adlaw sa semana ang kadaghanan nato may puliking eskedyol. Kini nagapasabot nga ang panihapon kinahanglang ieskedyol nga sayo aron ang pamilya may panahon sa pagkaon, pagpangandam, ug moabot una pa magsugod ang tigom. Sa maong katuyoan ang mga membro sa pamilya magtinabangay sa nagkalainlaing mga paagi.

¹⁴ Ang regular nga pagsangyaw mahinungdanon kon buot natong padayong magalakaw nga mauswagon diha sa hapsay nga paagi. Kitang tanan nagaila sa atong kaakohan sa pagwali sa mensahe sa Gingharian. Kana ang nakapahimo natong mga Saksi ni Jehova. (Isa. 43:10) Sanglit kay mao kana ang labing dinaliang buluhaton nga ginahimo karon, dili gayod kana isipon ingong usa lamang ka sulagma nga bahin sa atong matag adlaw nga kalihokan. Ingon sa gitambag ni Pablo: “Managtanyag kita kanunay sa Diyos ug halad sa pagdayeg, nga mao, ang bunga sa mga ngabil nga nagahimo ug pagpahayag diha sa dayag sa iyang ngalan.”​—Heb. 13:15.

¹⁵ Sa dihang atong planohon ang atong kalihokan sa matag semana, ang tinong mga panahon angayng igahin alang sa pagsangyaw. Maoy maayo nga mosulay sa pagpakig-ambit sa matag bahin sa pag-alagad, sama sa pamalaybalay nga buluhaton, pagbalikduaw, ug pagdumalag mga pagtuon sa Bibliya. Mahimo ganing planohon nato nga abante ang paghimog impormal nga pagsangyaw pinaagig pagdalag basahon ug pagka-alisto sa mga kahigayonan sa pagsugod ug mga panaghisgot. Sanglit kay sagad kitang mogawas kuyog sa uban, kinahanglan natong susihon ang ilang eskedyol aron makahimo kitag mga kahikayan nga kombeniyente sa usag usa.

¹⁶ Ang atong naandang paagi sa pagsangyaw kinahanglang mentinahon bisan pa sa kawalay-pagtagad sa atong teritoryo. Kita nahibalong daan nga diyutay lamang ang mosanong. (Mat. 13:15; 24:9) Si Ezequiel gitudlo sa pagwali sa katawhan kinsa mga ‘rebelyoso, mayubiton, ug gahig-kasingkasing.’ Si Jehova misaad sa pagtabang kang Ezequiel pinaagig paghimo sa iyang “agtang nga sama gayod ka gahi sa ilang mga agtang,” nga mao, “sama sa diamante, mas gahi pa kay sa santik.” (Ezeq. 2:3, 4; 3:7-9) Busa ang usa ka regular nga kalihokan sa pag-alagad nagakinahanglag pagkamalahutayon.

¹⁷ Maayong mga Panig-ingnan nga Pagasundogon: Kadaghanan kanato makabuhat ug mas maayo sa pagsangyaw kon adunay magapanguna. Si Pablo ug ang iyang mga kauban nagpahilunag maayong panig-ingnan, ug siya nag-awhag sa uban sa pagsundog kaniya.​—Filip. 3:17.

¹⁸ Karong adlawa, usab, aduna kitay daghang maayong panig-ingnan. Sa Hebreohanon 13:7, si Pablo miawhag: “Hinumdomi silang mga nagapanguna taliwala kaninyo, . . . ug sa mamalandong kamo kon unsay ginasangpotan sa ilang panggawi sundoga ang ilang pagtuo.” Hinuon, si Kristo mao ang atong Sumbanan, apan atong masundog ang pagtuo niadtong nagapanguna. Sama kang Pablo, ang mga ansiyano kinahanglang maayong mga panig-ingnan sa uban. Ang matag usa angay nga adunay hapsay nga kalihokan sa paghupot nga una sa intereses sa Gingharian. Bisan pa sa mga obligasyon sa sekular ug pamilya, ang mga ansiyano angay nga adunay natukod pag-ayong mga batasan sa personal nga pagtuon, pagtambong sa tigom, ug pagpanguna sa pagsangyaw. Sa dihang ang mga ansiyano ‘magadumala sa ilang mga panimalay sa maayong paagi,’ ang tanan diha sa kongregasyon madasig nga padayong magabuhat diha sa mahapsay nga paagi.​—1 Tim. 3:4, 5.

¹⁹ Mga Tumong sa Bag-ong Tuig sa Pag-alagad: Ang sinugdan sa usa ka bag-ong tuig sa pag-alagad maoy haom nga panahon sa pagpamalandong sa atong personal nga kalihokan. Unsay gipakita sa pagrepaso sa atong kalihokan sa miaging tuig? Ato bang napauswag ang gidak-on sa atong kalihokan? Hayan mas bug-os na ang atong personal nga pagtuon. Mahimong mas makanunayon na ang atong pagtambong sa mga tigom o basin napauswag ang atong pag-alagad sa kanataran pinaagig pagpalista ingong oksilyare nga mga payunir. Tingali nahimo nato ang tinong mga buhat sa Kristohanong kalulot alang sa uban sa atong kongregasyon o pamilya. Kon mao, may hinungdan kita sa pagmaya nga kita nagalakaw diha sa paagi nga nakapahimuot sa Diyos, ug may maayo kitang katarongan nga “padayong magabuhat niini sa mas bug-os pa.”​—1 Tes. 4:1.

²⁰ Unsa na man kon ang atong naandang paagi dili-makanunayon o panalagsa ra? Sa unsang paagi kita naapektohan sa espirituwal? Nababagan ba ang atong pag-uswag sa pipila ka hinungdan? Ang pag-uswag nagasugod uban ang pangamuyo alang sa panabang ni Jehova. (Filip. 4:6, 13) Ipakighisgot ang imong mga panginahanglan uban sa ubang membro sa pamilya, nga nagahangyo sa ilang tabang sa pagpasibo sa imong kalihokan. Kon ikaw may mga suliran, pangayoa ang tabang sa mga ansiyano. Kon atong himoon ang mainitong panikaysikay ug mosanong sa pagtultol ni Jehova, kita makaseguro nga atong malikayan ang “pagkahimong dili-aktibo o dili-mabungahon.”​—2 Ped. 1:5-8.

²¹ Ang paglakaw diha sa hapsay nga paagi magatultol ngadto sa mga panalangin nga makapahimo sa imong mga panlimbasog nga makapalig-on. Samtang ikaw determinado sa paglakaw nga mauswagon diha sa hapsay nga paagi, “ayaw paglangaylangay sa inyong alatimanon. Magmainiton sa espiritu. Pagpaulipon kang Jehova.” (Roma 12:11)​—Alang sa mas detalyadong paghisgot niining ulohana, tan-awa Ang Bantayanang Torre sa Nobyembre 1, 1985, mga panid 13-17 (May 1, 1985 sa Ingles).