Padayon sa Paghimog Espirituwal nga Pag-uswag!
ANG ADLAW SA ATONG BAWTISMO MAOY USA KA ADLAW NGA ANGAY NATONG KALIPAYAN UG HINUMDOMAN KANUNAY. GAWAS PA, KINI ANG ADLAW NGA ATONG GIPAHAYAG SA PUBLIKO NGA GIHIMO NATO ANG DEDIKASYON NGA MOALAGAD SA DIYOS.
ALANG sa daghang indibiduwal kini nagkinahanglan ug dako kaayong paningkamot aron maabot kining puntoha—paghunong sa dugay nang daotang mga batasan, pagbiya sa dili-maayong mga kauban, pag-usab sa dulot nga nakagamot nga panghunahuna ug panggawi.
Bisan pa niana, bisan tuod ang bawtismo maoy usa ka malipayon ug hinungdanong hitabo sa kinabuhi sa usa ka Kristohanon, sa gihapon kini sinugdanan lamang. Gisultihan ni apostol Pablo ang bawtismadong mga Kristohanon sa Judea: “Karon nga ato nang gibiyaan ang pang-una nga doktrina bahin sa Kristo, manag-uswag kita ngadto sa pagkahamtong.” (Hebreohanon 6:1) Oo, gikinahanglan sa tanang Kristohanon nga “makadangat ngadto sa pagkausa diha sa pagtuo ug diha sa tukmang kahibalo sa Anak sa Diyos, ngadto sa usa ka hingkod nga tawo, ngadto sa sukod sa pamarog nga iya sa kabug-osan sa Kristo.” (Efeso 4:13) Pinaagi lamang sa pag-uswag ngadto sa punto sa pagkahamtong nga kita sa tinuoray “ginalig-on sa pagtuo.”—Colosas 2:7.
Sa milabayng pipila ka tuig, gatosan ka libong bag-ong dedikadong mga magsisimba ang misulod sa Kristohanong kongregasyon. Tingali usa ka kanila. Sama sa imong unang-siglong mga igsoon, dili nimo buot nga magpabilin diha sa espirituwal nga pagkamasuso. Buot nimong motubo, mouswag! Apan sa unsang paagi? Ug unsa ang pipila ka paagi nga mahimo nimo ang maong pag-uswag?
Pag-uswag Pinaagi sa Personal nga Pagtuon
Gisultihan ni Pablo ang mga Kristohanon sa Filipos: “Mao kini ang padayon kong ginaampo, nga ang inyong gugma modagaya nga labi ug labi pa gayod uban ang tukmang kahibalo ug bug-os mailahong pagpanabot.” (Filipos 1:9) Ang pagtubo sa “tukmang kahibalo” hinungdanon sa imong espirituwal nga pag-uswag. ‘Ang pagkuha ug kahibalo kang Jehova nga Diyos ug Jesu-Kristo’ maoy nagapadayong proseso, dili usa ka butang nga mohunong human sa bawtismo.—Juan 17:3.
Usa ka Kristohanong sister, nga atong tawgon ug Alexandra, nakaamgo niini napulo ka tuig human siya mabawtismohi sa edad nga 16. Gimatuto siya sa kamatuoran ug kanunayng regular sa pagtambong sa Kristohanong mga tigom ug sa pagpakigbahin sa buluhatong pagsangyaw. Siya misulat: “Sa milabayng pipila ka bulan, naamgohan ko nga adunay grabeng suliran. Mihukom ako sa paghimog usa ka mainampingon, matinud-anong pagsusi sa akong kaugalingon, kon unsay akong pagbati sa kamatuoran, ug kon nganong ako nagpabilin gihapon diha sa kamatuoran.” Unsay iyang nakaplagan? Siya mipadayon: “Nakaplagan ko nga ang mga katarongan sa akong pagkaanaa sa kamatuoran nakatugaw kanako. Nahinumdoman ko nga samtang ako nagdako, gipasiugda ang mga tigom ug pag-alagad sa kanataran. Daw ang mga batasan sa personal nga pagtuon ug pag-ampo maorag moduyog na niana. Apan sa akong gianalisar ang akong kahimtang, naamgohan ko nga wala kini mahitabo.”
