Positibong Aksiyon Ngadto sa Dugang Pag-uswag

¹ Sa dili na gayod madugay sukad karon atong masayran ang tibuok-kalibotang taho sa 1992 nga tuig sa pag-alagad. Sa walay duhaduha kini magahatag na usab og tin-awng ebidensiya nga si Jehova nagapanalangin sa iyang katawhan uban sa talagsaong mga pag-uswag. Ang pagdapit sa pagduyog sa atong halapad internasyonal nga panag-inigsoonay nagapadayon. Ang gidaghanon sa nanambong sa Memoryal nagapakita nga minilyon sa katawhan ang nagapakitag pagtagad sa mensahe sa Gingharian. Gikan sa tanang kanasoran, sila misanong sa inspiradong pagdapit nga nagaawhag: “Umari, kamong katawhan, ug manungas kita sa bukid ni Jehova, ngadto sa balay sa Diyos ni Jacob; ug siya magatudlo kanato sa iyang mga dalan, ug kita magalakaw diha sa iyang mga alagianan.”​—Isa. 2:2-4; Miq. 4:1-4.

² Magmadeterminado nga Mouswag: Ang organisasyon ni Jehova nagalihok. Uban sa daghan kaayong mga bag-ohan nga nagaganayan paingon sa bukid ni Jehova sa matuod nga pagsimba, maoy mahinungdanon nga ang matag usa magapadayon sa paghimog dugang espirituwal nga pag-uswag ug dayon tabangan ang mga mas bag-ohan pa nga mobuhat usab niana. Ang panginahanglan sa maong pag-uswag gipasabot diha sa pahayag nga kadtong misanong sa pagdapit nga motungas sa bukid ni Jehova magaingon ngadto sa uban, “Umari.” Si apostol Juan mitahog susamang butang sa Pinadayag 22:17: “Ug ang espiritu ug ang pangasaw-onon nagapadayon sa pag-ingon: ‘Umari!’ Ug pasagding ang bisan kinsang nakadungog moingon: ‘Umari!’”

³ Si Jesus mipasundayag kon sa unsang paagi kining pagdapita igahatag. Sa dihang ang katawhan misanong sa iyang pagtudlo, siya nagdapit kanila sa pag-ambit diha sa iyang ministeryo ug nagtudlo kanila kon unsaon pagbuhat kana. (Mat. 4:19; 10:5-7, 11-14) Ang iyang mga tinun-an nakakat-on sa epektibong mga paagi nga iyang gigamit pinaagig pagkuyog kaniya ug pagpaniid kon sa unsang paagi gibuhat niya ang mga butang. Unya ilang gipanig-ingon ang ilang ministeryo sama sa iyaha. Sila nakakat-on pag-ayo sa iyang mga paagi nga bisan ang mga magsusupak tin-awng nakaila nga sila mga tinun-an ni Jesus. Ang Buhat 4:13 nagtaho: “Karon sa dihang ilang nakita ang pagkamadayganon ni Pedro ug Juan, . . . sila misugod sa pag-ila kanila nga sila nakig-uban kaniadto kang Jesus.”

⁴ Una pa mobalik sa langit, si Jesus mihatag ug sugo nga ang iyang mga tinun-an kinahanglang maghimog mga tinun-an, nga magatudlo kanila sama sa ilang pagkanatudloan. Sa Mateo 28:19, 20, si Jesus misugo: “Busa panglakaw ug paghimog mga tinun-an sa katawhan sa tanang kanasoran, . . . nga magatudlo kanila sa pagtuman sa tanang butang nga akong gisugo kaninyo.” Ug sa pagpakita nga kini magapadayon hangtod sa atong adlaw, siya midugang: “Tan-awa! Ako magauban kaninyo sa tanang adlaw hangtod sa kataposan sa sistema sa mga butang.”

⁵ Ang matuod nga mga tinun-an ni Jesu-Kristo wala mapakyas sa pagsugot sa iyang mga instruksiyon sa pagtudlo sa bag-ong mga tinun-an sa tanang butang nga iyang gisugo. Bisan pa niana, ang talagsaong pagtubo taliwala sa mga Saksi ni Jehova nagakinahanglang atong tagdon ang espesyal nga mga panginahanglan sa bag-ong bawtismadong mga membro sa kongregasyon ug sa dibawtismadong mga magmamantala ingon man usab ang katawhan nga nagatuon sa Bibliya uban kanato ug kinsa tingali nagasugod na sa pagtambong sa mga tigom sa kongregasyon.

⁶ Sa sinugdanan sa 1992 nga tuig sa pag-alagad, hapit 1 sa matag 9 ka magmamantala ang aktibo diha sa ministeryo sa usa lamang ka tuig. Dugang pa, 1 sa matag 6 ang nagmantala sa mga tulo ka tuig o menos pa; ug 1 sa 4 ang nakig-ambit diha sa ministeryo sa dili mokapin sa lima ka tuig. Bisan pa nga daghang bag-ohan ang nakahimog maayong pag-uswag sukad nga nahimo silang mga membro sa kongregasyon, ang dugang pag-abag sa pipila ka bahin hayan makatabang sa pagpakusog sa ilang espirituwal nga pag-uswag.

