“Magpadayon sa Paglakaw sa Mahusay Niining Naandang Paagi”
“Sa gidak-on nga kita miuswag, magpadayon kita sa paglakaw sa mahusay niining naandang paagi.”—FILIPOS 3:16.
1, 2. (a) Sa unsang paagi ang sulundang mga batan-on tinubdan sa pagdasig? (b) Apan, unsang mga pangutana bahin kanila ang motungha sa hunahuna?
DIHANG si Alisa kapin pag dos anyos, iyang gilingaw ang tanan pinaagi sa pag-awit sa mga ngalan sa tanang 66 ka basahon sa Bibliya, pagpahayag sa mga ngalan sa 12 ka apostol, ug pagbatbat pinaagi sa mga kompas sa siyam ka bunga sa espiritu sa Diyos. (Mateo 10:2-4; Galacia 5:22, 23) Sa diha na siya sa singko grado sa tunghaan, nagdumala siyag semananang pagtuon sa Bibliya uban sa usa ka batang babaye sa tersero grado, si kinsa, sa baylo, nakapaikag sa magulang niyang lalaki sa Bibliya. Si Alisa ug ang iyang batang higala nagbutang ug tumong alang sa ilang kaugalingon. Sila nagapanglantaw nga magkauban sa bug-os-panahong buluhatong pagsangyaw ingong espesyal nga mga payunir sa nahaigo nga panahon.
2 Tinuod, makapahimuot gayod nga may si bisan kinsa kanato makailag mga batang sama kanila, ug lagmit kaayong nahimuot ka. Ug sa samang panahon, hinunoa, kita mahibulong gayod: Unsa kaha ang resulta inigkadagko na nila? Mopadayon kaha sila sa ilang espirituhanong pagtubo hangtod makab-ot nila ang ilang tumong? O mabalda ba sila sa ubang butang ug mahulog sa daplin sa dalan?
Mapinadayonong Pag-uswag
3. Kinsay kinahanglang mouswag?
3 Dayag nga ang maong mga bata nagkinahanglag dakong espirituhanong pagtubo una nila makab-ot ang ilang tumong. Apan ang mga bata ba lamang o mga bag-ohan ang kinahanglang mouswag? Ngani, ang pag-uswag ba gikinahanglan lamang hangtod ang usa mahidangat sa espirituhanong pagkahamtong ug mahimong takos sa usa ka pribilehiyo? Dili gayod. Tagda si apostol Pablo. Inay matagbaw sa iyang nakab-ot, siya miingon sa iyang sulat ngadto sa mga taga-Filipos: “Dili ingong nadawat ko na kini ug ako nahingpit na, kondili ako nagapangagpas sa pagtino aron ako untang makuptan ang butang nga niana ako usab nakuptan na pinaagi ni Kristo Jesus.”—Filipos 3:12.
4. Unsang “tumong” ang giagpas ni apostol Pablo?
4 Tin-aw, si Pablo wala maghisgot bahin sa pagkab-ot sa pagkahamtong, kay walay duhaduhang siya hamtong na nga Kristohanon. Apan siya miingong siya “nagapangagpas” sa butang nga wala pa niya “madawat.” Unsa ba kana? Si Pablo mipadayon sa pagsaysay: “Ako nagapangagpas sa tumong alang sa ganti sa pagtawag sa itaas sa Diyos pinaagi ni Kristo Jesus.” (Filipos 3:14) Ang tumong iyang ginaagpas dili lamang kay Kristohanong pagkahamtong o katakos alang sa usa ka katungdanan, kondili kadto labaw pa nga butang. Alang kaniya ug sa iyang isigkadinihogang Kristohanon, kadto mao “ang pagtawag sa itaas,” ang paglaom sa langitnong kinabuhi pinaagi sa usa ka pagkabanhaw.
5. (a) Nganong kinahanglanon ang mapinadayonong pag-uswag? (b) Unsa ang mahimong maapil sa “paghikalimot sa mga butang sa luyo”?