Si apostol Pablo nagtambag: “Sa unsa nga gilapdon nga kita nakahimo ug pag-uswag, managlakaw kita nga mahusay sa samang naandan nga paagi.” (Filipos 3:16) Ang usa ka rutina mahimong pasikaranan sa pag-uswag. Sa wala ka pa mabawtismohi, ikaw sa walay duhaduha adunay senemanang rutina sa pagtuon sa Bibliya uban sa kuwalipikado-kaayong magtutudlo. Samtang motubo ang imong apresasyon, imong ilakip niini nga rutina ang pagpangandam alang sa matag semanang leksiyon, nga nagasusi sa gisitar nga mga teksto sa Bibliya, ug uban pa. Karon nga ikaw bawtismado na, padayon ka bang ‘naglakaw sa samang naandang paagi’?
Kon wala, basin kinahanglan nimong susihon pag-usab ang imong mga prioridad, ‘nga nagatino sa mas hinungdanong mga butang.’ (Filipos 1:10) Sa atong puliki nga mga kinabuhi, nagkinahanglan ug pagpugong-sa-kaugalingon sa paggahin ug panahon alang sa personal nga pagbasa ug pagtuon sa Bibliya. Apan ang mga benepisyo takos sa maong paningkamot. Tagda pag-usab ang kasinatian ni Alexandra. “Kinahanglang moingon ko nga ako anaa sa kamatuoran sa milabayng 20 ka tuig o kapin pa pinaagi lamang sa pagtambong sa mga tigom ug pagpakigbahin diha sa ministeryo sa kanataran,” siya miangkon. Hinunoa, siya nagpadayon, “nakahinapos ako nga bisan kon kining mga butanga hinungdanon, kon kini lang dili ako mapalig-on sa dihang ang mga kahimtang mosugod pagkalisod. Kining tanan mitungha tungod kay wala gayod nako batasana ang personal nga pagtuon, ug ang akong mga pag-ampo dili regular ug taphaw. Naamgohan ko karon nga kinahanglan kong ipasibo ang akong panghunahuna ug sugdan ang usa ka mapuslanong programa sa pagtuon aron mailhan ko gayod si Jehova ug makadangat sa paghigugma kaniya ug pag-apresyar sa kon unsay gihatag sa iyang Anak kanato.”
Kon imong gikinahanglan ang tabang sa pag-establisar ug usa ka mapuslanong rutina sa personal nga pagtuon, ang mga ansiyano ug ubang hamtong nga mga Kristohanon sa imong kongregasyon malipay nga motabang kanimo. Dugang pa, ang mga artikulong napatik diha sa Mayo 1, 1995; Agosto 15, 1993; ug Mayo 15, 1986, nga mga isyu sa Ang Bantayanang Torre adunay daghang makatabang nga mga sugyot.
Ang Panginahanglan nga Moduol sa Diyos
Ang laing bahin nga angay nimong paningkamotan nga pauswagon mao ang imong relasyon uban sa Diyos. Sa ubang mga kaso basin adunay grabeng panginahanglan niini. Tagda si Anthony, kinsa nabawtismohan sa linghod nga panuigon. “Ako ang unang anak sa among pamilya nga nabawtismohan,” siya miasoy. “Human sa akong bawtismo, gihalog ako nga mainiton sa akong inahan. Wala ko pa gayod makita siya nga mas malipayon. Dihay hilabihang kangaya, ug nalig-on ako pag-ayo.” Apan, dihay laing bahin sa kahimtang. “Sulod sa dugaydugay nang panahon, wala pay batan-ong nabawtismohan sa among kongregasyon,” si Anthony nagpadayon. “Busa mapasigarbohon kaayo ako sa akong kaugalingon. Mapasigarbohon usab ako sa akong mga komento ug mga pakigpulong diha sa mga tigom. Ang pag-angkon sa pagdayeg ug pag-uyon sa mga tawo nahimong mas hinungdanon kanako kay sa paghatag ug pagdayeg kang Jehova. Wala gayod ako makabaton ug suod nga relasyon uban kaniya.”