⁷ Ang Hebreohanon 6:1 nagadasig sa tanan sa “pagpadayon ngadto sa pagkahamtong.” Ang Kristohanong pagkahamtong labaw pang mosaylo kay sa paghulog lamang og report. Kini nagalakip sa pag-uswag diha sa personal nga pagtuon ug regular nga pagtambong sa tigom ingon man usab sa masibotong pakig-ambit diha sa ministeryo sa kanataran. Ang pagtabang sa uban nga makadangat sa kahibalo sa kamatuoran alang sa kaluwasan nalangkit usab. Kinahanglang ugmaron ta ang pagbaid sa atong mga kahanas sa ‘pagpangatarongan pinasukad sa Kasulatan.’ (Buh. 17:2) Ang pagtubo ngadto sa pagkahamtong nagakinahanglag panahon, ug kini nagadepende sa atong diyosnong debosyon ug sa atong pagbatog kasinatian diha sa kanataran. Bisan tuod nga kontrolado ang kalalom sa atong kaugalingong diyosnong debosyon, maoy dalan sa kaalam ang pagtugot sa ubang hamtong mga igsoong lalaki ug babaye nga mobulig kanato sa pagbaton og mapuslanong kasinatian. Makakat-on ta sa ilang kasinatian, ilabina diha sa ministeryo sa kanataran. Dili kinahanglang mokat-on ta sa tanang butang sa atong kaugalingon pinaagig tira-pasagad.

⁸ Tabang Alang Kanilang Kulang sa Kasinatian: Ang sulondan sa paghatag og pag-abag gipahiluna sa sinugdanan sa Kristohanong kongregasyon. Si Jesus nagtudlo sa iyang mga tinun-an. (Mar. 3:14; Luc. 9:1; 10:1) Sa baylo, sila nanudlo sa uban. Si Timoteo midawat ug espesyal nga pagdasig ug tabang gikan kang apostol Pablo, ug ang tinun-ang Apolo miuswag uban sa personal nga pag-abag nga gikan kang Aquila ug Priscila. (Buh. 18:24-27; 1 Cor. 4:17) Ang hamtong nga mga membro sa Kristohanong kongregasyon nagasunod sa maong mga panig-ingnan karong adlawa, nga nagatudlo ug nagadasig sa menos pag kasinatian, ilabina ang mga mas bag-ohan pa ug kabatan-onan. Ingon sa gipamulong sa Roma 15:1, 2, “Hinunoa, kita nga mga lig-on angay mopas-an sa mga kaluyahon niadtong mga dili lig-on.”

⁹ Ang mga ginikanan ang responsable sa pagbulig sa ilang mga kabataan nga mouswag sa espirituwal. Kini nagalakip sa pagtuon sa pamilya, pagtudlo sa mga bata kon unsaon pagtuon sa personal nga paagi, regular nga pagtambong sa panagkatigom ug pakig-ambit, ug pagpadapat kon unsay ilang nakat-onan. (Efe. 6:4; 1 Tim. 5:8) Ang mga konduktor sa Pagtuon sa Libro sa Kongregasyon ilabina ang kinahanglang maghimog mga kahikayan sa pag-abag sa tanan diha sa ilang mga grupo sa pagtuon sa libro nga mouswag sa espirituwal nga paagi. Ang magtatan-aw sa pag-alagad ug ubang mga ansiyano ingon man ang ministeryal nga mga alagad ug ubang mga membro sa kongregasyon makatabang man usab.

¹⁰ Itagana Kon Unsay Gikinahanglan: Ang panginahanglan mahimong maoy pag-abag lamang sa usa ka bahin sa Kristohanong mga kalihokan, sama sa personal nga pagtuon. Ang usa ka tawo mahimong nanginahanglag mga sugyot sa pagpahilunag mapuslanong eskedyol sa pagtuon. Ang lain pa nanginahanglag tabang sa pag-andam sa mga komento o mga asaynment. Ang uban hayan nagakinahanglang makakat-on kon unsaon pagpangdukiduki sa mga ulohan sa Bibliya.