5 Kini motabang kanato sa pagsabot sa hinungdan sa pagpadayon sa pagtubo ug pagkaugmad sa espirituwal bisan unsa nato ka dugay sa kamatuoran. Kon ang usa ka tawo mouswag lamang sa puntong isipong hamtong, o sa puntong makakuwalipikar sa usa ka espesyal nga pribilehiyo, unsa ang malungtarong kaayohan ang anaa alang kaniya? Ang pagkahamtong ug espesyal nga mga pribilehiyo dili garantiya nga atong makab-ot ang atong kataposang tumong—ang kinabuhing walay kataposan. Hinunoa, kinahanglang buhaton nato ang gibuhat ni apostol Pablo: ‘Sa paghikalimot sa mga butang sa luyo ug sa pagpangabot sa mga butang sa unahan.’ (Filipos 3:13) Dili lamang angay biyaan nato ang walay-kapuslanang mga butang nga tingali atong nabuhat una makadangat sa kahibalo sa kamatuoran kondili angay mag-amping usab kita nga dili mahimong matagbawon-sa-kaugalingon sa atong nabuhat sukad nianang panahona. Sa laing mga pulong, ang tambag dili mao ang pagkatagbaw na sa mga kalamposan sa usa, kondili sa pagpadayon sa unahan nga walay hunong. Ginabuhat mo ba kini? O ikaw ba sa usa o laing katarongan, nagahinayhinay?—Tan-awa ang 1 Corinto 9:26.
6. Sa pagtandi sa Filipos 3:12 sa 3:15, unsay ikaingon mahitungod sa pag-uswag?
6 Uban sa maong posibilidad sa hunahuna, si Pablo mipadayon: “Nan, ingon nga daghan kanato maoy hamtong, batonan nato kining tinamdan sa hunahuna, ug kon kamo lahi ug panghunahuna sa bisan unsang paagi, igapadayag sa Diyos ang tinamdan sa ibabaw nganha kaninyo.” (Filipos 3:15) Sa unauna, sa bersikulo 12 gipaila ni Pablo nga wala niya isipa nga siya “nahingpit na.” Apan dinhi siya miingon “ingon nga daghan kanato maoy hamtong,” o “mga hingpit.” (Kingdom Interlinear) Kini dili panagsumpaki. Hinunoa, kini nagahimo lamang sa punto nga bisan ang hamtong nga mga Kristohanon sama kang Pablo kinahanglang magbutang sa hunahuna nga sila wala pa makakab-ot sa kataposang tumong, ug kinahanglang magpadayon sila sa pag-uswag sa pagkab-ot niana. Kana ang hinungdan iyang gisuma kini niining paagiha: “Sa bisan unsang paagi, sa gidak-on nga kita miuswag, magpadayon kita sa paglakaw sa mahusay niining naandang paagi.”—Filipos 3:16.
Mahusay nga Naandang Paagi
7. Unsang “naandang paagi” ang giawhag ni Pablo nga sundon sa mga Kristohanon?
7 Sa gidasig ni Pablo ang mga Kristohanon nga “magpadayon sa paglakaw nga mahusay niining naandang paagi,” siya nagsulti ba kanila sa paghan-ay sa usa ka hayahay nga sumbanan sa buluhaton ug pagpabilin niana hangtod moabot ang panahong ilang madawat ang ilang ganti? Ang pagbuhat niana maoy pagbuhat sa gibuhat sa ulipon sa sambingay ni Jesus kinsa naglubong sa usa ka talento nga gipiyal kaniya sa iyang agalon ug yanong nagpaabot sa pagbalik sa agalon. (Mateo 25:14-30) Bisan pag ang ulipon wala mawad-i sa talento o wala mohunong sa iyang pag-alagad, siya gitawag “walay-kapuslanan” ug gisalikway sa agalon. Tinong si Pablo wala magsulti kanato nga panguptan lamang ang ato nang nabatonan kay basi mawad-an kita niana. Siya naghisgot mahitungod sa paghimog pag-uswag. Sa pag-ingong “naandang paagi” dayag diha sa hunahuna ni Pablo ang tinong dalan sa pagpadayon sa unahan, nga sama sa usa ka sundalo nga wala magbarog nga nagaatensiyon kondili nagamartsa padulong sa unahan.
8. Sa unsa nga kita magmahunahunaon mahitungod sa atong pag-alagad sa Diyos?
8 Ang tambag ni Pablo angay magtabang kanato sa pag-ila sa bili sa pagpaningkamot nga padayon ug panlimbasog nga mouswag, moarang-arang, ug mahimong mas maayo sa pag-alagad kang Jehova. “Sa gidak-on nga kita miuswag,” kon kaha mga ansiano, ministeryal nga alagad, payunir, o magmamantala, ang atong pangunang kabalaka mao ang pagpauswag sa kalidad ug, kon mahimo, sa gidaghanon sa atong pag-alagad. Kinahanglang mag-amping kita nga dili mahulog sa samang panghunahuna sa masupilong mga Israelinhon sa adlaw ni Malakias nga naghunahunang sila wala siloti tungod sa paghalad sa daot nga mga halad kang Jehova. Apan unsay gibati ni Jehova bahin niadto? “Oo, inyong gidala kana [ang piang ug masakitong halad] ingong usa ka gasa,” matud niya. Unya siya midugang: “Mahimuot ba ako nianang inyong gidala?”—Malakias 1:13.