Sama ni Anthony, ang pipila mihimog dedikasyon nga mas nangibabaw ang tinguha nga pahimut-an ang uban kay sa tinguha nga pahimut-an si Jehova. Bisan pa niana, ang Diyos nagdahom sa maong mga tawo nga motuman sa ilang panaad nga moalagad kaniya. (Itandi ang Ecclesiastes 5:4.) Hinunoa, kon walay personal nga kalangkitan sa Diyos, sagad malisod alang kanila nga buhaton ang ingon. Si Anthony nahinumdom: “Ang hilabihang kangaya nga akong gibati sa akong bawtismo maoy temporaryo. Wala makaabot ug usa ka tuig human sa akong bawtismo nga ako nahulog sa grabeng daotang buhat ug kinahanglang badlongon sa mga ansiyano sa kongregasyon. Ang sublisubling daotang gawi mitultol ngadto sa pagpalagpot nako gikan sa kongregasyon. Unom ka tuig human sa akong dedikasyon kang Jehova, gidakop ako ug gibilanggo tungod sa pagpatay.”
Pag-ugmad ug Usa ka Suod nga Relasyon Uban ni Jehova
Bisan unsa pay imong kahimtang, ang tanang Kristohanon makasanong sa pagdapit sa Bibliya: “Duol sa Diyos, ug siya moduol kaninyo.” (Santiago 4:8) Sa walay duhaduha imong naugmad ang usa ka sukod sa pagkasuod sa Diyos sa dihang una nimong natun-an ang Bibliya. Imong nakat-onan nga ang Diyos dili mao ang walay-pagtagad nga diyos nga gisimba sa Kakristiyanohan, kondili maoy usa ka persona nga may ngalan, si Jehova. Nakat-onan usab nimo nga siya adunay makapadaning mga hiyas, nga siya maoy “usa ka Diyos nga maluluy-on ug mapuangoron, mahinay sa kasuko ug dagaya sa mahigugmaong-kalulot.”—Exodo 34:6.
Apan, aron makatuman sa imong dedikasyon nga moalagad sa Diyos, ikaw kinahanglang mas mosuod kaniya! Sa unsang paagi? Ang salmista miampo: “Ipakita kanako ang imong mga dalan, Oh Jehova; itudlo mo kanako ang imong mga alagianan.” (Salmo 25:4) Ang personal nga pagtuon sa Bibliya ug sa mga publikasyon sa Sosyedad makatabang kanimo nga mahimong mas mailhan si Jehova. Ang regular nga pagpakigbahin sa kinasingkasing nga pag-ampo hinungdanon usab. “Ibubo ninyo ang inyong kasingkasing sa atubangan niya,” nag-awhag ang salmista. (Salmo 62:8) Samtang imong masinati nga ang imong mga pag-ampo gitubag, imong bation ang personal nga interes sa Diyos kanimo. Motabang kini kanimo nga mobating mas suod kaniya.
Ang mga pagsulay ug mga problema mohatag ug lain pang kahigayonan nga masuod sa Diyos. Tingali imong atubangon ang mga hagit ug mga pagsulay sa pagtuo, sama sa sakit, mga pagpit-os sa eskuylahan ug diha sa trabahoan, o kalisod sa ekonomiya. Basin gani nga ang imong normal nga teokratikanhong rutina sa pagpakig-ambit sa ministeryo, pagtambong sa mga tigom, o pagtuon sa Bibliya uban sa imong mga anak malisod alang kanimo. Ayaw pag-inusara sa pag-atubang sa maong mga problema! Pangaliyupo sa Diyos alang sa tabang, nga maghangyo sa iyang giya ug pagtultol. (Proverbio 3:5, 6) Pangayoa ang iyang balaang espiritu! (Lucas 11:13) Samtang imong masinati ang mahigugmaong tabang sa Diyos, ikaw mas masuod pa kaniya. Ingon sa gisulti ni salmistang David, “tilawi ug tan-awa nga si Jehova maoy maayo . . . Malipayon ang tawo nga modangop kaniya.”—Salmo 34:8.