¹¹ Daghang mga bag-ohan ang nanginahanglag tabang diha sa ministeryo sa kanataran. Ang usa ka magmamantala hayan nga buot mahimong labaw pang epektibo diha sa balaybalay nga buluhaton, paghimog mga balikduaw, o pagsugod ug pagdumalag usa ka pagtuon sa Bibliya. Ang pipila ka sesyon sa pagbansaybansay nga nagagamit sa mga pasiuna ug mga presentasyon gikan sa librong Nangatarongan o gikan sa Atong Ministeryo sa Gingharian mahimong igo na. Sa ubang mga panahon, ang mga sugyot alang sa usa ka mapuslanong eskedyol sa pag-alagad sa kanataran mahimong mao lamang ang gikinahanglan. Ang paghimog tinong mga kahikayan sa pagkuyog uban sa usa ka tawo nga nanginahanglag pagbulig makapaarang kaniya nga mouswag ngadto sa tinong mga tumong.

¹² Ang Pulong sa Diyos nagadasig kanato nga tugotan tang madayag ngadto sa uban ang atong espirituwal nga pag-uswag. (1 Tim. 4:15) Uyon nianang pagdasiga, ang apostol mipasiugda sa panginahanglang atong bansayon ang atong kaugalingon maingon sa nakig-indig diha sa usa ka bangga sa dula o aron malamposong makig-ambit diha sa espirituwal nga pakig-away. (1 Cor. 9:24-27; 2 Cor. 10:5, 6) Kinahanglang ipadapat dayon nato ang tanan tang nakat-onan bahin sa kabubut-on sa Diyos aron nga ang mga tigpaniid makasud-ong diha kanato sa buhing mga panig-ingnan sa matuod nga Kristohanong pagtuo. Sa ingon usab, kinahanglan tang nagauswag diha sa arte sa pagpanudlo sa uban aron mahimong dedikadong mga tinun-an ni Jesu-Kristo.​—Sant. 1:22-25; 1 Tim. 4:12-16.

¹³ Ang Pag-uswag Nagalakip sa Paglahutay sa mga Pagsulay: Bisan si Jesu-Kristo nakakat-on og bililhong mga leksiyon gikan sa mga butang nga iyang giantos. (Heb. 5:8) Makahimo man usab kita. Busa, ang espirituwal nga pag-uswag mapausbaw kon batonan tang positibong tinamdan nga girekomendar sa Santiago 1:2, 3: “Tagda kining lunlon nga kalipay, akong mga igsoon, sa dihang masagubang ninyo ang nagakadaiyang mga pagsulay, sa pagkasayod nga samtang ginabuhat ninyo kana kining sinulayang kalidad sa inyong pagtuo mosangpot og pagkamainantoson.” Busa, bisan kon kita kinahanglang mosagubang sa dugay nang mga balatian, ekonomikanhong mga kalisdanan, pagpuyo diha sa nabahing panimalay, pagsupak diha sa teritoryo, o uban pang makadaot nga mga kahimtang, anaa kanato ang pasalig ni Jehova nga uban sa iyang panabang makabuntog ta ug makapadayon sa pag-uswag sa atong pagsimba kaniya. (1 Cor. 10:13; 2 Cor. 12:9; 1 Ped. 5:8-11) Ang kalamposan mabatonan pinaagig pagkalig-on ubos sa tanang kahimtang, ‘nga nagasulti sa balaang mga kapahayagan sa Diyos ug nagaalagad ingon nga nagadepende sa kusog nga gitagana sa Diyos, aron nga sa tanang butang ang Diyos pagahimayaon pinaagi kang Jesu-Kristo.’​—1 Ped. 4:11.

¹⁴ Dawata ang Tabang Ngadto sa Dugang Pag-uswag: Kon ikaw usa sa nanginahanglan og tabang aron makahimog dugang espirituwal nga pag-uswag, magmaandam sa pagdawat og pag-abag gikan sa mas eksperiyensiyadong membro sa kongregasyon. Bisan kon ikaw wala pa maduol uban sa hanyag sa tabang, ayaw kaulaw nga mangayog panabang. Batiang gawasnon nga makapangayog pagbulig sa bisan kinsa sa eksperiyensiyadong mga igsoon sa kongregasyon. O mahangyo mo ang inyong konduktor sa Pagtuon sa Libro sa Kongregasyon, ang magtatan-aw sa pag-alagad, o bisan kinsang uban pang mga ansiyano alang sa gikinahanglang pag-abag.​—Itanding Genesis 32:26; Mateo 7:7, 8.

¹⁵ Sa pagkatinuod, maoy usa ka kahibulongang pribilehiyo ang mahilakip sa kusog-nagauswag nga internasyonal nga “dakong panon” nga nagaganayan paingon sa bukid ni Jehova sa putling pagsimba. (Pin. 7:9) Maoy usa usab ka pribilehiyo ang pagdapit sa uban nga moduyog uban kanato. Uban sa kinasingkasing nga pagpabili, hinaot nga mopadayon ta sa pagbaton og positibong aksiyon ngadto sa dugang pag-uswag, nga nagalig-on sa espirituwalidad sa atong kaugalingon ug nagabuhat sa kon unsay atong maarangan sa pagtabang sa uban nga mouswag uban kanato diha sa pag-alagad ni Jehova.