9. Sa unsang paagi ang tambag ni Pablo sa Roma 12:6-8, 11 nalangkit sa paghimog pag-uswag?
9 Sa kaatbang, angay natong isipong maugdang ang atong pag-alagad sa Diyos. Sumala sa gipahinumdom ni Pablo sa mga Romano, bisan unsang pribilehiyo sa pag-alagad ang tingali ihatag kanato, angay nga kita ‘magabuhat niana,’ “nga maikagon kaayo” ug ‘dili maglangaylangay sa atong buluhaton.’ (Roma 12:6-8, 11) Ang paglangaylangay mao ang pagbagdoybagdoy, nga walay pagpadayon padulong sa usa ka tinong tumong. Makaiikag, ang Gregong pulong gigamit dinhi sa literal nagkahulogang tapolan (slothful), usa ka labing haom nga pagbatbat. Ang usa ka taho nagapakita nga, bisan pag takos sa tuling paglihok, latas sa yugtong 168 ka oras, ang usa ka sloth natulog o nagpabiling bug-os walay lihok sa 139 ka oras—83 porsiento sa panahon. Dili katingalahang kita gitambagang dili mahimong “tapolan” kondili “magmainiton sa espiritu” ug “magpaulipon kang Jehova”! Unsay makatabang kanato sa pagbuhat niini?
10. Nganong kita angay dulot maikag sa tambag ni Pablo kang Timoteo sa 1 Timoteo 4:12-16?
10 Sa 1 Timoteo 4:12-16 gihisgotan ni apostol Pablo nga detalyado ang mga butang pagabuhaton ni Timoteo aron ang iyang pag-uswag “madayag sa tanang tawo.” Niadtong panahona, ang disipulong si Timoteo dili batan-on o bag-ohan. Sa pagkamatuod, sa maong panahon siya nagbuhat nga suod uban kang Pablo sulod sa kapin sa napulo ka tuig ug may dakong responsibilidad ug awtoridad nga gisalig kaniya diha sa Kristohanong kongregasyon, pihong tungod sa pag-uswag nga iya nang nahimo niadtong puntoha. Bisan pa niana, gihatag gihapon ni Pablo ang maong tambag. Tin-aw, kinahanglang kitang tanan maghatag dakong pagtagad sa igasulti ni Pablo.
Mahimong Panig-ingnan sa Sinultihan ug Kagawian
11, 12. (a) Unsa ang unang bahin nga angay atong tagdon sa paghimog pag-uswag? (b) Nganong kana labi pang hinungdanon kay sa pag-uswag sa kahibalo o kahanas?
11 Nahauna, sa bersikulo 12, si Pablo miingon: “Ayaw itugot nga may magatamay sa imong pagkabatan-on. Sa kaatbang, mahimong panig-ingnan sa mga magtutuo sa sinultihan, sa kagawian, sa gugma, sa pagtuo, sa kaputli.” Kining listahana nagapahinumdom kanato sa “mga bunga sa espiritu,” nga gihisgotang detalyado ni Pablo sa Galacia 5:22, 23. Kinsay makalimod nga ang matag usa kanato kinahanglang magpatungha niining mga bunga sa labawng gidak-on sa atong mga kinabuhi? Ang kadaghanan kanato nagapaningkamot gayod nga mahibalo ug makasag-ulo sa siyam ka bunga sa espiritu, ug sa pagtudlo sa mga batan-on ug mga bag-ohan sa pagbuhat sa sama. Apan kita nagapaningkamot ba sa labing menos sa igong susamang paningkamot sa pag-ugmad niana? Gipahayag ni Pablo ang punto nga kadtong mga hamtong angay mahimong sulundan niining mga butanga. Tinuod, kini usa ka bahin sa atong mga kinabuhi diin kitang tanan daling makahimog pag-uswag.
