Ipadayag ang Imong Pag-uswag
“Palandonga kining mga butanga; hatagi kinig bug-os nga pagtagad, aron ang imong pag-uswag madayag sa tanan nga mga tawo.”—1 TIM. 4:15.
1, 2. Unsay atong nahibaloan bahin kang Timoteo sa bata pa siya ug sa kausaban nga nahitabo sa dihang siya nag-edad ug mga 20 anyos?
SA BATA pa si Timoteo, siya nagpuyo sa Romanhong probinsiya sa Galacia, nga sakop karon sa Turkey. Didto, ubay-ubayng Kristohanong kongregasyon ang natukod sa katuigan human sa kamatayon ni Jesus. Sa usa ka yugto, ang batan-ong si Timoteo, iyang inahan, ug ang iyang apohang babaye midawat sa Kristiyanidad ug nahimong aktibo diha sa usa sa mga kongregasyon didto. (2 Tim. 1:5; 3:14, 15) Seguradong malipayon ang kinabuhi ni Timoteo ingong batan-ong Kristohanon uban sa iyang pamilya ug sa ilang kongregasyon. Apan, sa kalit lang nausab ang kahimtang.
2 Nagsugod kadto sa ikaduhang pagduaw ni apostol Pablo sa ilang dapit. Nianang panahona, si Timoteo lagmit mga 20 anyos na. Panahon sa pagduaw ni Pablo, hayan sa Listra, iyang namatikdan nga ang ‘mga igsoon [sa mga kongregasyon didto] dunay maayong panghimatuod’ kang Timoteo. (Buh. 16:2) Lagmit gayod nga si Timoteo hamtong na kaayo sa espirituwal bisag batan-on pa. Dayon, ilalom sa pagtultol sa balaang espiritu, si Pablo ug ang lawas sa mga ansiyano nagpandong sa ilang mga kamot kang Timoteo, nga naghatag kaniyag linaing buluhaton diha sa kongregasyon.—1 Tim. 4:14; 2 Tim. 1:6.
3. Unsang talagsaong pribilehiyo sa pag-alagad ang nadawat ni Timoteo?
3 Si Timoteo nakadawat ug talagsaong pagdapit—mahimong kauban ni apostol Pablo sa iyang panaw! (Buh. 16:3) Handurawa kon unsa ka dako ang katingala ug kalipay nga gibati ni Timoteo! Sulod sa daghang katuigan, si Timoteo mipanaw uban ni Pablo ug usahay sa ubang mga misyonaryo, nga nagtuman sa buluhaton nga gipabuhat sa mga apostoles ug sa mga ansiyano. Si Pablo ug Timoteo nakigbahin sa nagapanawng buluhaton nga nakatabang ug dako sa pagpalig-on sa mga igsoon. (Basaha ang Buhat 16:4, 5.) Busa, si Timoteo nailhan sa daghang Kristohanon tungod sa iyang pag-uswag sa espirituwal. Human sa mga napulo ka tuig nga pagpakig-uban kang Timoteo, si apostol Pablo misulat sa mga taga-Filipos: ‘Wala akoy lain nga sama [kang Timoteo ug] tinamdan kinsa tiunay nga moatiman sa mga butang labot kaninyo. . . . Kamo nahibalo sa pamatuod nga iyang gihatag labot sa iyang kaugalingon, nga sama sa usa ka anak uban sa amahan siya nagpaulipon uban kanako sa pagpauswag sa maayong balita.’—Filip. 2:20-22.
4. (a) Unsang bug-at nga responsibilidad ang gipiyal kang Timoteo? (b) Unsang mga pangutana ang ikasukna bahin sa gipamulong ni Pablo sa 1 Timoteo 4:15?