Komosta si Anthony? “Misugod ako sa paghunahuna sa panahon nga ako adunay daghan kaayong espirituwal nga mga tumong nga nasentro sa pagbuhat sa kabubut-on ni Jehova,” siya nahinumdom. “Masakit kini. Apan latas sa tanang kasakit ug kahigawad, nahinumdoman ko ang gugma ni Jehova. Dugay pa una ako nakaarang sa pag-ampo kang Jehova, apan gihimo ko kini, ug akong gisulti kaniya ang tanan kong gibati, nga nangayo sa iyang pasaylo. Misugod usab ako sa pagbasa sa Bibliya ug ako nakurat kon unsa na ka dako ang akong nahikalimtan ug kon unsa ka gamay gayod ang akong nahibaloan bahin kang Jehova.” Bisag kinahanglang kompletohon pa ni Anthony ang silot sa pagkabilanggo tungod sa iyang sala, gitabangan siya sa lokal nga mga Saksi ug padulong na siya sa espirituwal nga kapasig-ulian. Sa pagkamapasalamaton, si Anthony miingon: “Sa tabang ni Jehova ug sa iyang organisasyon, nahukas ko ang daang personalidad, ug nanglimbasog ako sa pagsul-ob sa bag-o matag adlaw. Ang akong relasyon uban ni Jehova maoy hinungdanon kaayo kanako karon.”
Espirituwal nga Pag-uswag Diha sa Imong Ministeryo
Gisugo ni Jesu-Kristo ang iyang mga sumusunod nga mahimong mga magwawali sa “maayong balita sa gingharian.” (Mateo 24:14) Ingong usa ka bag-o pang magmamantala sa maayong balita, ang imong kasinatian diha sa ministeryo tingali limitado. Nan, sa unsang paagi ikaw mouswag aron ‘tumanon sa bug-os ang imong ministeryo’?—2 Timoteo 4:5.
Ang usa ka paagi mao ang pag-ugmad ug positibong tinamdan. Lantawa ang buluhatong pagwali ingong usa ka “bahandi,” usa ka pribilehiyo. (2 Corinto 4:7) Maoy usa ka kahigayonan nga ipasundayag ang atong gugma, pagkamaunongon, ug integridad kang Jehova. Nagtugot usab kini kanato sa pagpasundayag ug kahangawa sa atong silingan. Ang dili-hinakog nga paghatag sa atong kaugalingon niining bahina mahimong usa ka tinubdan sa tinuod nga kalipay.—Buhat 20:35.
Si Jesus mismo nagbaton ug positibong panglantaw sa buluhatong pagwali. Ang pagpaambit sa mga kamatuoran sa Bibliya sa uban maoy samag “pagkaon” kaniya. (Juan 4:34) Busa ang iyang panukmod sa pagtabang sa uban mahimong sumahon sa iyang mga pulong nga, “Buot ko.” (Mateo 8:3) Si Jesus adunay kaluoy sa mga tawo, ilabina kadtong kinsa “pinanitan ug binalibag” sa kalibotan ni Satanas. (Mateo 9:35, 36) Ikaw ba sa susama “buot” motabang niadtong kinsa anaa sa espirituwal nga kangitngit ug kinsa nanginahanglag kalamdagan gikan sa Pulong sa Diyos? Nan ikaw maaghat sa pagsanong sa sugo ni Jesus: “Busa panglakaw kamo ug paghimog mga tinun-an sa katawhan sa tanang kanasoran.” (Mateo 28:19) Sa pagkatinuod, ikaw palihokon nga mopakig-ambit sa bug-os niining buluhatona sumala sa itugot sa imong panglawas ug mga kahimtang.