12 Sa usa ka kahulogan, tingali, kining mga hiyasa labi pang ilhanan sa atong espirituhanong pag-uswag kay sa kahibalo ug mga kahanas, tungod kay ang nahauna maoy mga bunga sa espiritu sa Diyos, samtang ang naulahi kadaghanan nalangkit sa kinaiyanhong mga katakos ug edukasyon. Ang mga eskriba ug mga Pariseo sa adlaw ni Jesus batid kaayo sa Kasulatan, ug sila kutihang nagbantay sa mga gagmayng bahin sa Kasugoan. Bisan pa niana, gisaway sila ni Jesus, nga miingon: “Alaot kamo, mga eskriba ug mga Pariseo, mga salingkapaw! tungod kay kamo nagahatag sa ikapulo sa herbabuyna ug sa anis ug sa komino apan wala ninyo tagda ang mabug-at pang mga butang sa Kasugoan, nga mao, ang hustisya ug kaluoy ug pagtuo.” (Mateo 23:23) Pagkahinungdanon nga magpadayon kita sa pag-uswag sa pag-ugmad niining labi pang bug-at nga mga butang sa atong kinabuhi!
Pagkugi sa pagbasa, pagpanambag, ug pagtudlo
13. Sa unsang paagi ang natudlong mga magtatan-aw makabatog kaayohan sa tambag ni Pablo sa 1 Timoteo 4:13?
13 Sunod, gitambagan ni Pablo si Timoteo nga “magpadayon sa pagkugi sa katilingbanong pagbasa, sa pagpanambag, sa pagpanudlo.” (1 Timoteo 4:13) Sa laing dapit sa iyang mga sulat, gidayeg ni Pablo si Timoteo ingong may katakos ug matinumanon nga ministro. (Filipos 2:20-22; 2 Timoteo 1:4, 5) Bisan pa niana, iyang gitambagan si Timoteo sa pagpadayon sa pagtagad niining hinungdanong mga responsibilidad sa usa ka magtatan-aw. Kon usa ka ka natudlong magtatan-aw sa kongregasyon, “nagapadayon ka ba sa pagkugi” niining mga butanga? Pananglitan, giisip mo bang seryoso ang mga sugyot nga gihatag diha sa Giya sa Tunghaan sa Teokratikanhong Ministeryo ug nagapauswag sa imong mga kahuyangan o imong gibati nga kining tambaga alang lamang sa mga bag-ohan? Nagatuon ka ba sa Bibliya ug sa mga basahon sa Sosyedad sa mainampingon aron ikaw “makapanambag, uban ang bug-os hataas nga pailob ug arte sa pagpanudlo”?—2 Timoteo 4:2; Tito 1:9.
Ayaw pasagdi ang gasa sa pag-alagad
14. Sa unsang paagi kita makapakitag pag-uswag sa atong ministeryo?
14 Bisan tuod pipila ra ang itudlo nga magtudlo sa kongregasyon, ang tanang Kristohanon gisugo ni Jesu-Kristo sa pagpakig-ambit sa pagsangyaw sa Gingharian ug sa buluhatong paghimog tinun-an. (Mateo 24:14; 28:19, 20) Kini naglangkit sa pagtudlo sa buotag-kasingkasing sa kamatuoran sa Bibliya, sa pagtambag kanila sa paghimog mga kausaban sa ilang mga kinabuhi ug pagbarog sa kiliran ni Jehova. Ikaw ba “nagapadayon sa pagkugi” sa pagpauswag sa imong mga kahanas sa ministeryo? Binuotan ba nimong gigamit ang mga sugyot nga ginahatag diha sa Atong Ministeryo sa Gingharian ug sa senamanang Tigom sa Pag-alagad aron ‘sa pagbuhat sa buluhaton sa usa ka ebanghelista, nga bug-os magatuman sa imong ministeryo’?—2 Timoteo 4:5.
15. Unsa ang “gasa” ni Timoteo, ug unsay ikasulti karong adlawa?
15 Sa nangagi, gihatagan ni Pablo si Timoteo niining pahinumdom: “Ayaw pasagdi ang hiyas nga diha kanimo nga gihatag kanimo pinaagi sa pagtagna sa gipandong sa lawas sa mga ansiano ang ilang mga kamot diha kanimo.” (1 Timoteo 4:14) Dayag, tungod sa paglihok sa balaang espiritu, si Timoteo gihatagan ug sa ingon gitudlo sa usa ka linaing pag-alagad diha sa Kristohanong kongregasyon. (1 Timoteo 1:18; 2 Timoteo 1:6) Sa susama, karong adlawa adunay daghan sa organisasyon nga nakaugmad sa hinatag-sa-Diyos nga mga katakos, nga misangpot sa ilang pagkatudlong nagapanaw nga mga magtatan-aw, mga misyonaryo, regular o espesyal nga mga payunir, mga ansiano, ug uban pa. Bisan pag walay espesyal nga panagna o pagpandong sa mga kamot nga nalangkit, ang tambag “ayaw pasagdi ang hiyas diha kanimo” mapadapat uban ang samang kusog.