4 Sa panahon nga si Pablo misulat sa mga taga-Filipos, iyang gipiyalan si Timoteo ug bug-at nga responsibilidad—ang pagtudlog mga ansiyano ug ministeryal nga mga alagad. (1 Tim. 3:1; 5:22) Klaro nga si Timoteo nahimong kasaligan nga Kristohanong magtatan-aw. Bisan pa niana, sa mao gihapong sulat, si Pablo nagtambag kang Timoteo nga ‘ipadayag ang iyang pag-uswag sa tanang tawo.’ (1 Tim. 4:15) Dili ba napadayag na man ni Timoteo ang iyang pag-uswag sa talagsaong paagi? Busa, unsay buot ipasabot ni Pablo niining mga pulonga, ug sa unsang paagi kita makabenepisyo sa iyang tambag?
Kon sa Unsang Paagi Madayag ang Atong Pag-uswag
5, 6. Nganong nameligro ang espirituwal nga kaputli sa kongregasyon sa Efeso, ug sa unsang paagi mapanalipdan ni Timoteo ang kongregasyon?
5 Atong susihon ang konteksto sa 1 Timoteo 4:15. (Basaha ang 1 Timoteo 4:11-16.) Sa wala pa niya isulat kanang mga pulonga, si Pablo mipanaw paingon sa Macedonia apan iyang gihangyo si Timoteo nga magpabilin sa Efeso. Ngano? Ang pipila nianang siyudara nagtudlog bakak nga mga pagtulon-an nga nagpahinabog pagkabahinbahin diha sa kongregasyon. Kinahanglang panalipdan ni Timoteo ang espirituwal nga kaputli sa kongregasyon. Sa unsang paagi buhaton niya kini? Sa usa ka bahin, pinaagi sa pagpakitag maayong panig-ingnan nga masundog sa uban.
6 Si Pablo misulat kang Timoteo: “Himoa ang imong kaugalingon nga panig-ingnan sa mga matinumanon sa sinultihan, sa panggawi, sa gugma, sa pagtuo, sa kaputli.” Siya midugang: “Palandonga kining mga butanga; hatagi kinig bug-os nga pagtagad, aron ang imong pag-uswag madayag sa tanan nga mga tawo.” (1 Tim. 4:12, 15) Ang maong pag-uswag adunay kalabotan sa espirituwal nga mga hiyas ni Timoteo inay sa katungdanan. Mao kana ang matang sa pag-uswag nga angayng ipadayag sa matag Kristohanon.
7. Unsay gidahom nga buhaton sa tanan diha sa kongregasyon?
7 Karong adlawa sama sa panahon ni Timoteo, adunay lainlaing responsibilidad sulod sa kongregasyon. Ang pipila nag-alagad ingong mga ansiyano o ministeryal nga mga alagad. Adunay nagregular payunir. Ug ang uban anaa sa nagapanawng buluhaton, nag-alagad sa Bethel, o natudlo ingong mga misyonaryo. Ang mga ansiyano nakigbahin sa lainlaing programa sa pagtudlo, sama diha sa mga asembliya ug mga kombensiyon. Apan, ang tanang Kristohanon—lalaki, babaye, ug mga bata—adunay potensiyal nga mapadayag ang ilang espirituwal nga pag-uswag. (Mat. 5:16) Gani, sama sa kahimtang ni Timoteo, bisan ang mga Kristohanon nga dunay linaing mga responsibilidad gidahom nga magpadayag sa ilang espirituwal nga mga hiyas.
Mahimong Panig-ingnan sa Sinultihan
8. Unsay epekto sa atong sinultihan diha sa atong pagsimba?
8 Ang usa sa mga natad diin si Timoteo angayng magpakitag panig-ingnan maoy sa iyang sinultihan. Sa unsang paagi atong mapadayag ang atong pag-uswag nianang bahina? Ang atong sinultihan magpadayag kon unsay atong pagkatawo. Haom ang giingon ni Jesus: “Gikan sa kadagaya sa kasingkasing ang baba mosulti.” (Mat. 12:34) Si Santiago nga igsoon ni Jesus sa inahan nakaamgo usab sa epekto sa atong sinultihan diha sa atong pagsimba. Siya misulat: “Kon may tawo nga naghunahuna nga siya usa ka debotadong magsisimba apan dili magbusal sa iyang dila, hinunoa nagpadayon sa paglimbong sa iyang kaugalingong kasingkasing, ang dagway sa pagsimba niining tawhana walay kapuslanan.”—Sant. 1:26.