Ang laing yawi sa pag-uswag mao ang regular nga pagpakigbahin diha sa ministeryo—matag semana kon posible. Ang pagbuhat sa ingon makatabang sa pagpakunhod sa kakulba ug kahadlok nga lagmit mobabag sa usa nga panalagsa rang mosangyaw. Ang regular nga pagpakigbahin diha sa pag-alagad sa kanataran makabenepisyo usab kanimo sa ubang mga paagi. Padakoon niini ang imong apresasyon sa kamatuoran, palamboon ang imong gugma kang Jehova ug sa silingan, ug motabang kanimo nga padayong nasentro ang pagtagad sa paglaom sa Gingharian.
Apan, komosta kon ang imong presenteng kahimtang maglimite ug dako sa imong pagpakigbahin sa buluhatong pagwali? Kon ang mga pagpasibo tataw nga dili posible, nan pagbaton ug kahupayan sa pagkahibalo nga ang Diyos nahimuot-pag-ayo bisan unsay maarangan nimong buhaton, basta ang imong pag-alagad maoy bug-os-kalag. (Mateo 13:23) Tingali ikaw mouswag sa ubang mga paagi, sama sa pagpauswag sa imong mga kahanas sa pagsangyaw. Diha sa kongregasyon, ang Tunghaan sa Teokratikanhong Ministeryo ug Tigom sa Pag-alagad nagtagana ug daghang maayong pagbansay niining bahina. Natural, kon kita mas batid diha sa ministeryo, mas malingaw kita niana ug makita ang mga resulta.
Busa, tin-aw nga ang pag-uswag sa espirituwal kinahanglang dili mohunong sa adlaw nga ang usa gibawtismohan. Si apostol Pablo misulat mahitungod sa iyang paglaom sa pagkab-ot sa dili-mamatay nga kinabuhi sa mga langit: “Mga igsoon, wala ko pa isipa ang akong kaugalingon ingon nga nakahupot na niini; apan may usa ka butang bahin niini: Kalimtan ang mga butang sa luyo ug magapangab-ot sa mga butang sa unahan, nagapangagpas ako sa tumong alang sa ganti nga pagkatinawag sa Diyos ngadto sa itaas pinaagi ni Kristo Jesus. Busa, kitang tanan nga mga hamtong, managbaton niini nga tinamdan sa pangisip; ug kon sa bisan unsang bahina kamo may pangisip nga nakiling nga sukwahi, ipadayag sa Diyos kining ania sa itaas nga tinamdan nganha kaninyo.”—Filipos 3:13-15.
Oo, ang tanang Kristohanon, kon ang ilang paglaom maoy pagkadili-mamatay sa mga langit o kinabuhing walay kataposan sa Paraiso sa yuta, kinahanglang ‘mokab-ot’—nga nagapanlimbasog, ingnon ta, aron makab-ot ang tumong sa kinabuhi! Ang imong bawtismo maoy usa ka maayong pagsugod, apan kini maoy sinugdanan lamang. Padayon sa pagpaningkamot aron mouswag sa espirituwal. Pinaagi sa mga tigom ug personal nga pagtuon, “pagpakahingkod diha sa mga kagahom sa pagsabot.” (1 Corinto 14:20) ‘Sabta . . . ang gilapdon ug gitas-on ug gihabogon ug giladmon’ sa kamatuoran. (Efeso 3:18) Ang pag-uswag nga imong himoon motabang kanimo dili lamang aron mamentinar ang kangaya ug kalipay karon kondili aron usab mabatonan ang usa ka luwas nga dapit diha sa bag-ong kalibotan sa Diyos, diin ilalom sa pagmando sa iyang langitnong Gingharian, ikaw mahimong mouswag sa kahangtoran!
[Hulagway sa panid 29]
Nagkinahanglag disiplina aron magahinan ug panahon ang personal nga pagtuon
[Hulagway sa panid 31]
Ang pagbaton ug positibong tinamdan makatabang kanato nga makakaplag ug kangaya sa ministeryo