16. Unsay makapugong kanato sa pagpasagad sa atong “gasa”?
16 Ang pagpasagad sa usa ka butang, sumala sa diksiyonaryo, nagkahulogan sa paghatag ug diyutayng pagtagad niana o dili pagbuhat niana tungod sa pagkadanghag. Kon ang butang mahimong kasagaran, sayon kaayo ang pagpasagad niana. Kini mahitabo kon kita dili na mouswag, apan balihon wala lamang ang atong mga asaynment. Busa, kita makabatog kaayohan sa gipamulong ni Pablo sa Colosas 3:23, 24: “Bisan kon unsa ang inyong ginabuhat, buhata kana nga tibuok kalag ingon ngadto kang Jehova, ug dili ngadto sa mga tawo, kay kamo nahibalo nga gikan kang Jehova nga inyong madawat ang nahaigong ganti sa panulondon. Magpaulipon sa Agalon, si Kristo.”
Ang Mapinadayonong Paningkamot Mopatunghag mga Panalangin
17. Sa unsang paagi lamang atong makita ang sangpotanan sa atong panlimbasog?
17 Kon atong tagdon pag-ayo ang mga butang gihisgotan sa ibabaw, kita makasalig nga dili kita mahulog sa lit-ag sa pagkadili-matinagdanon o pagkatagbaw sa kaugalingon. “Magpalandong niining mga butanga; ibutang sa bug-os ang hunahuna niana, aron ang imong pag-uswag madayag sa tanang tawo,” matud ni Pablo. (1 Timoteo 4:15) Ang “pag-uswag,” siyempre, dili sa tuyo sa pagpagawal o pagpadayeg sa uban. Kon kita, batag tigulang, motubo ug maugmad sa espirituhanong paagi, kita makahatag ug kalipay ug kadasig sa tanang makig-uban kanato, sama sa batan-ong si Alisa ug sa iyang kaubang gihisgotang unauna niining artikuloha.
18. Unsang dobleng panalangin ang nagahulat kanato kon kita magmakugihon sa pagpadapat sa tambag ni Pablo?
18 Ang dobleng panalangin nagahulat kanato kon kita magmakugihon sa pagpadapat sa tambag ni Pablo. “Tagda ang imong kaugalingon ug ang imong pagpanudlo,” matud ni Pablo. “Magpabilin niining mga butanga, kay sa pagbuhat mo niini imong maluwas ang imong kaugalingon ug kadtong magapatalinghog kanimo.” (1 Timoteo 4:16) Oo, pinaagi sa kanunay nga pagsusi sa atong kaugalingon, kon kaha ginabuhat nato ang atong ginatudlo sa uban nga pagabuhaton, nga mao, ang pag-uswag, pagtubo, ug pag-ugmad sa espirituwal nga paagi, atong malikayan ang trahedya sa ‘pagkadili-mauyonan sa usa ka paagi.’ (1 Corinto 9:27) Hinunoa, ang makapalipay nga palaaboton sa kinabuhi sa gisaad nga Bag-ong Kahikayan sa Diyos segurado alang kanato ug alang niadtong nakabaton sa malipayong pribilehiyo sa pagtabang. Busa, sa panalangin nato ug sa uban, ug sa kadayegan ni Jehova nga Diyos: “Magpadayon sa paglakaw sa mahusay niining naandang paagi”!—Filipos 3:16.
Nahinumdom Ka Ba?
◻ Unsang kinalabwang “tumong” ang angay natong ibutang sa hunahuna? Sa unsang paagi atong ginapangagpas kana? (Filipos 3:12, 13)
◻ Unsa ang “naandang paagi” nga angay natong subayon? (Filipos 3:16)
◻ Nganong kinahanglang kita magpadayon sa pag-uswag sa Kristohanong kagawian ug sinultihan? (1 Timoteo 4:12)
◻ Sa unsang paagi ang mga ansiano, ministeryal nga mga alagad, ug uban pa makapauswag sa ilang kahanas sa pagpanudlo? (1 Timoteo 4:13)
◻ Unsay kinahanglang atong buhaton aron dili pasagdan “ang gasa” nga gisalig kanato? (1 Timoteo 4:14)
[Hulagway sa panid 14]
Ang tumong ni Alisa ug sa iyang estudyante sa Bibliya mao ang bug-os-panahong ministeryo