9. Sa unsang mga paagi angayng mahimong panig-ingnan ang atong sinultihan?
9 Ang atong sinultihan mahimong magpadayag ngadto sa uban diha sa kongregasyon sa gilapdon sa atong espirituwal nga pag-uswag. Busa, imbes mosulti sa paagi nga dili-dungganon, negatibo, hinawayon, o makapasakit, ang hamtong nga mga Kristohanon maningkamot sa pagpalig-on, paghupay, ug pagdasig. (Prov. 12:18; Efe. 4:29; 1 Tim. 6:3-5, 20) Ang pagkaandam nato nga modepensa sa hataas nga mga sukdanan sa Diyos ug ang atong tinguha nga magkinabuhi sumala niana magpadayag sa atong debosyon sa Diyos. (Roma 1:15, 16) Ang mga matarong ug kasingkasing seguradong makaobserbar kon sa unsang paagi nato gigamit ang gasa sa pagsulti ug lagmit mosundog sila sa atong panig-ingnan.—Filip. 4:8, 9.
Panig-ingnan sa Atong Panggawi ug Kaputli
10. Nganong ang pagtuo nga walay pagkasalingkapaw hinungdanon sa atong espirituwal nga pag-uswag?
10 Labaw pa sa makapalig-ong sinultihan ang gikinahanglan aron ang usa ka Kristohanon mahimong maayong panig-ingnan. Ang pagsultig maayong mga butang nga wala magbuhat niana maghimo sa usa nga salingkapaw. Si Pablo nahibalo sa pagkasalingkapaw sa mga Pariseo ug sa makadaot nga resulta niana. Dihay pipila ka higayon nga iyang gipasidan-an si Timoteo batok sa pagkadili-sinsero ug pagpakaaron-ingnon. (1 Tim. 1:5; 4:1, 2) Apan si Timoteo dili salingkapaw. Sa iyang ikaduhang sulat kang Timoteo, si Pablo miingon: “Akong nahinumdoman ang imong pagtuo nga walay pagkasalingkapaw.” (2 Tim. 1:5) Bisan pa niana, kinahanglang ipadayag ni Timoteo nga siya maoy tinuod nga Kristohanon. Angay nga siya mahimong panig-ingnan sa panggawi.
11. Unsay gisulat ni Pablo ngadto kang Timoteo bahin sa bahandi?
11 Sa iyang duha ka sulat kang Timoteo, si Pablo naghatag ug tambag maylabot sa pipila ka matang sa panggawi. Pananglitan, kinahanglang likayan ni Timoteo ang pagpangagpas ug bahandi. Si Pablo misulat: “Ang gugma sa salapi maoy gamot sa tanang matang sa makadaot nga mga butang, ug tungod sa pagpangab-ot niini nga gugma ang pipila nahisalaag gikan sa pagtuo ug nagtusaktusak sa ilang kaugalingon sa daghang kasakitan.” (1 Tim. 6:10) Ang gugma sa salapi maoy timailhan sa pagkahuyang sa espirituwal. Sa kasukwahi, ang mga Kristohanon nga kontento na sa simpleng kinabuhi, nga “adunay makaon ug ikabesti,” nagpadayag ug espirituwal nga pag-uswag.—1 Tim. 6:6-8; Filip. 4:11-13.
12. Sa unsang paagi atong mapadayag ang atong pag-uswag diha sa atong personal nga kinabuhi?
12 Gihisgotan ni Pablo kang Timoteo kon unsa ka hinungdanon nga ang Kristohanong mga babaye “magdayandayan sa ilang kaugalingon sa mahapsay nga sinina, uban ang pagkamakasaranganon ug maayong panghunahuna.” (1 Tim. 2:9) Ang mga babaye nga makasaranganon ug maayog panghunahuna sa ilang pamesti ug panghindik, maingon man sa ubang bahin sa ilang personal nga kinabuhi, nagpakitag maayo kaayong panig-ingnan. (1 Tim. 3:11) Kining prinsipyoha mapadapat usab sa Kristohanong mga lalaki. Si Pablo nagtambag sa mga magtatan-aw nga mahimong “makasaranganon sa batasan, maayog panghunahuna, mahusay.” (1 Tim. 3:2) Kon atong ipasundayag kining mga hiyasa diha sa atong adlaw-adlaw nga kalihokan, ang atong pag-uswag madayag sa tanan.
13. Sama kang Timoteo, sa unsang paagi kita mahimong panig-ingnan sa kaputli?
13 Si Timoteo kinahanglang mahimong panig-ingnan sa kaputli. Sa paggamit niining pulonga, si Pablo nagtumong sa usa ka espesipikong matang sa panggawi, nianang sa seksuwal nga moralidad. Kinahanglang walay ikasaway sa panggawi ni Timoteo ilabina sa iyang pagpakiglabot sa mga babaye. Angay niyang trataron “ang tigulang nga mga babaye ingong mga inahan, ang batan-ong mga babaye ingong igsoong mga babaye uban sa bug-os nga kaputli.” (1 Tim. 4:12; 5:2) Bisan ang imoral nga mga buhat nga morag gihimo sa tago nahibaloan sa Diyos ug sa ngadtongadto seguradong mahibaloan usab kini sa uban. Apan tinuod usab nga ang maayong binuhatan sa usa ka Kristohanon dili matago. (1 Tim. 5:24, 25) Ang tanan diha sa kongregasyon dunay kahigayonan nga mapadayag ang ilang pag-uswag sa panggawi ug kaputli.
Hinungdanon ang Gugma ug Pagtuo
14. Sa unsang paagi gipasiugda sa Kasulatan ang panginahanglan sa pagbaton ug gugma sa atong taliwala?
14 Ang gugma maoy pangunang ilhanan sa matuod nga Kristiyanidad. Giingnan ni Jesus ang iyang mga tinun-an: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Sa unsang paagi nato mapasundayag ang maong gugma? Ang Pulong sa Diyos nag-awhag kanato nga mag-inantosay “sa usag usa diha sa gugma,” “magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa,” ug magmaabiabihon. (Efe. 4:2, 32; Heb. 13:1, 2) “Sa inigsoong gugma batoni ang malumong pagmahal alang sa usag usa,” misulat si apostol Pablo.—Roma 12:10.
15. Nganong ang gugma hinungdanon alang sa tanan, ilabina sa Kristohanong mga magtatan-aw?
15 Kon si Timoteo estrikto kaayo o dili-maluloton sa pagpakiglabot sa iyang isigka-Kristohanon, mabalewala ra ang maayo niyang nahimo ingong magtutudlo ug magtatan-aw. (Basaha ang 1 Corinto 13:1-3.) Sa laing bahin, ang tiunay nga pagmahal ni Timoteo sa iyang mga igsoon, dinuyogan sa iyang pagkamaabiabihon ug maayong mga buhat, labaw nga nagpadayag sa iyang espirituwal nga pag-uswag. Nan, haom nga sa iyang sulat kang Timoteo, si apostol Pablo espesipikong naghisgot sa gugma ingong usa sa mga hiyas diin si Timoteo angayng mahimong panig-ingnan.
16. Nganong kinahanglang magpakitag lig-ong pagtuo si Timoteo?
16 Samtang didto sa Efeso, nasulayan ang pagtuo ni Timoteo. Dihay pipila nga nagpasiugdag mga doktrina nga wala mahiuyon sa kamatuoran. Ang uban nagpakaylap ug “bakak nga mga sugilanon” o nagtuki ug mga ideya nga dili makapauswag sa espirituwalidad sa kongregasyon. (Basaha ang 1 Timoteo 1:3, 4.) Gihubit ni Pablo ang maong mga indibiduwal ingong “nagpaburot sa garbo, nga walay bisan unsang nasabtan, hinunoa maoy gikabuangan ang mga pagpangutana ug ang mga pagpakiglalis bahin sa mga pulong.” (1 Tim. 6:3, 4) Mahimo kahang sulayan ni Timoteo sa pagkonsiderar ang makadaot nga mga ideya nga nakasulod sa kongregasyon? Dili, kay giawhag ni Pablo si Timoteo sa ‘pagpakigbugno sa maayong pakigbugno sa pagtuo’ ug sa pagpahilayo “gikan sa mga sulting walay-pulos nga nagpasipala sa kon unsay balaan ug gikan sa mga pagsumpakiay nianang bakak nga gitawag ug ‘kahibalo.’” (1 Tim. 6:12, 20, 21) Walay duhaduha nga gisunod ni Timoteo ang maalamong tambag ni Pablo.—1 Cor. 10:12.
17. Sa unsang paagi ang atong pagtuo masulayan karon?
17 Makaiikag, si Timoteo giingnan nga sa “ulahing mga yugto sa panahon adunay pipila nga mangahulog gikan sa pagtuo, nga magtagad sa nagpahisalaag nga inspiradong mga pulong ug mga pagtulon-an sa mga demonyo.” (1 Tim. 4:1) Ang tanan diha sa kongregasyon, apil niadtong dunay responsibilidad, kinahanglang mahisama kang Timoteo sa pagpakitag lig-on, dili-matarog nga pagtuo. Pinaagi sa pagbarog nga malig-on ug pagsalikway dayon sa apostasya, atong mapadayag ang atong pag-uswag ug mahimo kitang panig-ingnan sa pagtuo.
Paningkamoti nga Mapadayag ang Imong Pag-uswag
18, 19. (a) Sa unsang paagi ang imong pag-uswag mapadayag sa tanan? (b) Unsay hisgotan sa sunod artikulo?
18 Tataw nga ang espirituwal nga pag-uswag sa usa ka tinuod nga Kristohanon walay kalabotan sa iyang hitsura, abilidad, o pagkainila. Ug wala kini magdepende sa iyang gidugayon sa pag-alagad. Hinunoa, ang tinuod nga espirituwal nga pag-uswag mapadayag pinaagi sa atong pagkamasinugtanon kang Jehova sa hunahuna, sinultihan, ug panggawi. (Roma 16:19) Kinahanglang sundon nato ang sugo nga maghigugmaay sa usag usa ug mag-ugmad ug lig-ong pagtuo. Oo, palandongon nato ang gipamulong ni Pablo kang Timoteo ug hatagan kanag bug-os nga pagtagad aron ang atong pag-uswag madayag sa tanan.
19 Ang laing hiyas nga magpaila sa atong espirituwal nga pag-uswag ug pagkahamtong mao ang kalipay, usa ka bahin sa bunga sa balaang espiritu sa Diyos. (Gal. 5:22, 23) Hisgotan sa sunod nga artikulo kon sa unsang paagi atong maugmad ug mahuptan ang kalipay panahon sa kalisdanan.
Unsay Imong Tubag?
• Unsay masayran sa uban bahin kanato gikan sa atong sinultihan?
• Sa unsang paagi mapadayag ang atong pag-uswag diha sa atong panggawi ug kaputli?
• Nganong ang mga Kristohanon kinahanglang mahimong panig-ingnan sa gugma ug pagtuo?
[Hulagway sa panid 11]
Si Timoteo hamtong na kaayo sa espirituwal bisag batan-on pa
[Mga hulagway sa panid 13]
Makita ba sa uban ang imong pag-uswag?